Ubi tsa kaꞌan ndaa
11
Danduu taxi en vara d̶a, kuenta ka en vara sa tekuꞌua ndo, san kachi d̶a:—Ndukuin san tekuꞌua s-templu Ndios xiꞌin x-altar ia xiꞌin ndidaa ñayii chiñuꞌu ñaꞌan io juan. 2 Doko ndikeꞌe templu kuan dandoo san ma tekuꞌua yo, kuan sañaꞌan xi ndidaa ñayii ti kuu ñuu Israel, san nuyaꞌa kakaniꞌino nu uvidiko uu yoo ñuu ii. 3 Ntsuꞌu tsandaꞌa ntsu ubi tsa kaꞌan ndaa, san tsa yaꞌa kada profetizar tsa en mil xiꞌin ubi cientu xiꞌin uni diko kii, san kuiꞌno tsa doꞌno ton.a
4 Tsa kaꞌan ndaa yaꞌa kuu nduu olivo xiꞌin nduu kantilerub in jnu Ndios ia tastuni ñuyii. 5 Tu andu nchu kada ñaꞌan s-tsa dandu ñuꞌu kee yuꞌu tsa dakayu ñaꞌan xi ñayii xini-uꞌu ñaꞌan s-tsa. San kuenta sani ini ñayii sa kuj s-tsa, duꞌua ndeꞌe mee ñayii. 6 Ndu tsa yaꞌa io sa tastuni tsa sa kada tsa sa ma koon davi ndidaa kii kada profetizar tsa; san niꞌi tsa sa tastuni tsa sa ndada tsa ndutsa kuaan niñi, xiꞌin sa kada tsa sa na taꞌan ntseꞌe ndidaa ñayii io ñuyii ya xiꞌin nadataꞌan nadatuꞌu sa uꞌu, ndidaa guelta nchoj mee tsa nduu tsa. 7 Ora natuꞌu kaꞌan tsa ndaataꞌvi chiion Ndios sa na kaꞌan, san kitivii kana xiti numa sa naa niñu naa te xiꞌin tsa sa kadanar ñaꞌan te xiꞌin kaꞌni ñaꞌan te s-tsa nduu tsa. 8 Danduu xikikoño tsa katuu ichi kaꞌnu ñuu kaꞌnu sa kuu kuenta Sodoma xiꞌin Egiptoc, ami satakaa ñaꞌan cruz xi s-Toꞌo tsa ndidaa tsa. 9 Uu ñayii ñuu, tribu, daꞌan xiꞌin nacion kini yikikoño tsa nduu tsa uni yodo kii, san ma en kachi sa yinduj s-tsa nduu tsa. 10 Ndidaa ñayii io nuꞌu ya ku iꞌni ntseꞌe sa xiꞌi nduu tsa yaꞌa. San kuaꞌa taꞌan tsa regalu ndidaa tsa, kuan ndidaa ñayii yaꞌa xu taꞌan ntseꞌe sa saꞌa ndidaa sa xu kada nduu tsa yaꞌa.
11 Yaꞌia uniyodo kii san Ndios tsandaꞌa ia espíritu sa na kuañaꞌan nituku ñuyii s-tsa nduu tsa, san ndukuin tsa nduu tsa, San yuꞌu ntseꞌe ndidaa ñayii xini ñaꞌan s-tsa. 12 Tsa yaꞌa nduu tsa tsaku s-tsa en tsa kaꞌan niꞌi ntseꞌe ntsa andivi, san sadaa:
—Kundaa ichaꞌa.
San kundaa tsa nduu tsa andivi sata en viko; San ndidaa ñayii xini uꞌu ñaꞌan s-tsa xini ñaꞌan. 13 Ora yukua niꞌi ntseꞌe nika kanda, san en dicimo ñuu yukua ndugua. Sa saꞌa xi sa kanda xiꞌi usa mil ñayii, dagua ka ñayii yuꞌu ntseꞌe san kidakaꞌnu ñayii Ndios io andivi.
14 Aayd ku uu sa yaꞌia. San xini ni ña sa io vii sa kixi ay ku uni.
Trompeta ku usa
15 Ángel ku usa tivi trompeta. San andivi tsaku kuaꞌa ntseꞌe tachi san niꞌi ntseꞌe káꞌan, san kachi ndidaa:
Ndidaa sa tastuni io ñuyii ya kunayii ndaꞌa ia kuu ku Toꞌo ndo
xiꞌin Cristu ia ndekaxi iae;
san tastuni ia ndidaa tiempu.
16 Ndi oko kumi tsa savaꞌa intsaku ndodo ndidaa trono ío jnu Ndios, sa kuinxiti tsa, san nontsayu tsa ntsa nuꞌu san chiñuꞌu tsa Ndios, 17 san kachi tsa:
Taj da taxaꞌvi ni Ndios ia tastuni ntseꞌe,
kuan kuu ni xiꞌin kuu̱ ni xiꞌin ku kuu ni,
kuan ndaꞌa ni yeꞌe ndidaa sa tastuni
san sa tastuni ni
sa io sa kesaꞌa.
18 Nadiko xi ndidaa nacion,
doko sa diko-ini ni sa saa,
san ndakakuachi ni xi ndidaa ndii
xiꞌin sa kuañaꞌan ni sa guaꞌa xi ndidaa x-profeta ni tsa xinokuachi ni,
xiꞌin ndidaa ñayii ndada ii ni
san yuꞌu ñaꞌan ni, ñayii ku naꞌnu xiꞌin ñayii ti kunaꞌnu,
xiꞌin sa kaꞌni ni ndidaa ñayii dativi ñuyii ya.
19 Danduu nakaan s-templu Ndios andivi, sa oni tuu arca s-tratu ia xiti xi. Sandutsa ntseꞌe, kuaꞌa ntseꞌe sa tsaku, kaꞌan ñuꞌu, niꞌi ntseꞌe kanda xiꞌin koon ñiñi naꞌnu ntseꞌe.