Corderu nundaꞌa tutu tuniꞌno yodotuni
5
San xini da sa ndaꞌa kuaꞌa ia intsaku ndodo trono, nundaꞌa en en tutu natuu san yodotuni jnu xi xiꞌin sata xi, san ntsadi xiꞌin usa sellu. 2 San xini da en ángel ntsee ntseꞌe san niꞌi ntseꞌe kanandodo:—Andu kuu sa nitaꞌvi sa nakaan tutu natuu xan xiꞌin dandatsa ndidaa sellu xi xan?
3 Doko ti en kachi nakaan nisa ndidaa sa io andivi nisa ndidaa sa io nuꞌu san nisa ndidaa sa io xiti nuꞌu ti káchi nakaan, san nisa ti kachi ntsaꞌa tutu natuu kuaan. 4 Ndaꞌyu ntseꞌe da, kuan ti en naniꞌi sa nitaꞌvi sa nakaan tutu natuu; san nisa sa kaꞌvi nasa yodotuni. 5 Doko en ndi oko kumi tsa savaꞌa yaꞌa kachi tsa d̶a:
—Ma ndaꞌyu yo. Kuan ntsaꞌa ka, tribu Judá io en Ndikaꞌa, xoꞌoa j-raza rey David sa kendoo, kidanar ia sa nakaan ia tutu natuu xiꞌin sa dita ia ndi usa sellu.
6 San ntsaꞌa da, san xini da sa dagua dagua trono xiꞌin sa io ndi kumi sa nchito, xiꞌin dagua dagua sa intsaku ndidaa tsa savaꞌa in en Corderu kuenta kaa en kiti diti d̶uku xi, san io usa ndiki te, xiꞌin usa nduchinuu te, sa kuu ndi usa x-espíritu Ndios sa tsándaꞌa ia nee ñuyii ya. 7 San kixi Corderu kuaan, san teen ia xiꞌin ndaꞌa kuaꞌa ia tutu nundaꞌa ia intsaku ndodo sa tastuni. 8 San kuenta teen ia tutu natuu kuaan, san ndi kumi sa nchito xiꞌin ndi oko kumi tsa savaꞌa sa kuinxiti tsa san nontsayu tsa ntsaa nuꞌu, jnu Corderu; san nundaꞌa tsa ndidaa tsa en en arpa xiꞌin en en copa oro chitu dusa, sa kuu sa xikataꞌvi ndidaa ñayii ndu ii. 9 San ndidaa tsa yaꞌa duꞌua xita tsa en kantu saa, kachi tsa:
¡Dini ku sa nitaꞌvi sa teen tutu natuu ya xiꞌin sa dandatsa sellu xi!
kuan dini kuu sa díti ñaꞌan xi
san xiꞌin j-niñi ni chaꞌvi sa saꞌa ndidaa raza, ndidaa daꞌan, ndidaa ñuu xiꞌin ndidaa nación sa kuxi Ndios.
10 San kida ñaꞌan ni d̶a ndidaa da sa na ku kuu da rey xiꞌin dutu xi ku Ndios ndo,
san tastuni ndo sata nuꞌu yaꞌa.
11 Danduu nantsaꞌa da, san tsaku da s-tachi kuaꞌa ntseꞌe ángel io nendodo s-trono ia, xiꞌin sa io ndidaa sa nchito xiꞌin ndidaa tsa savaꞌa. San ndidaa ángel kuu mil xiꞌin millon. 12 Niꞌi ntseꞌe xita ndidaa:
Niꞌitaꞌvi Corderu diti d̶uku xi, sa niꞌi ia sa tastuni,
sa niꞌi ia ndidaa sa kuika, sa niꞌi ia sa kutuni xi, sa niꞌi ia ndidaa sa ntsee,
sa niꞌi ia sa keñuꞌu, nitaꞌvi ia sa kukaꞌnu ia xiꞌin sa niꞌi ia sa kada kaꞌnu ñaꞌan xi ia.
13 San ndidaa sa kúguaꞌa sa io andivi, sa io nuꞌu, sa io xiti nuꞌu, xiꞌin xiti mar xiꞌin ndidaa ndituꞌu sa io, tsaku d̶a sa kachi:
Vita xiꞌin ndidaa tiempu
na kaꞌan guaꞌa, na keñuꞌu, na kukaꞌnu
xiꞌin na tastuni ia intsaku ndodo trono,
xiꞌin Corderu.
14 Danduu ndi kumi sa nchito kachi:
—¡Duꞌua na kuu!
San ndi oko kumi tsa savaꞌa sa kuinxiti tsa san nontsayu tsa ntsa nuꞌu san chiñuꞌu tsa ia nchito ndidaa ndituꞌu tiempu.