Ndidaa kii vaxi duꞌua nduu ndidaa ñayii
3
Nandeꞌe sa kini yo ndidaa jaꞌa: Sa ndidaa kii ultimo vixi ntseꞌe koo. 2 Kuan koo ñayii nduku sa kuxi mee, ñayii nchoj ntsaa tuini, ñayii iꞌni, ñayii nchu kunaꞌnu, ñayii kaꞌan kuiꞌia xi Ndios, ñayii ma kueniꞌno ñaꞌan ka xi s-tadeꞌe xi, ñayii ingratu, ñayii ti xininchisa ñaꞌan xi Ndios, 3 ñayii ti neꞌe sa ndaa-ini, ñayii ti sakoo sakaꞌnui-ni sa kida ñayii xi, ñayii kaꞌan jaꞌa jukua sa ti kuu enka ñayii, ñayii ti naten sa kida, ñayii kuiꞌia, ñayii xini uꞌu ñaꞌan xi ñayii guaꞌa, 4 ñayii diko taꞌan, ñayii sa-ini, ñayii chuu, ñayii nchoxi sa kuxi mee san adi sa nchoxi Ndios. 5 Dandenaꞌa tsa sa kuu tsa ñayii xininchisa ñaꞌan xi Ndios, doko xiꞌin modo kuu tsa kini sa adii sa ndaa kuu.Ndidaa ñayii yaꞌa ma kutaꞌan yo. 6 Kuan ndidaa tsa yaꞌa kuu tsa yii veꞌe san dandaa tsa ndidaa ñadeꞌe diꞌntsa, ña io ntseꞌe x-kuachi xi, san ti kachi tastuni ña xikikoño ña, 7 ndidaa ña yaꞌa ndikii tuku tuku sa kutuꞌua ña doko ti tediki ña sa ndaa. 8 Kuenta Janes xiꞌin Jambres na kaꞌnu tsa Moisés, duꞌua kida tsa yaꞌa ndidaa tsa tuku na kaꞌnu tsa sa ndaa. Tsa sani-ini meni sa kuiꞌia, san sa xininchisa tsa adi sa ndaa kuu. 9 Doko ma saa xika tsa, kuan nee ñuyii kini sa kuu tsa en tsa chuu, kuenta taꞌan nduu tsa ti xíninchisa ñaꞌan xi Moisés.
10 Doko yoꞌo xini guaꞌa yo nasa dakuaꞌa ñaꞌan ntsu xiꞌin modo io ntsu, xiꞌin nasa nchoj ntsu sa na ku kuu, xini guaꞌa yo na modo xininchisa ntsu, xiꞌin sa kaꞌnu ku kuanaa ntsu, sa xinimani ntsu xiꞌin sa kuyakui ntsu, 11 kuan xini mee yo sa xíkoñaꞌa xiꞌin táꞌan ntseꞌe ntsu ñuu Antioquía, ñuu Iconio xiꞌin ñuu Listra san kuani daa táꞌan ntseꞌe ntsu doko ia kuu ku Toꞌo ndo chíntsee ñaꞌan ia ku ntsu. 12 Kuan ndidaa ñayii nchu kininchisa ñaꞌan xi Jesucristu kuiko ñaꞌan xi ñayii. 13 Doko ndidaa ñayii kuiꞌia xiꞌin ñayii dandaa ñaꞌan lugar sa na ndundaa tsa, san duꞌua ka kuita tsa, dandaa ñaꞌan tsa, san dandaa ñaꞌan s-tsa.
14 Doko yoꞌo ma dandoo yo sa kutuꞌua yo xiꞌin sa xininchisa yo, kuan xini yo andu dákuaꞌa ñaꞌan xo; 15 kuan ntsa yiki yo xini yo toꞌon ii, san jaꞌa kada sa kutuni xo sa nanitaꞌvi yo, sa saꞌa sa xininchisa yo Jesucristu. 16 Kuan ndidaa s-toꞌon ii Ndios yodotuni, mee ia káꞌan, san guaꞌa sa dakuaꞌa ñaꞌan, sa nduden, sa na kani ñaꞌan ndaa xiꞌin dadana ñaꞌan ndasa na kada ñayii sa ndaa, 17 san duꞌua ñayii xininchisa ñaꞌan xi Ndios na ku kuu tsa en ñayii ndaa, ndasa na kada tsa ndidaa sa guaꞌa nchoxi ia.