Apocalipsis 6

Diꞌna nuu sellu

Xini da kuenta nakaan Corderu kuaan diꞌna nuu sellu, san tsaku da sa en ndi kumi sa nchito kuaan kaꞌan kuenta kaꞌan en ñuꞌu kaꞌnu san kachi:

—Naꞌa, san ntsaꞌa yo.

2 San ntsaꞌa da, san xini da en kiti kuixi. San xini ni ña, tsa yodo te kuaan nundaꞌa tsa en kuxi, san sañaꞌan en corona s-tsa; san kídanar tsa xiꞌin kadanar ni on tsa.

Sellu ku uu

3 San kuenta nakaan Corderu sellu ku uu, tsaku d̶a sa kaꞌan sa ku uu nchito sa kachi:

—Naꞌa, san ntsaꞌa yo.

4 San kee en kiti kuaꞌa kuenta kaa ñuꞌu kaa te. San tsa yodo te, sañaꞌan sa tastuni tsa sa dita tsa sa io kadi ñayii nuꞌu ya ndasa nakaꞌnitaꞌan ndidaa ñayii. San sañaꞌan en machiti kaꞌnu ntseꞌe s-tsa.

Sellu ku uni

5 San kuenta nakaan Corderu sellu ku uni, tsaku d̶a sa kaꞌan sa ku uni nchito san kachi:

—Naꞌa, san ntsaꞌa yo.

Xini ni ña, xini da en kiti ton, san tsa yodo te nu daꞌa tsa en sa chikuꞌua. 6 Danduu tsaku da en tsa kaꞌan dagua dagua sa io ndidaa sa nchito, san kachi tsa:

—En litro trigu xaꞌvi xi ndaa teyaꞌvi ñayii en kii, san uni litro cebada xaꞌvi xi ndaa teyaꞌvi ñayii en kii. Doko ma kada dañu yo xi aceite nisa vinu.

Sellu ku kumi

7 San kuenta nakaan ia sellu ku kumi, tsaku da sa kaꞌan sa nchito ku kumi san kachi:

—Naꞌa, san ntsaꞌa yo.

8 San ntsaꞌa da san xini ni ña, xini da en kiti kuaan; san tsa yodo te nani tsa sa Saꞌni ñaꞌan; san sa Yeꞌe ndidaa ndii nchiko ñaꞌan s-tsa. Sañaꞌan xi sa Saꞌni ndii sa na kaꞌni ñayii en kuartu ñuyii xiꞌin machiti, xiꞌin doko, xiꞌin sa na kuu ñayii na kada kueꞌe, xiꞌin sa na kaꞌni ñaꞌan kiti yuku xi ñayii.

Sellu ku oꞌon

9 Kuenta nakaan Corderu sellu ku oꞌon, xini da x-kaꞌa altar. Sa juan xuku x-alma ndidaa tsa xiꞌi sa saꞌa s-toꞌon Ndios xiꞌin xu koo modo nchoxi ia. 10 Niꞌi ntseꞌe kana ndidaa san kachi:

—Na ora, Toꞌo, ia ii, ia ndaa, ndakakuachi ni xiꞌin nachonaa ni j-niñi da ndidaa da xi ndidaa ñayii io nuꞌu?

11 San ndiden ndiden sañaꞌan s-tsa en doꞌno kuixi kachi; sadaa s-tsa sa na kuntsatu ka tsa en taꞌa, ntsaa na xinotaꞌan ndidaa tsa ndeꞌe kuenta xiꞌi ndidaa tsa xuku x-kaꞌa altar.

Sellu ku iñu

12 Xini da kuenta na kaa Corderu sellu ku iñu, san niꞌi ntseꞌe kanda nuꞌu ya; san ora nduu ton kuenta titsaa ton; xiꞌin yoo kuaan nduu kuaꞌa niñi, 13 ndidaa chodini io andivi koꞌio nuꞌu, kuenta tu tichikaꞌakuxi koꞌio x-kuiꞌi xi ora kana ntseꞌe tachi. 14 Andivi natuniꞌno kuenta en yuu, ndidaa tinduu xiꞌin ndidaa isla dita ñaꞌan xi ami in. 15 San ndidaa rey ñuyii ya, ndidaa tsa kunaꞌnu, tsa kuika, ndidaa tsa tastuni ñaꞌan xi soldadu, tsa tastuni, ndidaa esclavu, xiꞌin ndidaa tsa ti kuu esclavu xinodaꞌavi tsa xiti ndidaa yavi xiꞌin xiti ndidaa kagua io ndidaa tinduu, 16 Sadaa tsa xi ndidaa tinduu xiꞌin ndidaa kagua:

—Tavi ñaꞌan ku ntsu san chiguaꞌa ñaꞌan ku ntsu kuan ndasa ma kini ñaꞌan ia intsaku trono xiꞌin ma taꞌan ntsu sa diko-ini Corderu kuan, 17 kuan sa saa kii kaꞌnu kii yuꞌu, kuan sa diko xi ia intsakundodo trono sa saa, san ma en kuyakui sa kuin jnu ia.