13
Jaꞌa kuu guelta ku uni kiꞌin da sa io ni ndidaa ni. Ndiden dakuidokuachi ni ndidaa ni nakoo ubi adi uni ñayii na dakuidokuachi ñaꞌana san kundaa en sa kundaa. 2 Jaꞌa kachi da diꞌna, san kaꞌan nituku da kuenta en tsa sa io ntsa sa io ni ndidaa ni, sa kuani io xika da doko chidotuni da xi ndidaa ñayii kída kuachi xiꞌin kaꞌan da xi ndidaa ka ñayii io xan san tu na kiꞌin nituku da san ma koo da sa nda ini xi ñayii kída kuachi. 3 Kuan dini ndidaa ni nchukini ni sa tu nchisa sa Jesucristu tsandaꞌa ñaꞌan d̶a, san ti diꞌntsa ia sa dadana ñaꞌan ia sa tastuni ia, kuan tastuni ntseꞌe ia sa io ni ndidaa ni. 4 Kuenta satakaa ñaꞌan xi ia cruz, diꞌntsa ia ora yukua doko vita san nchito ia sa saꞌa sa tastuni Ndios. San dan ndidaa da tuku eni diꞌntsa da kuenta káa Jesucristu, doko koo ndo xiꞌin ia ndidaa ndituꞌu tiempu sa saꞌa sa tastuni Ndios sa io xiꞌin ni ndidaa ni.5 Ntsaꞌa ni meni ndidaa ni tu nchisa sa xininchisa ni Jesucristu. Kototuni ni meni san tu na yaꞌia ni, san io ia xanaa ni. San tu ti xininchisa ni Jesucristu san ti io ia xanaa ni ndidaa ni. 6 Doko ñoꞌon xanaa da sa dini ndidaa ni sa xininchisa ni sa dan ndidaa da sa yaꞌia da ndidaa jaꞌa. 7 Ndikii xikataꞌvi da ndidaa da xi Ndios sa ma kada ni ndidaa ni sa kuiꞌia, san adi kida da jaꞌa ndasa na kini ñayii sa sa yaꞌia da sa xitotuni ñaꞌan, maska sa na kada ni ndidaa ni sa guaꞌa san kuani na danaꞌa sa dan ndidaa da vita yaꞌia ka da sa xitotuni ñaꞌan. 8 Kuan ma kachi koo da ndidaa x-contra sa ndaa, maska sa sa saꞌa sa ndaa kaꞌan da. 9 Guaꞌa sa dan ndidaa da ti yakui da ndasa dini ndidaa ni na ku kuu ni ñayii yakui, san xikataꞌvi da xi Ndios sa ndikii na ndu ni ndidaa ni modo sani-ini ia ntsa diꞌna. 10 Juandiku chidotuni da carta yaꞌa jni neni io xika da, kuan ndasa ora na kiꞌin da sa io ni ndidaa ni ma ndudeen da jni xiꞌin sa tastuni táxi ia kuu ku Toꞌo ndo kuan d̶a, kuan sa tastuni táxi Ndios d̶a, kuu sa na chintsee ñaꞌan da jni sa na kininchisa ka ni ia, san ma kuita ni.
Kada ntse-ini jni ndidaa ni
11 Jaꞌa kuu ndidaa vi xanii. Kada ntse-ini jni ndidaa ni, san xika da sa na ku-iꞌni ni ndidaa ni. Nduku ntsee ni ndidaa ni sa nakoo ndaa ni. Kuaꞌa taꞌan ni toꞌon kaꞌnu-ini, san eni modo kani-ini ni ndidaa ni san kadi ni koo ni. San Ndios ia xinimani ñaꞌan ku ndo ndidaa ndo xiꞌin ia taxi sa na kookadi ndo, koo xiꞌin ni ndidaa ni. 12 San xiꞌin nee xanaa ni ndidaa ni kaꞌan taꞌan ni. 13 Ndidaa ku kiani ndo xiꞌin ku kuaꞌa ndo ya kachi sa na kada ntse-ini jni ndidaa ni.
14 Ku Toꞌo ndo Jesucristu na taxi ia j-gracia ia jni ndidaa ni, san Ndios na taxi ia sa xinimani ia jni ndidaa ni. San Espíritu Santu na nduu eni xiꞌin ni ndidaa ni. Duꞌua na kuu.