Kida kaꞌnu ñaꞌan xi Ndios
19
Danduu tsaku da s-tachi kuaꞌa ntseꞌe ñayii andivi, san kachi:¡Aleluya! Sa nanitaꞌvi xiꞌin sa chiñuꞌu, sa kunaꞌnu xiꞌin sa tastuni kuu xaꞌan Ndios ia kuu ku Toꞌo ndo;
2 kuan ndidaa sa ndakakuachi ia kuu sa ndaa xiꞌin sa ndaa;
san sa ndakakuachi ia xi ña deꞌe kaꞌnu xu diko mee, ña dandaa ña xi ndidaa ñayii io nuꞌu ya
xiꞌin ndidaa sa kuiꞌia xu kada ña,
san na chonaa ia niñi ndidaa ñayii saꞌni ña ñayii xu xinokuachi xi ia.
3 Danduu kachi nituku tsa ndidaa tsa:
—¡Aleluya! San xuꞌma ña diko mee kana ndidaa tiempu.
4 Ndi oko kumi tsa savaꞌa xiꞌin ndi kumi sa nchito sakuixiti tsa san nontsayu tsa ntsa nuꞌu san chiñuꞌu tsa Ndios, ia intsaku trono san kachi tsa ndidaa tsa:
—¡Duꞌua na kuu! ¡Aleluya!
5 Danduu kaꞌan en sa kaꞌan sa io trono san kachi:
Kada kaꞌnu ñaꞌan xi ku Ndios ndo
ndidaa yoꞌo nu xinokuachi xi ia
xiꞌin ndidaa yoꞌo nu yuꞌu ñaꞌan xi ia,
duꞌua ni ñayii kunaꞌnu xiꞌin ñayii ti kunaꞌnu.
6 Tsaku d̶a sa kaꞌan kuenta kida sa kaꞌan kuaꞌa ntseꞌe ñayii, kuenta kida sa neꞌe ntseꞌe ndutsa, xiꞌin kuenta kida sa niꞌi ntseꞌe kaꞌan ñuꞌu, san kachi:
¡Aleluya, ku Toꞌo ndo Ndios ia tastuni ntseꞌe, tastuni ia!
7 Na ku-iꞌni ndo xiꞌin na ku-iꞌni ntseꞌe ndo san na kadakaꞌnu ndo Ndios,
kuan sa saa viko tandaꞌa Corderu,
san d̶eꞌe ia sa io listo ña.
8 Semani sa na kuiꞌno ña titsaa kuguaꞌa xiꞌin linu finu, io ndoo xiꞌin oni sandutsa;
kuan linu finu kuu ndidaa sa guaꞌa kida ndidaa ñayii nduu ii.
Viko tandaꞌa Corderu
9 San ángel kuaan kachi da:
—Chidotuni: “Guaꞌadiko ndidaa ñayii kana ñaꞌan xi sa kiꞌin ku kaj dini viko tandaꞌa Corderu.”
San kachi da tuku:
—Ndidaa toꞌon yaꞌa ku s-toꞌon Ndios san sa ndakuiti kuu.
10 Sakuixiti da san nontsayu da ntsa nuꞌu sa chiñuꞌu ñaꞌan da xi. San kachi da:
—Ñaꞌan, ma duꞌua kada yo; ntsuꞌu xinokuachi ntsu xiꞌin yo xiꞌin ndidaa ka xani yo nu xininchisa toꞌon káꞌan Jesús. Chiñuꞌu ñaꞌan xi Ndios.
Kuan toꞌon káꞌan Jesús kuu xanaaa profecía.
Sa kidanar ia yodo kiti kuixi
11 Danduu xini da sa nuna andivi kuaan, xini ni ña, xini da en kiti kuixi, ia yodo te nani: ia Xinokuachi Ndaa xiꞌin sa Ndaa, san xiꞌin sa ndaa, naa ia xiꞌin saꞌntsa ndaa ia kuachi. 12 Nduchinuu ia kuu kuenta xama ñuꞌu. D̶iki ia ñoꞌon kuaꞌa ntseꞌe diademab, san yodotuni sa nani ia sa ti en xini nasa nchu kachi kuan meni mee ia xini nasa nchukachi. 13 Niꞌno ia en doꞌno netuꞌu nekaa kaꞌyu niñi; san duꞌua nani ia: “S-toꞌon Ndios.” 14 Nchiko ñaꞌan ndidaa soldadu Ndios io andivi niꞌno tsa ndidaa tsa doꞌno linu finu ntseꞌe, kuixi xiꞌin ndo ntseꞌe kaa, yodo tsa kiti kuixi, san nchiko ñaꞌan tsa xi ia ñoꞌon diadema d̶iki xi. 15 San xuꞌu ia kee en machiti deen ntseꞌe, sa kaꞌni ia ñayii io ndidaa ñuu, san tastuni ñaꞌan ia xi ndidaa ñuu xiꞌin bastonc kaa, ia yaꞌa kuu ia xika niꞌno lagar sa ñoꞌon vinu sa kuu sa diko xi Ndios tastuni ntseꞌe. 16 San duꞌua yodotuni d̶oꞌno ia xiꞌin d̶aꞌnda ia: “Rey ndidaa Rey xiꞌin S-toꞌo ndidaa tsa toꞌo.”
17 Danduu xini da en ángel indodo ora, san niꞌi ntseꞌe kana, san sadaa xi ndidaa kiti ndagua andivi:
—Naꞌa ndidaa yo, nataka sa kaj dini yo ndidaa sa taxi Ndios, 18 kuan kaj yo x-koño rey, capitán, xiꞌin x-koño tsa ntsee xiꞌin x-koño kiti xiꞌin x-koño tsa yodo te xiꞌin x-koño ndidaa ñayii, esclavu xiꞌin ñayii ti kuu esclavu, ñayii kunaꞌnu xiꞌin ñayii ti kunaꞌnu.
19 Danduu xini da kitivii, xiꞌin ndidaa rey io nuꞌu ya xiꞌin ndidaa soldadu tsa, nataka tsa ndidaa tsa sa naa tsa xiꞌin ia yodo kiti, xiꞌin ndidaa soldadu ia. 20 San teen ñaꞌan xi kitivii kuaan, xiꞌin profeta naꞌntsa kuaan tsa kída sa naꞌnu jnu te sa kida sa kuaꞌa ntseꞌe ñayii dandaa te, ndidaa ñayii semani sa niꞌi s-tuni kitivii, xiꞌin chiñuꞌu ñayii x-imagen te. Duꞌua ni nchito tsa xiꞌin te dakana niꞌno ñaꞌan xi xiti laguna ñuꞌu sa xiko xiꞌin azufre. 21 San xiꞌin machiti kee xuꞌu ia yodo kiti saꞌni ia ndidaa ka ñayii, san ndidaa kiti ndagua nachitu ntseꞌe te saj s-te x-koño tsa ndidaa tsa.