Sa taꞌan ñadeꞌe diko mee
17
Ndi usa ángel nundaꞌa en en copa kixi en ángel kuaan sa kachi d̶a:—Naꞌa jaꞌa, san na dadana ñaꞌan ntsu nasa taꞌan ña kaꞌnu diko mee intsaku ndodo sata kuaꞌa ntseꞌe ndutsa. 2 Ña ío xiꞌin ndidaa tsa tastuni, xiꞌin ndidaa ñayii io nuꞌu ya kuan naxini tsa kida vinu sa kuu ndidaa sa kuiꞌia kida ña sa io ña xiꞌin tsa.
3 Danduu ángel yukua ntsaka ñaꞌan xi x-espíritu da saꞌan ntsa desiertu; san xíni da en ñadeꞌe yodo ña en kitivii kuaꞌa, san nee te ntsaa sa nani sa kaꞌan kuiꞌia xi Ndios, san io usa d̶iki te xiꞌin uxi ndiki te. 4 Ñadeꞌe niꞌno ña doꞌno púrpura xiꞌin sa kuaꞌaa, san ndukutu ntseꞌe ña xiꞌin oro, yuu vili xaꞌvi ntseꞌe xiꞌin yuu vili nani perla, san nu ndaꞌa ña en copa oro, san ndidaa sa kuiꞌia kida ña xiꞌin ndidaa sa io ña xiꞌin ñayii (sa kuu sa chiñuꞌu ña idolo) ñoꞌon xiti copa nundaꞌa ña. 5 S-tsaan ña yodotuni: “Babilonia ñuu Kaꞌnu, ñuu kiꞌvi ndidaa Ñadeꞌe diko mee xiꞌin ndidaa sa Kuiꞌia kuu Idolatria kida ndidaa ñayii io Nuꞌu ya, san ti en xini nasa nchu kachi toꞌon yaꞌa.” 6 Xini da ñadeꞌe xini ntseꞌe ña kida niñi ndidaa ñayii ndu ii xiꞌin niñi ndidaa ñayii saꞌni ñaꞌan xi sa saꞌa sa kaꞌan ndaa s-toꞌon Jesús. San kuenta xini ñaꞌan da, kixi sa dayuꞌu ñaꞌan d̶a. 7 Doko ángel kachi da:
—Ma yuꞌu yo, ntsuꞌu na kachi toꞌon ntsu nasa nchukachi toꞌon ti en xini nasa nchu kachi sa kuu ñadeꞌe xiꞌin kitivii io usa d̶iki xi xiꞌin uxi ndiki xi. 8 Kitivii xini yo kuu̱, san ti kuu te, san sa io sa kana te numa sa kono naa niñu ndasa na kiꞌin te ndeꞌe te; san ndidaa ñayii io nuꞌu ya, ndidaa tsa ti yodotuni tutu natuu sa kuu tutu yodotuni ñayii koo ndidaa tiempu xiꞌin Ndios ntsa kuenta kesaꞌa ñuyii ndidaa tsa ti yodo xuꞌu ntseꞌe tsa ora na kini tsa ndidaa tsa kitivii kuu̱ san ti kuu te vita, doko ku kuu te.
9 Toꞌon yaꞌa kuu xi ñayii kutuni xi: Ndi usa diki te kuu usa tinduu, sa intsaku ndodo ña deꞌe kuaan, 10 Sa kuu usa rey. Oꞌon tsa sa ndeꞌe, en tsa io, san enka tsa vita kix ka; doko ora na kij s-tsa, nandeꞌe sa koo tsa en taꞌni tiempu. 11 Kitivii kuu̱ san ti kuu, kuu sa ku una, kee te sa io ndi usa rey san kuaꞌan te sa ndeꞌe te.
12 Ndi uxi ndiki xini yo kuu uxi rey vita niꞌi ka sa tastuni, doko niꞌi sa tastuni kuenta rey xiꞌin kitivii en ora ni. 13 Ndidaa jaꞌa endini modo sani-ini, sa na kuañaꞌan sa tastuni xiꞌin sa kunaꞌnu xi kitivii. 14 Naa xiꞌin Corderu, san Corderu kuaan kadanar ñaꞌan xi, kuan ia yaꞌa ku S-toꞌo ndidaa tsa toꞌo, xiꞌin j-Rey ndidaa rey; san ndidaa ñayii ku xaꞌan ia, nani tsa, tsa kana Ndios tsa ndekaxi ia xiꞌin ñayii ti nayuꞌu sa nchiko ñaꞌan xi ia.
15 Duꞌua kachi ángel kuaan d̶a tuku:
—Ñadeꞌe diko mee xini yo intsaku ndodo sata kuaꞌa ntseꞌe ndutsa, kuu ndidaa ñuu, kuaꞌa ntseꞌe ñayii, ndidaa nacion, xiꞌin ndidaa daꞌan. 16 San ndi uxi ndiki xini yo xi kitivii, ndidaa jaꞌa kini uꞌu ñaꞌan xi ñadeꞌe diko mee san kendoo ña mee ni ka ña xiꞌin kineꞌen nchala ñaꞌan xan; san kaxaꞌan xan, san dakayu ñaꞌan xan xiꞌin ñuꞌu; 17 kuan Ndios choꞌon ia xanaa xi sa na kada sa nchoxi mee ia: Sa na ndatoꞌon, san na kuañaꞌan sa tastuni xi kitivii, ntsa na xino taꞌan sa kachi Ndios. 18 Ñadeꞌe xini yo, kuu ñuu ku naꞌnu tastuni ñaꞌan xi ndidaa rey io ñuyii yaꞌa.