Chintsayu ndidaa copa ñoꞌon sa diko xi Ndios
16
Tsaku d̶a en tsa kaꞌan niꞌi ntseꞌe ntsa xiti s-templu Ndios xi ndi usa ángel kuaan:—Kuaꞌan ndidaa yo san chintsayu sata nuꞌu sa diko ini Ndios ñoꞌon ndi usa copa.
2 Saꞌan diꞌna nu ángel chintsayu sa ñoꞌon copa kuaan sata nuꞌu, san kana ñayii choꞌon kuiꞌia san ndaꞌvi ntseꞌe saꞌan ndidaa ñayii neꞌe marca kitivii xiꞌin ndidaa ñayii chiñuꞌu x-imagen te.
3 Danduu ángel ku uu chintsayu sa ñoꞌon x-copa xi xiti mar, san ndutsa kuaan ndu niñi kuenta j-niñi ndii. San xiꞌi ndidaa kiti nchito io xiti mar.
4 Danduu ángel ku uni chintsayu x-copa xi xiti ndidaa yutsa xiꞌin ndidaa sa kana ndutsa, san ndidaa ndutsa nduu niñi. 5 San tsaku d̶a sa kachi x-ángel ndidaa ndutsa kuaan:
—Mee ni kuu ia io ndaa Toꞌo, ia kuu, ia kuu̱, ia ii, kuan sa ndakakuachi ni xi ndidaa jaꞌa. 6 Kuan ndidaa tsa yaꞌa kineꞌen tsa jniñi ndidaa ñayii nduu ii xiꞌin jniñi ndidaa x-profeta ni, juandiku dini sañaꞌan ni níñi sa na koꞌo tsa ndidaa tsa tuku; kuan duꞌua na ndeꞌe sa taꞌan tsa.
7 Danduu tsaku da sa kaꞌan enka ntsaa sa io altar:
—¡Sa ndaa ku nchisa, Toꞌo Ndios tastuni ntseꞌe ndidaa sa io, ndidaa sa ndakakuachi ni ku sa ndaa xiꞌin sa ndaa!
8 Danduu ángel ku kumi chintsayu x-copa xi sata ora, san semani sa ora na dakayu ñaꞌan xiꞌin ñuꞌu xi ñayii. 9 Ndidaa ñayii kayu xiꞌin sa iꞌni ntseꞌe, kaꞌan kuiꞌia xi Ndios xiꞌin sa kuu ia, ia tastuni ndidaa sa io nuꞌu ya, san ti en nata-uꞌu sa kadakaꞌnu ñaꞌan xi ia.
10 Danduu ángel ku oꞌon chintsayu x-copa xi sata s-trono kitivii, san ndidaa ami tastuni te nduu naa nduu niñu, san oni saj ndodo ñayii xaa ñayii sa uꞌu, 11 Kaꞌan kuiꞌia tsa xi Ndios andivi sa saꞌa sa uꞌu s-tsa xiꞌin sa saꞌa choꞌon kana tsa, doko nisa duꞌua ti nayuꞌu tsa ndidaa tsa sa kida tsa sa kuiꞌia.
12 Danduu ángel ku iñu chintsayu x-copa xi xiti yutsa kaꞌnu Eufrates, san yichi ndutsa xi ndasa na kan en ichi sa na yaꞌia ndidaa rey io ichi kana ora.
13 Ora yukua xini da sa xuꞌu koo xiꞌin xuꞌu kitivii xiꞌin xuꞌu profetaa naꞌntsa kee uni tachi kuiꞌia san kuenta kaa ndikalaꞌua kaa. 14 Kuu tachi kuiꞌia, san kida señal, san kuaꞌan sa io ndidaa rey io nee ñuyii, ndasa na dataka ñaꞌan sa naa x-kii kaꞌnu Ndios ia tastuni ndidaa sa io. 15 “Xini yo ña, sa tuꞌu ni ndij ntsu kuenta kida ñaduꞌu. Guaꞌa kuxi ñayii yeꞌe diki xi, xiꞌin io listo doꞌno xi, ndasa ma kee nchala san kukaꞌan jnu xi sa kini ñayii sa io nchala.” 16 Nadataka ñaꞌan xi ndidaa rey xiꞌin ndidaa soldadu tsa en lugar nani Armagedón kuan duꞌua nani xi ñayii kaꞌan daꞌan hebreu.
17 Danduu ángel ku usa chintsayu x-copa xi ichi jnu tachi. San niꞌi ntseꞌe kaꞌan en tsa kaꞌan xiti s-templu Ndios sa io andivi, xiꞌin s-trono ia, san kachi:
—Sa tuꞌu.
18 Danduu kesaꞌa sa ndutsa, xiꞌin kuaꞌa ntseꞌe sa tsaku xiꞌin neꞌe ntseꞌe kaꞌan ñuꞌu, san niꞌi ntseꞌe kanda kuenta ti on kanda ntsa kuenta io ñayii ñuyii. 19 San ñuu kunaꞌnu taꞌantsa uni pedasu, sa xuun ndidaa nacion ndugua. San Ndios xíni ia Babilonia ñuu kaꞌnu, ndasa na kuañaꞌan ia copa vinu sa ñoꞌon sa diko-ini ia. 20 Ndidaa isla xino, san ndidaa tinduu ti xini ñaꞌan ka xi. 21 Koon ñiñi naꞌnu ntseꞌe sa io ndidaa ñayii sa kuenta uvidikob kilo vee ndiden en. San ndidaa ñayii kaꞌan kuiꞌia xi Ndios sa saꞌa ñiñi, kuan kaꞌnu ntseꞌe en sa uꞌu kuu.