En bendición kuu xuyii Pablo
12
Atuu dana sa niꞌi da sa kaꞌan guaꞌa da xi mee da. Doko nandeꞌe sa kada da. San vita na kaꞌan da sa nanuu jnu da, xiꞌin sa kída Jesucristu sa na kukuituni xanaa da. 2 Xini da en tsayee xininchisa ñaꞌa xi Jesucristu, san sa yaꞌia uxi kumi kuiꞌia ntsaka ñaꞌa sta saꞌan ntsa andivi ku uni san ti xini da tu xiꞌin xikikoño tsa ña meni x-espíritu tsa, dan ti xini da meni Ndios kuu ia xini. 3 San dan xiniñaꞌa da xi tsayee yukua, doko ti xini da tu xiꞌin xikikoño tsa saꞌan tsa ña meni x-espíritu tsa doko meni Ndios kuu ia xini, 4 sa xini da kuu sa ntsaka ñaꞌan sta saꞌan ntsa sa io Ndios, san juan tsaku sta toꞌon sa meni Ndios naꞌa sa ti en nitaꞌvi sa kaꞌan. 5 Dan ma ku iꞌni da sa saꞌa mee da maska sa saꞌa tsayee yaꞌa. Sa kuu iꞌni da kuu sa ti yakui da. 6 San kuani nchukada kaꞌnu da mee da xiꞌin ndidaa jaꞌa, adi sa kuiꞌia kuu, kuan sa ndaa kuu nchisa, doko ma duꞌua kada da, ndasa ma en kani-ini sa kaꞌnu ka da sa kuxi sa danaꞌa da adi sa kaa da.7 Ndasa ma ku-iꞌni da xiꞌin sa nanuu jnu da, Ndios semani ia sa sakakuiꞌia na tsandaꞌa en ndaꞌa saꞌa xi, sa na kada sa na ta-uꞌu da, san kuu na en iñu kini niꞌno xikikoño da, ndasa ma ku iꞌni da. 8 San sa saꞌa xi jaꞌa, xíka da uni guelta xi Ndios sa na dita ia iñu yaꞌa; 9 san kachi ia: Ku gracia ntsu kuu ndidaa sa nandeꞌe xo, kuan sa tastuni ntsu danaꞌa ntseꞌe ka ora ti yakui yo. Juandiku guaꞌa ka ku-iꞌni da ora ti yakui da ndasa na danaꞌa sa io d̶a sa tastuni taxi Jesucristu. 10 Sa saꞌa sa xinimani da Jesucristu, ku-iꞌni da sa ti yakui da, ku-iꞌni da sa kaꞌan kuiꞌia ñayii d̶a, ku-iꞌni da sa ti io ndidaa sa nandeꞌe d̶a, xiꞌin sa xiko ñaꞌan ñayii d̶a, xiꞌin sa ndaꞌvi ntseꞌe sakoo xanaa da. Kuan xini da sa ora ti yakui da, ora yukua ndu ntsee ntseꞌe da.
11 Kaꞌan da kuenta en tsa ndukueꞌe xiꞌin ndidaa sa nchu ku-iꞌni da, doko dini ndidaa ni kida sa duꞌua na kada da. Kuan dini ndidaa ni kuu sa nandeꞌe sa kaꞌan guaꞌa d̶a, kuan ti luchi ka kuu da sa kuxi ndidaa tsa kaꞌan sa kuu apóstol naꞌnu, kuani ti xaꞌvi nchisa da. 12 Dini ndidaa ni sa xitotuni ni andu kuu nchisa apóstol, kuan ndidaa señal xiꞌin milagru kída da sa io ni ndidaa ni, xiꞌin ndidaa sa kuyakui da sa saꞌa ni ndidaa ni, juan nchu kachi sa kuu nchisa da x-apóstol Jesucristu. 13 Sakaꞌnu-ini koo ni ndidaa ni. Doko dini ndidaa ni io eni kosa kuu sa ti kída ni, sa ti cháꞌvi ñaꞌa ni d̶a ndasa na kuinokuachi da jni, kuenta kida ndidaa ka x-congregación Ndios.
Pablo kaꞌan tsa sa kiꞌin tsa viaji ku uni
14 San vita sa io da sa kiꞌin da sa io ni ndidaa ni guelta ku uni, san ma nakoꞌon jni sa koo da sa io ni ndidaa ni, kuan ti nduku da sa dini ndidaa ni na taj ni stuini ni d̶a, maska sa sa saꞌa mee ni ndidaa ni juandiku nchu kiꞌin da. Kuan tadeꞌe kuu tsa nduku sa na koo sa nandeꞌe xi d̶aꞌa tsa, san adi daꞌa sa kuxi stadeꞌe nu. 15 Juandiku dan xiꞌin nee xanaa da kada gastu da sa io d̶a sa kuinokuachi da jni ndidaa ni, san kadachion ntseꞌe da ntsa na ndeꞌe da kuan kida-ini ñaꞌa ntseꞌe da jni ndidaa ni. San kuani dini ndidaa ni ti kida-ini ñaꞌa ntseꞌe ni d̶a, doko dan kida-ini ñaꞌa ntseꞌe da jni ndidaa ni.
16 Ti xíka da tuini jni ndidaa ni, doko io ñayii kaꞌan sa maña da san dandaa ñaꞌan da jni, doko adi sa ndaa kuu. 17 Ña ama dandaa ñaꞌan da jni kuenta tsandaꞌa da uu ka ku kiani ndo sa io ni xan ña? 18 Sakundaꞌavi da xi Tito sa na ku koto ñaꞌan nu jni xiꞌin ku kiani ndo tsa sa xini ni ndidaa ni. Ama dandaa ñaꞌan nu jni ndidaa ni ña? Xini guaꞌa ni ndidaa ni sa dan xiꞌin Tito eni sa xininchisa da nduu da xiꞌin eni ichi xika da nduu da.
19 Gua sani-ini ni ndidaa ni sa ndidaa sa kaꞌan da ya kaꞌan da kuan xika sa kaꞌnuini jni ndidaa ni doko ñaꞌan. Kuan xanii sa kaꞌan da jni, jnu Ndios kaꞌan da, sa saꞌa Jesucristu, san kachi da sa ndidaa sa kida da ndidaa da ya, kuu ndasa na chintsee ñaꞌan jni sa na kininchisa ka ni Jesucristu. 20 Doko yuꞌu-ini da sa kii na kiꞌin da ku koto ñaꞌan da jni kuan, ma naniꞌi ñaꞌan da jni kuenta nchoj da sa na koo ni, adi meni ndidaa ni ma naniꞌi ñaꞌan ni d̶a kuenta nchoj ni. Yuꞌu-ini da sa naniꞌi ñaꞌan da jni sa nandodo taꞌan ni ndidaa ni, adi kida kuadu taꞌan ni, adi diko-ini taꞌa ni ndidaa ni, adi xini uꞌu taꞌan ni, adi kaꞌan kuiꞌia taꞌan ni, adi yodo ndaꞌa taꞌan ni, adi sani-ini ni sa meeni ni kuu kida ndidaa, adi ndiden ndiden nchu kada ni sa nchoj ni ndidaa ni. 21 Yuꞌu da sa ora na kiꞌin nituku da sa io ni ndidaa ni, kaꞌnu sakanuu niꞌi da jnu Ndios san juan kada sa ndaꞌyu da kuan kuaꞌa ntseꞌe ni vita nata-uꞌu ka, kuan ti dandoo ni ndidaa kuachi kída ni, kuan kida ni daa ni ndidaa sa kuiꞌia sa duꞌua kida kuiꞌia xikikoño ni, io ni daa ni xiꞌin ñayii ti kuu d̶eꞌe ni adi xee ni xiꞌin sa nchoj ntseꞌe ni sa koo ni xiꞌin tsiee yaꞌa tsiee yukua adi ñadeꞌe yaꞌa ñadeꞌe yukua.