Na modo chiñuꞌu ñaꞌan xi Ndios andivi
4
Kuenta tuꞌu jaꞌa san na ntsaꞌa da, Xini ni ña, xini da en ndieꞌe nuna andivi kuaan. San diꞌnanuu tachi tsaku da sa kuu kuenta trompeta, sa kaꞌan da sa kachi:—Ku ndaa ichaꞌa, san dadana ñaꞌan ntsu ndidaa sa dika taꞌan nayaꞌia ndidaa jaꞌa.
2 San ora yukua Espíritu Santu dadana ñaꞌan; xini ni ña xini da sa sakuntsaku ia tastuni io andivi, san intsaku ia s-trono ia. 3 San jnu ia intsaku trono kuaan kaa kuenta kaa en yuu xaꞌvi ntseꞌe xi nani jaspe xiꞌin cornalina; san nee ndodo s-trono ia io en koviaꞌanchi, sa sandutsa ntseꞌe kuenta yuu xaꞌvi ntseꞌe xi nani esmeralda. 4 San nee ndodo s-trono ia io oko kumi ka trono, san juan intsaku ndodo oko kumi tsa savaꞌa, niꞌno titsaa kuixi kachi, san menina ni oro kuu corona ñoꞌon d̶iki tsa. 5 San sa intsaku ndodo tsa kuaan kee sa sandutsa xiꞌin neꞌé xiꞌin kuaꞌa ntseꞌe sa tsaku; san jnu xi sa intsaku ndodo tsa xiko usa ñuꞌu, sa kuu ndi usa x-espíritu Ndios. 6 San jnu trono kuaan io kuenta en mar kuu mediini vidriu.
San yachi sa io trono kuaan xiꞌin nee ndodo, io kumi sa nchito san chitu nduchi nu ichi jnu xi xiꞌin ichi sata xi. 7 Diꞌna nuu sa nchito kuaan kaa kuenta kaa en ndikaꞌa, san saku uu kuaan kaa kuenta kaa en toro yiki, san sa ku uni kuaan io jnu xi kuenta en tsayee, san sa ku kumi kuaan kaa kuenta en yaꞌakolo ndagua. 8 San ndi kumi sa nchito kuaan ndiden en io iñu nchixi xi, san nendodo xiꞌin ichi xiti xi chitu nduchinuu. San nisa kii san nisa niñu ti kukadi sa kaꞌan:
Ia ii, ia ii, ia ii ku ia kuu ku Toꞌo ndo
ia io ndidaa ndituꞌu sa tastuni xi,
ia kúu, ia io xiꞌin ia ku kuu.
9 San ndiden kidakaꞌnu ñaꞌan ndidaa sa nchito ya, chiñuꞌu ñaꞌan xiꞌin sa ñaꞌan taxaꞌvi xi ia intsaku ndodo trono, xiꞌin ia io vita xiꞌin ndidaa tiempu, 10 san ndiden duꞌua kida ndidaa sa nchito ya san ndi oko kumi tsa savaꞌa sa kuinxiti tsa saꞌa ia intsaku ndodo trono san chiñuꞌu ñaꞌan tsa xi ia nchito vita xiꞌin ndidaa tiempu; san dakana tsa ndidaa x-corona tsa jnu s-trono ia, san kaꞌan tsa ndidaa tsa:
11 Toꞌo, nitaꞌvi ni sa kadakaꞌnu ñaꞌan jni xiꞌin sa chiñuꞌu ñaꞌan jni
xiꞌin sa tastuni ni;
kuan duꞌua sani-ini ni
juandiku kuguaꞌa xiꞌin io ndidaa sa io.