Sa ndeꞌe Babilonia
18
Danduu xíni da enka ángel tastuni ntseꞌe noo andivi; sa sandutsa ángel yaꞌa dayeꞌe nuꞌu ya. 2 Niꞌi ntseꞌe kaꞌan:Ndeꞌe, ndeꞌe ñuu kunaꞌnu Babilonia, sa nduu xeꞌe ndidaa tachi ti io ndoo, xeꞌe ndidaa tachi kuiꞌia, xiꞌin s-taka ndidaa tidaa ti io ndoo, kiti ti taꞌan-ini ñaꞌan xi. 3 Kuan ndidaa nación xiꞌi vinu sa diko-ini ñaꞌan xan, sa kuu sa io ña xiꞌin ndidaa ñayii; san ndidaa rey io nuꞌu ya ío xiꞌin ña, san ndidaa ñayii diko io nuꞌu ya ku kuika sa saꞌa ndidaa sa kuiꞌia, kuan xu ndukuntsee ntseꞌe ña sa kada ña sa kuiꞌia ndasa na koo xan.
4 Danduu tsaku da enka tsa kaꞌan ntsa andivi san kachi:
—Tikee ñuu xan ndidaa yoꞌo nu kuu ku kiun ntsu, ndasa ma kuidokuachi yo x-kuachi xi, xiꞌin ndasa ma táꞌan yo ndidaa sa uꞌu táꞌan; 5 kuan ndidaa x-kuachi xi saa ntsaa andivi, san Ndios xíni ia ndidaa sa kuiꞌia kída. 6 Kuañaꞌan ndidaa yo xi ndidaa kuenta ni taxi xo, san uu tantu kuañaꞌan ndidaa yo kuenta guaꞌa kída; san copa kídaguaꞌa sa koꞌo yo, kada guaꞌa uu tantu xi mee. 7 Duꞌua ni kuenta ndukuntsee ña sa kada ña sa kuiꞌia ndasa na kadakaꞌnu ñaꞌan xan, duꞌua ni ndukuntsee sa kada sa na taꞌan ña xiꞌin na ndaꞌyu ña; kuan duꞌua xu kani-ini ña: “Ntsuꞌu kuu reina san kadi ni io ndi ku trono ndi, adi ña kee ku ndi, san nunka ma ndaꞌyu ndi.” 8 Juandiku endini kii kixi ndidaa sa uꞌu taꞌan ña: Sa kuu muerte, ndutsa nu xiꞌin doko. San dakayu ñaꞌan xan xiꞌin ñuꞌu, kuan Ndios ia kuu ku Toꞌo ndo kuu ia tastuni sa ndaka kuachi xan.
9 Ndidaa rey ío xiꞌin ña nuꞌu ya, tsa xu kada sa nchoj mee xiꞌin ña, ndaꞌyu tsa xiꞌin uꞌu ntseꞌe taꞌan tsa sa saꞌa ña, ora na kini tsa ñuꞌma kana sa xiko ña, 10 xika kuin tsa kuan yuꞌu tsa ndidaa sa taꞌa ña, san kachi tsa:
—¡Aay! ndaꞌvi yoꞌo, ñuu kunaꞌnu ntseꞌe nani Babilonia, ñuu ntsee ntseꞌe; kuan en guelta ni kíxi ndidaa sa uꞌu taꞌan yo.
11 Ndidaa ñayii diko io nuꞌu ya ndaꞌyu xiꞌi uꞌu ntseꞌe taꞌan sa saꞌa ña, kuan ti en ka seen sa diko tsa: 12 oro, plata, yuu vili xaꞌvi ntseꞌe xi, yuu vili nani perla, titsaa linu finu, titsaa kuu púrpuraa, titsaa ndiꞌvib, titsaa kuaꞌa niñi c, nadataꞌan nadatuꞌu yutu saꞌan tamid, nadataꞌan nadatuꞌu sa kuguaꞌa xiꞌin marfile, nadataꞌan nadatuꞌu sa kuguaꞌa xiꞌin yutu xaꞌvi ntseꞌe xi, sa ku guaꞌa xiꞌin cobre, sa kuguaꞌa xiꞌin kaa xiꞌin sa kuguaꞌa xiꞌin mármol, 13 xiꞌin canela, xiꞌin yuku tami, dusa, mirraf, olíbano, vinu, aceite, harina finu, trigu, ndidoꞌo, ndikachi, kiti, carreta xaꞌvi ntseꞌe xi, xiꞌin ñayii xu kuyaꞌvi kuenta esclavu. 14 Ndidaa sa xu taꞌan xanaag yo ti io ka yo, san ndidaa sa guaꞌa sa sandutsa io yo ti io ka yo san nunka ka ma niꞌi yo.
15 Ndidaa tsa xu diko ndidaa jaꞌa ku kuika tsa sa saꞌa xi, xika kuin tsa ntsaꞌa tsa kuan yuꞌu tsa sa ntseꞌe da taꞌan, san ndaꞌyu tsa xiꞌin uꞌu ntseꞌe taꞌan tsa, 16 san kachi tsa:
—¡Aay! ndaꞌvi, ñuu kunaꞌnu, niꞌno titsaa linu finu xiꞌin titsaa kuu púrpura xiꞌin titsaa kuaꞌa niñi, xiꞌin kukutu xiꞌin oro xiꞌin yuu xaꞌvi ntseꞌe xi xiꞌin yuu vili nani perlah, 17 kuan en guelta ni ndeꞌe ndidaa ndituꞌu sa kuika ío xi.
San ndidaa tsa dakaka barku, xiꞌin ndidaa tsa ñoꞌon barku, xiꞌin ndidaa tsa kidachiion xiti barku xiꞌin ndidaa tsa kidachiion mar xika in tsa ndidaa tsa 18 san kuenta xini tsa ñuꞌma kana sa kayu, kana tsa san kachi tsa:
—Nisa en ñuu ti ndútaꞌan xiꞌin ñuu kunaꞌnu yaꞌa.
19 Chído tsa ñuꞌu d̶ikii tsa, san ndaꞌyu tsa san ta-uꞌu tsa san kana tsa san kachi tsa:
—¡Aay! ¡Ndaꞌvi ñuu kunaꞌnu yaꞌa! kuan ndidaa ñayii io barku xi ku kuika sa saꞌa sa kuika io ñuu yaꞌa san en guelta ni kendoo mee ni ka, 20 yoꞌo andivi ku iꞌni sa taꞌan ñuu yaꞌa, san ndidaa yoꞌo nu nduu ii, xiꞌin x-apóstol Jesús, xiꞌin ndidaa profeta; kuan Ndios sa sañaꞌan ia xaꞌvi ndidaa nu kída ñaꞌan xo.
21 Danduu en ángel tastuni ntseꞌe teen en yuu, kuenta kaa yuu molinu kaa en yuu kaꞌnu ntseꞌe teen, san dakana niꞌno xiti mar, san kachi:
—Duꞌua ni dakana ñaꞌan xi Babilonia tuku kuenta dakana niꞌno ntsu yuu yaꞌa, ñuu kunaꞌnu, san ma naniꞌi ñaꞌan ka xi. 22 San ma tsaku ka sa kantsa arpa, nisa tsa xita, nisa tsa tivi flauta, nisa tsa tivi trompeta ma tsaku ka sa io yo Babilonia; san ñayii kídaguaꞌa nadataꞌan nadatuꞌu sa kídaguaꞌa ma naniꞌi ñaꞌan ka xi sa io yo, san nisa sa neꞌe sa nchiko molinu ma tsaku ka sa io yo, 23 nisa kandil ma dayeꞌe sa io yo, san nisa ma koo ka sa tandaꞌa ñayii san nisa s-tachi nuyee xiꞌin nudeꞌe tandaꞌa ma tsaku sa io yo; kuan ndidaa ñayii xu diko xu kunaꞌnu nee ñuyii; kuan sa saꞌa ña tata juandiku dandaa ñaꞌan yo xi ndidaa nacion. 24 San xiti ñuu yaꞌa naniꞌi niñi ndidaa profeta xiꞌin ndidaa ñayii nduu ii, xiꞌin ndidaa ñayii saꞌni ñaꞌan xi nuꞌu yaꞌa.