En cientu xiꞌin ubi diko kumi mil ñayii xita
14
Danduu ntsaꞌa da, san xini ni ña, xini da Corderu indodo te sata tinduu nani Sion, san in te xiꞌin en cientu xiꞌin ubi diko kumi mil ñayii, kantsaa s-tsaan xi sa nani te xiꞌin sa nani s-Tata te. 2 Danduu tsaku da en tsa kaꞌan ntsa andivi kuenta kida sa neꞌe ntseꞌe ndutsa san s-tachi xi kuenta kida sa niꞌi ntseꞌe kaꞌan ñuꞌu; san tachi tsaku da kuu kuenta kuaꞌa ntseꞌe ñayii dakantsa x-arpa xi. 3 San ndidaa ñayii in xiꞌin Corderu xita tsa en katu saa jnu sa intsaku ndodo ia tastuni xiꞌin jnu ndi kumi sa nchito xiꞌin jnu ndidaa tsa savaꞌa. Nisa en ñayii ti kachi ku tuꞌua kantu yaꞌa, maska sa en cientu xiꞌin uvidiko kumi mil ñayii chaꞌvi Corderu sa saꞌa xi sa io ndidaa ñayii ndidaa ni ñayii yaꞌa kuu kutuꞌua kantu yaꞌa. 4 Ndidaa tsa yaꞌa kuu tsa io ndoo jnu Ndios kuan ti ñotaꞌan tsa nisa en ñadeꞌea. San ndidaa tsa yaꞌa kuu tsa nchiko ñaꞌan xi Corderu ami saꞌan mee ia. Ndidaa tsa yaꞌa kuu tsa chaꞌvi ia sa saꞌa xi, sa io ndidaa ñayii ndasa na ku kuu tsa sa diꞌna nuu xi Ndios xiꞌin sa kuxi Corderu. 5 Xuꞌu tsa ti xu kee sa naꞌntsa; kuan ti ío x-kuachi tsa jnu s-trono Ndios.Toꞌon káꞌan ndi uni ángel
6 Xini da enka ángel ndagua dagua dagua andivi, sa neꞌe toꞌon guaꞌa ma ndeꞌe sa kaꞌan xi ndidaa ñayii io nuꞌu ya, ndidaa nacion xiꞌin raza xiꞌin nadataꞌan nadatuꞌu daꞌan xiꞌin ñuu. 7 Niꞌi ntseꞌe kana:
—Ndidaa yoꞌo ñayii, yuꞌu ñaꞌan xi Ndios san kadakaꞌnu ñaꞌan xi ia, kuan vita sa kesaꞌa ora sa ndaka kuachi ia; san kadakaꞌnu ñaꞌan xi ia kídaguaꞌa andivi xiꞌin nuꞌu, mar xiꞌin sa kana ndidaa ndutsa.
8 Danduu nchiko ñaꞌan ángel ku uu, san kachi:
—Ndeꞌe, ndeꞌe Babilonia sa kuu ñuu kunaꞌnu, kuan ndidaa ñayii naxini xiꞌin ndidaa sa kuiꞌia kída sa kuu sa io xiꞌin ndidaa ñayii, xiꞌin nadataꞌan nadatuꞌu ka sa kuiꞌia xu kada.
9 Ángel ku uni nchiko ñaꞌan san niꞌi ntseꞌe kana:
—Tu andu na chiñuꞌu ñaꞌan xi kitivii xiꞌin x-imagen te, adi na kuemani sa na chituni ñaꞌan xi ndaꞌa xi adi s-tsaan ñayii, 10 ñayii yaꞌa koꞌo vinu sa diko-ini Ndios, sa kuu menina ñoꞌon x-copa ia, san kada ñaꞌan ntseꞌe xi xiti ñuꞌu xiꞌin azufre jnu Corderu xiꞌin ndidaa x-ángel ia sa kuu sa ii; 11 ñuꞌma kana sa kida ñaꞌan xi ndidaa ñayii yaꞌa kana ndidaa tiempu. Nisa nduu san nisa niñu ti saꞌan sa taꞌan ndidaa ñayii na chiñuꞌu ñaꞌan xi kitivii xiꞌin x-imagen te xiꞌin ñayii na teen tuni sa nani te. 12 Ora duꞌua na taꞌan ora yukua nandeꞌe sa kuyakui ndidaa ñayii ndada ii Ndios, ñayii kida sa taꞌvichiion ia, ñayii xininchisa ñaꞌan xi Jesús.
13 Tsaku d̶a sa kaꞌan en tsa kaꞌan ntsa andivi kuan d̶a san kachi:
—Chidotuni jaꞌa: “Guaꞌadiko ñayii na kuu ntsa vita san xininchisa ñaꞌan xi ia kuu ku Toꞌo ndo.” Jon, kachi Espíritu, ndexavi nu sa kidachiion nu; san ndidaa sa kída nu kaꞌan na ñayii kuu nu.
Ndi uni ángel nakeꞌen ñuyii
14 Ntsáꞌa da, ¿san xini ni ña? xíni da en viko kuixi, intsaku ndodo en tsa ndee ia nduu ñayii ñuyii yaꞌa. Ñoꞌon en corona oro d̶iki ia, san nundaꞌa ia en yuchitrigu deen ntseꞌe. 15 San xiti s-templu Ndios kee en ángel san niꞌi ntseꞌe kana xi ia intsaku ndodo viko kuan:
—Chiꞌi ni xuchitrigu ni xan san kaꞌntsa ni. Kuan saa ora sa nakeꞌen tata, kuan tata io nuꞌu xan sa yíchi.
16 Danduu ia intsaku ndodo viko kuan chiꞌi ia yuchitrigu sata nuꞌu ya, san saꞌntsa ia sa io.
17 Kee enka ángel s-templu Ndios sa io andivi, san nundaꞌa enka yuchitrigu deen ntseꞌe.
18 Xiti altar kee enka ángel sa tastuni ñuꞌú, san niꞌi ntseꞌe kana xi ángel neꞌe yuchitrigu deen ntseꞌe, san sadaa:
—Chiꞌi yuchitrigu deen yo xan san kaꞌntsa racimu tichiꞌio sa kuu ñayii io nuꞌu, kuan sa xíchi.