En cientu xiꞌin uvidiko kumi mil tsa io selladu
7
Danduu xíni da kumi ángel san in sata ndi kumi ladu ñuyii, san nu ndaꞌa ndi kumi tachi nuꞌu ya, ndasa ma kana tachi sata ñuyii ya, san nisa sata mar, san nisa sata nisa en yutu. 2 Xini da enka ángel, kusaa ichi kana ora, san neꞌe sellu Ndios nchito. San niꞌi ntseꞌe kana xi ndi kumi ángel, sa niꞌi sa tastuni sa kada dañu xi nuꞌu ya xiꞌin mar, san kachi:3 —¡Ma kada dañu yo xi nuꞌu ya, nisa mar san nisa ndidaa yutu, ntsa na tuꞌu kada sellar s-tsaan ñayii xinokuachi xi Ndios!
4 Tsaku d̶a nadaa tsa kuu tsa io selladu kuaan: En cientu xiꞌin uvidiko kumi mil ñayii io xiti ndiden en ndi uxi uu tribu io Israel. 5 San ndidaa tsa io selladu: Tribu Judá uxi-uu mil, tribu Rubén uxi-uu mil, tribu gad uxi-uu mil, 6 tribu Aser uxi-uu mil, tribu Neftalí uxi-uu mil, tribu Manasés uxi-uu mil, 7 tribu Simeon uxi-uu mil, tribu Leví uxi-uu mil, tribu Isacar uxi-uu mil, 8 tribu Zabulón uxi-uu mil, tribu José uxi-uu mil, tribu Benjamín uxi-uu mil.
Ndidaa ñayii niꞌno titsaa kuixi kachi
9 San kuenta tuꞌu jaꞌa san ntsaꞌa da, san xini ni ña, xíni da kuaꞌa ntseꞌe ñayii, san ti en kachi kaꞌvi ñaꞌan xi, nadataꞌan nadatuꞌu nacion, raza, ñuu xiꞌin daꞌan, san xuku tsa ndidaa tsa jnu ia intsaku ndodo sa tastuni xiꞌin jnu Corderu, san niꞌno tsa titsaa kuxi kachi xiꞌin nu ndaꞌa tsa ñoo; 10 San niꞌi ntseꞌe kana tsa ndidaa tsa san kachi tsa:
Sa nanitaꞌvi ndo kuu
xaꞌan ku Ndios ndo ia intsaku trono
xiꞌin Corderu.
11 San ndidaa ángel in nee ndodo trono, xiꞌin ndidaa tsa savaꞌa xiꞌin ndi kumi sa nchito, sa kuinxiti tsa san nontsayu tsa ntsa nuꞌu jnu trono, san chiñuꞌu ñaꞌan tsa xi Ndios, 12 San kachi tsa ndidaa tsa:
Duꞌua na kuu. Sa kaꞌan guaꞌa xi Ndios xiꞌin sa kidakaꞌnu ñaꞌan xi ia xiꞌin sa kutuni
xiꞌin sa kida sa sañaꞌan taxaꞌvi xi ia xiꞌin sa na kininchisa sa kuu ia
xiꞌin sa tastuni ia xiꞌin ndidaa sa ntsee, na kuxi ku Ndios ndo ndidaa tiempu. Duꞌua na kuu.
13 En tsa savaꞌa ndukutoꞌon tsa da:
—Ndidaa tsa niꞌno titsaa kuxi kachi ya; Andu kuu tsa san ami kee tsa?
14 San dan sadaa da:
—Dito, meni kuu sa xini.
San kachi tsa da:
—Ndidaa tsa yaꞌa kuu tsa kuaꞌa ntseꞌe táꞌan xiꞌin nayaꞌia, san nakatsa tsa doꞌno tsa san ndada kuixi kachi tsa xiꞌin niñi Corderu. 15 Juandiku xuku tsa ndidaa tsa jnu s-trono Ndios, san xinokuachi tsa nduu xiꞌin niñu s-templu Ndios; san ia intsakundodo trono kuntsaka ñaꞌan ia xiti s-tabernaculo ia. 16 San ma kuita ka tsa, nisa ma yichi ka tsa ndutsa, san ma dakayu ñaꞌan ka ora s-tsa nisa sa iꞌni; 17 Kuan Corderu intsaku trono kadi ñaꞌan s-tsa, xiꞌin kuntsaka ñaꞌan s-tsa sa kana ndutsa sa ñaꞌan vida; san Ndios kada ia sa ma ndaꞌyu ka tsa ndidaa tsa.