Cristu tastuni ia en mil kuia nuꞌu ya
20
Xini da en ángel nonoo andivi san nundaꞌa ndakaa numa sa kono naa niñu, xiꞌin nundaꞌa en cadena kaꞌnu ntseꞌe. 2 Teen ñaꞌan xi koo, sa kuu koo duꞌua ni io, san dini tsa yaꞌa kuu diablu xiꞌin Satanas, san xiꞌni ñaꞌan s-tsa en mil kuia; 3 San dakana niꞌno ñaꞌan s-tsa numa kono naa niñu, san na kadi kutu, san kida sellar, ndasa ma dandaa ñaꞌan ka tsa xi ndidaa nacion, ntsa na xino en mil kuia; danduu na xino taꞌan san nandeꞌe sa dayaa ñaꞌan s-tsa en taꞌa ni tiempu.4 Danduu xini da kuaꞌa ntseꞌe trono, san sakuntsaku ndodo ndidaa ñayii nitaꞌvi sa ndakakuachi, san xini da x-alma ndidaa ñayii diti duku xi sa saꞌa sa káꞌan s-toꞌon Ndios, ndidaa ñayii ti chiñuꞌu ñaꞌan xi kitivii xiꞌin x-imagen xi xiꞌin ñayii ti semani sa niꞌi tuni s-tsaan xi adi ndaꞌa xi; ndidaa ñayii yaꞌa nandoto san tástuni xiꞌin Cristu en mil kuia. 5 Ndidaa tsa xiꞌi ti nandoto ka tsa, ntsa naxino taꞌan en mil kuia. Jaꞌa kuu diꞌnanuu sa nandoto ñayii. 6 Guaꞌadiko xiꞌin ii ñayii na nandoto diꞌna nuu sa nandoto ñayii; kuan ma kuu ñayii yaꞌa guelta uu a, maska sa ku kuu tsa d̶utu Ndios xiꞌin Cristu, san tastuni tsa xiꞌin Cristu en mil kuia.
Sa xita Satanas
7 Ora na xino en mil kuia dayaa ñaꞌan xi Satanas sa yentsadi, 8 kee sa dandaa ñaꞌan xi ndidaa nacion io ndi kumi ladu ñuyii, Gog xiꞌin Magogb, ndasa na nataka sa naa. San kuenta nika xuku choko tsa ndidaa tsac. 9 Nátaka tsa ndidaa tsa sa ndeka nuꞌu ya, san chikorra tsa sa nátaka ndidaa ñayii ndu ii xiꞌin ñuu xinimani Ndios kuan ndidaa tsa yaꞌa nataka tsa sa naa tsa tuku; danduu sa io Ndios noo ñuꞌu ntsaa andivi, san dandeꞌe ñaꞌan xi ndidaa ñayii xini uꞌu ñaꞌan xi xuun ia. 10 Danduu diablu xu dandaa ñaꞌan dakananiꞌno ñaꞌan xi xiti laguna ñuꞌu xiko xiꞌin azufre, sa io kitivii xiꞌin profeta naꞌntsa; san ndu xiꞌin niñu taꞌan ntseꞌe tsa ndidaa tsa duꞌua koo tsa ndidaa tiempu.
Ndidaa ñayii ndakakuachi xi jnu Ndios
11 Danduu xini da en trono kuixi kaꞌnu xiꞌin xini da ia intsaku ndodo, san nuꞌu xiꞌin andivi xino sa io ia, san nisa en lugar ti niꞌi sa koo. 12 San xini da ndidaa ndii ñayii kunaꞌnu xiꞌin ñayii ti kunaꞌnu, in tsa jnu Ndios. Ndidaa tutu kuaan dandatsa, danduu xidokuachi ndidaa ñayii ndidaa sa kída ñayii kuan ndidaa juan yodotuni ndidaa tutu kuaan san dandatsa enka tutu tuku, sa kuu tutu natuu sa yodotuni ñayii koo ndidaa tiempu xiꞌin Ndios. 13 Mar na kuañaꞌan ndii xiꞌi xiti xi, san tsa Saꞌni ñaꞌan xiꞌin sa Yeꞌe ndidaa ndii nakuañaꞌan ndii io xi; san ndaka kuachi xi ndiden en ñayii yaꞌa sa saꞌa sa kída ñayii yaꞌa. 14 San tsa Saꞌni ñaꞌan xiꞌin sa Yeꞌe ndidaa ndii dakananiꞌno ñaꞌan xi xiti laguna ñuꞌu. Jaꞌa kuu guelta ku uu sa kuu ñayii. 15 San tutu natuu sa yodotuni ñayii koo ndidaa tiempu xiꞌin Ndios ndidaa ñayii ti yodotuni tutu yaꞌa, dakananiꞌno ñaꞌan xi xiti laguna ñuꞌu.