4
Jnu Ndios xiꞌin Jesucristu, ia ndakakuachi xi ñayii nchito xiꞌin ñayii xiꞌi ora na ndixi ia xiꞌin sa tastuni ia, xika ntsu xo: 2 sa na kaꞌan yo s-toꞌon ia; kaꞌan ndidaa ndituꞌu tiempu tu nchu kunini ñayii ña ñaꞌan; ndada ndaa ñaꞌan, nduden, san vii ni vii ni kadaa xi ñayii san guaꞌa guaꞌa dakuaꞌa ñaꞌan. 3 Kuan kixi kii sa ma en ka nchu kunini s-toꞌon guaꞌa Ndios; san nduku tsa ndidaa tsa maestru na dakuaꞌa ñaꞌa sta sa nchu kunini mee tsa ndidaa tsa san ma nchu kunini ka tsa sa ndaa, 4 san menika kuentu kunini tsa san ma kunini ka tsa sa ndaa. 5 Doko yoꞌo, guaꞌa kani-ini; kuyakui ndidaa sa taꞌan yo; san kaꞌan toꞌon guaꞌa ya, kada chiion taꞌvi xo.6 Kuan sa io sa kaꞌni ñaꞌan ku ntsu san sa kuyachi kii ndeꞌe ntsu. 7 Ntsuꞌu sa náa ntsu batalla guaꞌa yaꞌa, san sa tuꞌu xino ntsu; san ti dandoo ntsu sa xininchisa ntsu. 8 San vita ntsatu sa niꞌi ntsu corona sa kuu sa ndaa, sa taxi ia kuu ku Toꞌo ndo ia kuu Juez ndaa taxi ia kii yukua. San adi ni ntsuꞌu niꞌi, ndidaa ñayii ntsatu vii sa ndixi ia niꞌi tuku.
Toꞌon sadaa Pablo xi Timoteu
9 Koto kij ni yo kikotoñaꞌan yo ku ntsu. 10 Kuan Demas dandoo ñaꞌan tsa kuntsu, kuan nchój ntseꞌe ka tsa sa io ñuyii yaꞌa, sa kuaꞌan tsa Tesalónica. Crescente kuaꞌan tsa Galacia san Tito kuaꞌan nu Dalmacia. 11 Lucas nika ya io xiꞌin ntsu. Kuntsaka Marcos xan naꞌa, kuan nandeꞌe tsa sa chintsee ñaꞌan tsa ku ntsu chiion yaꞌa. 12 Tíquico tsandaꞌa ntsu Éfeso. 13 Ora nakij xo san kuneꞌe doꞌno dandoo ntsu Troas xeꞌe Carpo xiꞌin ndidaa ku tutu ntsu kuaan, doko sa nandeꞌe ntseꞌe ka sa kuneꞌe yo kixi kuu ndidaa ñee yodotuni tuniꞌnoa dandoo ntsu.
14 Alejandru tsa ku erreru ntseꞌe kuiꞌia kída tsa ku ntsu. Doko ia kuu ku Toꞌo ndo na kuañaꞌan xaꞌvi tsa sa saꞌa ndidaa sa kuiꞌia kída tsa ku ntsu. 15 Guaꞌa yo, kuan tsa yaꞌa kuu tsa ti nchoxi nisa dana toꞌon kaꞌan ntsu.
16 Kuan diꞌnanuu sa natavi ntsu mee ntsu ti en natavi ñaꞌan ku ntsu. Ndidaa tsa dandoo ñaꞌan ku ntsu. doko Ndios na koo ia sa kaꞌnu-ini sa saꞌa sa dandoo ñaꞌa tsa ndidaa tsa ku ntsu. 17 Doko ia kuu ku Toꞌo ndo ku ia ío xiꞌin ntsu san kida ntsee ia ku kuanaa ntsu ndasa naxino sa kachi ia sa na tsaku xi ndidaa ñayii ti kuu ñuu Israel toꞌon kida sa nanitaꞌvi. San duꞌua kineꞌen ñaꞌan ia ku ntsu ndaꞌa ndidaa ñayii den ntseꞌe kuenta den ndikaꞌa. 18 Ia kuu ku Toꞌo ndo na chintsee ñaꞌan ia kuntsu sa io ndidaa sa kuiꞌia xiꞌin na kada kuidadu ñaꞌan ia ntsa nasaa ntsu sa tastuni ia andivi, ia yaꞌa na kukaꞌnu na kuduku ndikii. Duꞌua na kuu.
Kada ntse-ini yo
19 Kadaa sa kachi ntsu sa na kada ntse-ini xi Priscila xiꞌin Aquila, xiꞌin ndidaa ñayii io xeꞌe Onesíforo. 20 Erasto kendoo tsa Corinto san Trófimo kuꞌu s-tsa kendoo tsa Mileto. 21 Kij ni yo antika sa taꞌan sa vixi. Eubulo, Pudente, Linu, Claudia ya xiꞌin ndidaa ku kiani ndo io jaꞌa kachi tsa sa na kada ntse-ini xo.
22 Ku Toꞌo ndo Jesucristu na koo xiꞌin x-espíritu yo. San j-gracia Ndios na koo xo ndidaa yo. Duꞌua na kuu.