Trompeta ku oꞌon
9
Ángel ku oꞌon kuaan tivi trompeta. San xini da en chodini andivi kikagua nuꞌu, san sañaꞌan ndakaa numa sa kono naa niñu xi. 2 San nakaan chodini kuaan numa sa kono naa niñu, san kana ñuꞌma sa kono kuaan kuenta en xitu; san ora kuaan ndunaa xiꞌin tachi kida ñuꞌma kana sa kono kuaan. 3 San xiti ñuꞌma kee langosta san xitsaniꞌno te nuꞌu ya, san niꞌi te sa kada te kuenta ndiduꞌma. 4 San taꞌvichiion ste sa ma kada dañu te xi kuꞌu kuii io nuꞌu ya, nisa ndidaa ka yukukuii io, nisa en yutu, maska sa ndidaa ni ñayii ti kantsaa sellu Ndios s-tsaan xi. 5 San táꞌvichiion ste sa ma kaꞌni ñaꞌan, maska sa oꞌon yoo na kada ñaꞌan ntseꞌe te xi ndidaa ñayii; san taꞌan ntseꞌe ñayii kuenta taꞌan ñayii ora tuu ñaꞌan ndiduꞌma xi. 6 San ndidaa kii yukua ndidaa ñayii nduku sa kuu, doko ma kada. Nchu kuu ndidaa ñayii, doko muerte kuaan kono xi ñayii.7 San ndidaa langosta kuaan kaa te kuenta kiti sa io sa kiꞌin guerra; d̶iki te ñoꞌon en sa kuenta kaa corona oro, san kuenta kaa jnu ñayii kaa jnu te; 8 san kuenta kaa xidi ñadeꞌe kaa xidi te, san jnuꞌu te kuenta ka jnuꞌu ndikaꞌa kaa. 9 Niꞌno te en doꞌno kaa sa tavi nchika te xiꞌin sata te. San nchixi te neꞌe kuenta kida karru ñuꞌu kuaꞌa ntseꞌe kiti kuaꞌan guerra. 10 D̶uꞌma te kuenta kaa d̶uꞌma ndiduꞌma kaa, xiꞌin io xakua te tuku; San d̶uꞌma te niꞌi sa kada te ñayii sa oꞌon yoo kida te sa taꞌan ntseꞌe ñayii. 11 Ntsakañaꞌa en rey ste, ángel sa tastuni numa sa kono naa niñu, san daꞌan hebreu nani Abadón, san daꞌan griegu nani Apolión.a
12 Diꞌnanuu aayb kachi ángel sa yaꞌia. San xini ni ña vaxi ka ubi ay.
Trompeta ku iñu
13 San tivi ángel ku iñu kuaan trompeta. San tsaku d̶a en tsa kaꞌan xiti ndi kumi ndiki io ndiden en s-kina altar oro san in jnu Ndios, 14 san sadaa xi ángel ku iñu nu ndaꞌa trompeta:
—Dandatsa ndi kumi ángel yiten jnu yutsa kaꞌnu nani Eufrates.
15 San nayaa ndi kumi ángel ntsatu ora xiꞌin kii xiꞌin yoo xiꞌin kuia, ndasa nakaꞌni en terciu ndidaa ñayii io. 16 Ndidaa ejercito yodo kiti kuu: Ubi cientu millon. Duꞌua tsaku d̶a sa kachi sa kuu tsa.
17 San duꞌua nanuu ndidaa kiti xiꞌin ndidaa tsa yodo te sa xini da sa nanuu jnu da, ndidaa tsa niꞌno doꞌno kaa kuaꞌa tavi nchika tsa xiꞌin sata tsa san kaa kuenta kaa ñuꞌu, zafiro xiꞌin azufrec. San d̶iki ndidaa x-kiti tsa kuaan kaa kuenta kaa d̶iki ndikaꞌa kaa; san yuꞌu te kee ñuꞌu, ñuꞌma xiꞌin azufre. 18 San en terciu ndidaa ñayii xiꞌi sa saꞌa ndi uni sa kida uꞌu xi ñayii: sa kuu ñuꞌu, ñuꞌma xiꞌin azufre kee xuꞌu kiti kuaan. 19 Kuan niꞌi te sa kada ñaꞌan te xiꞌin xuꞌu te xiꞌin d̶uꞌma te. Kuan d̶uꞌma te kuenta ka koo kaa, san io d̶iki xi san xiꞌin d̶iki xi kuaan da takueꞌe ñaꞌan te.
20 San ndidaa ka ñayii ti xiꞌi xiꞌin sa uꞌu yaꞌa ti nata-uꞌu sa saꞌa ndidaa sa kuiꞌi kida, sa ti dandoo ñayii sa chiñuꞌu ndidaa tachi kuiꞌia nisa sa chiñuꞌu ñayii idolo sa kuguaꞌa xiꞌin oro, plata xiꞌin bronce, sa kuguaꞌa xiꞌin yuu adi xiꞌin yutu, sa ti tuu jnu xi, ti tsaku xi xiꞌin ti kachi kaka; 21 San ti nata-uꞌu ñayii sa saꞌni ñayii ndii, san nisa sakida tata ñayii, san nisa ñayii io xiꞌin ñayii ti tandaꞌa xiꞌin, nisa sa duꞌu ñayii.