CARTA KU UNI CHÍDOTUNI JUAN
Kada ntse-ini ni ndidaa ni
1
Dan tsa savaꞌa tsaa da xi Gayo tsa xinimani ntseꞌe da tsa xinimani nchisa da.2 Xanii tsa xinimani ntseꞌe da, xika da xi Ndios sa na koo guaꞌa ni ñuyii yaꞌa, duꞌua kuenta io guaꞌa xanaa ni xiꞌin espíritu ni. 3 Ku-iꞌni ntseꞌe da kuenta nasaa ndidaa ku kiani ndo san na kani tsa sa io ni xiꞌin kida ni sa ndaa. 4 Atuu ka en sa kida sa ku iꞌni da, maska sa niꞌi toꞌon da sa ndidaa dini tsa kuu d̶aꞌa da io ni xiꞌin kida ni sa ndaa.
Kaꞌan guaꞌa xi Gayo
5 Xani tsa xinimani ntseꞌe da, guaꞌa ntseꞌe kida ni xi ndidaa ku kiani ndo ora xinokuachi ni, kuani ti xini ñaꞌan ni s-tsa ndidaa tsa. 6 Ndidaa tsa yaꞌa kaꞌan guaꞌa tsa xi na modo xinimani ni xi congregación ya, sako ndaꞌvi da jnu ni sa na koꞌno ichi ñaꞌan ni s-tsa ami na kiꞌin tsa, kuenta nataꞌan xanaa Ndios. 7 Kuan sa saꞌa sa xinokuachi tsa xi ia dandoo tsa ndidaa ndituꞌu, san ti teen tsa nisa dana sa sañaꞌan ndidaa ñayii ti xininchisa. 8 Juandiku ntsoo ndidaa ndo nchoxi sa na nakuaka ñaꞌan ndo xi ndidaa tsa yaꞌa san duꞌua na chintsee ñaꞌan ndo s-tsa xiꞌin chiion kida tsa sa kaꞌan tsa sa ndaa.
Diotrefes ti tsaku s-tsa
9 Dan tsaa̱ da xi congregación xan; doko Diotrefes tsa nchu ku naꞌnu io xan, ti taꞌa-ini tsa. 10 Sa saꞌa xi jaꞌa juandiku tu na kiꞌin da san kadaa da ndidaa sa kida tsa xiꞌin ndidaa sa kaꞌan kuiꞌia tsa da ndidaa da. San adi ni jaꞌa kida tsa, kuan ti taꞌa-ini tsa ndidaa ku kiani ndo, san tu dakaa tsa taꞌa-ini ñaꞌan xi ku kiani ndo san tsa yaꞌa dadaꞌan tsa san xiko ñaꞌan tsa xiti congregación.
Kaꞌan guaꞌa xi Demetriu
11 Xanii tsa xinimani ntseꞌe da, ma dandee ni sa kuiꞌia, dandee ni sa guaꞌa. Kuan ñayii kida sa guaꞌa kuu xaꞌan Ndios; doko ñayii kida sa kuiꞌia, vita ñaꞌan ka kini taꞌan xiꞌin Ndios.
12 Ndidaa tsa kaꞌan guaꞌa xi Demetriu, kuan kida tsa sa ndaa, san dan ndidaa da kaꞌan guaꞌa da s-tsa tuku, san di ndidaa ni xini ni sa sa kaꞌan da kuu sa ndaa.
Kada ntse-ini jni
13 Kuaꞌa ntseꞌe sa io sa chidotuni da ni, doko ti nchu tsaa da tutu xiꞌin tinta, 14 Kuan sa io sa kiꞌin da sa io ni xan san kuntsaku ndo ndatoꞌon ndo.
15 Ndios na taxi toꞌon kaꞌnu-ini ni. Ndidaa tsa mani xiꞌin da io jaꞌa, kachi tsa sa na kada ntse-ini ni. Kadaa ni xi ndiden en ndidaa tsa mani xiꞌin ndo io sa io ni xan sa na kada ntse-ini s-tsa.