2 Corintios 11

Sakaꞌnu-ini koo ni ndidaa ni tu ndukueꞌe da xiꞌin ndidaa sa kaꞌan da ya. 2 Kuan xiꞌin sa kida kuiño Ndios kida kuiño da jni ndidaa ni, kuan Ndios kída ia sa na kinimani ñaꞌan da jni. San sa nchoj da kuu sa na saa ni jnu Jesucristu, kuenta kida en nu ndee sa io sa tandaꞌa, san ndi kii yeꞌe d̶iki nu xee nu, san soꞌno guaꞌa nu mee nu sa kuxi xee nu. 3 Doko dan yuꞌu-ini da kuan na kada sa dandaa ñaꞌan jni san dandoo ni sa nchiko ni Jesucristu duꞌua kuenta dándaa ñaꞌan koo kuan xi Eva, kuan kiti yukua vivo ntseꞌe te. 4 Kuan dini ndidaa ni semani ni sa kunini ni ndidaa ni ka ñayii sa kaꞌan jni sa kuu enka Jesús san adi sa kuu Jesús káꞌan da ndidaa da jni. San semani ni sa niꞌi ni enka espíritu, sa ti kuu sa dakuaꞌa ñaꞌa da jni, xiꞌin sa kunini ni enka toꞌon sa kuxi toꞌon guaꞌa xininchisa ni ndidaa ni, san dini ndidaa ni guaꞌa ntseꞌe semani ni ndidaa jaꞌa. 5 Do ko dan sani-ini da sa ti luchi ka kuu da sa kuxi ndidaa tsa sani-ini sa kuu apóstol naꞌnu yukua; 6 kuan kuani chuu kaa da sa kaꞌan da, doko kuaꞌa ntseꞌe xini da, san dini ndidaa ni xini guaꞌa ni sa duꞌua kuu nchisa, kuan sa xíni ni sa duꞌua kida da ndidaa da.

7 Ña nasa kuu kuachi kída da? kuan sa kída da kuu sa káꞌan da toꞌon guaꞌa sa nanitaꞌvi ni ndidaa ni, san nisa ti teyaꞌvi da jni; san ti nchú kunaꞌnu da ndasa dini ndidaa ni na kunaꞌnu. 8 Semani da téen da s-tuini uu ka x-congregación Ndios, ndasa na kuu chintsee ñaꞌan da jni ndidaa ni. Kuan uu ka ku kiani ndo taxi tuini ndasa na dakuaꞌa ñaꞌan da jni ndidaa ni. 9 Kuenta ío da sa io ni ndidaa ni xan, kuaꞌa ntseꞌe sa nándeꞌe d̶a, doko nisadana ti xíka da jni ndidaa ni, kuan ndidaa sa nándeꞌe d̶a saneꞌen uu ku kiani ndo io Macedonia ya, kuan ti nchój da sa ndiꞌi xanaa ni ndidaa ni sa saꞌa da, san nisa vita ma duꞌua kada da. 10 Nisa en ni kuenta guaꞌa io ni Acaya, ma kachi dita sa ku-iꞌni da sa ma teen da s-tuini xi, jaꞌa kuu sa ndaa, kuenta kuu sa ndaa sa xini da s-toꞌon Jesucristu tuku. 11 Sani-ini ni ndidaa ni sa ti xinimani ñaꞌan da juandiku duꞌua kida da jni ña? Ndios xini ia sa xinimani ñaꞌan da jni ndidaa ni.

12 Doko kadachiion ni on da, san ma teen da nisa dana s-tuini ni ndidaa ni. Ndasa duꞌua ndidaa tsa kuiꞌni sa kuu kuenta dan ndidaa da, ma niꞌi tsa modo sa ku iꞌni tsa. 13 Kuan ndidaa tsa yaꞌa adi apóstol kuu tsa, meni ñayii ndanꞌtsa kuu tsa, ñayii dadana ñaꞌan, ñayii danaꞌa kuenta x-apóstol Jesucristu doko adii x-apóstol Jesucristu kuu tsa ndidaa tsa. 14 Sakuituni guaꞌa xanaa da ndidaa da sa ndidaa tsa naꞌntsa yaꞌa kida tsa chiion guaꞌa kuenta dan ndidaa da, kuan ntsa ndeꞌe mee sakakuiꞌia guaꞌa ni danaꞌa kuenta en x-ángel Ndios. 15 San ndidaa ñayii kuiꞌia xinokuachi xi, dandee ñaꞌan xi ndidaa ñayii xinokuachi xi sa ndaa, doko ndidaa tsa yaꞌa níꞌi tsa xaꞌvi tsa sa saꞌa ndidaa sa kuiꞌia kida tsa.

Pablo taꞌan ntseꞌe tsa sa kuu tsa, tsa neꞌe s-toꞌon Jesucristu

16 Ti nchoj da sa na kani-ini ni ndidaa ni sa ndukueꞌe da, doko tu duꞌua sani-ini ni san atuu sa kada. Kuan duꞌua na ku-iꞌni da kuani sa en taꞌa. 17 Sa kachi toꞌon da yaꞌa, adi duꞌua kachi Ndios, maska sa kaꞌan da kuenta en tsa ndukueꞌe nchu ku-iꞌni. 18 Doko tu kuaꞌa ñayii kaꞌan guaꞌa xi mee ñuyii yaꞌa, san naku dan ma kachi kaꞌan da sa kuu mee da. 19 Kuan dini ndidaa ni ñayii sani-ini ndaa, kuyakui ni, san kida ni ndidaa sa taꞌvichion ñayii ndukueꞌe. 20 Kuan kuyakui ñaꞌan ni xi ñayii kida sa na kada ni sa nchoxi, ñayii teen ndidaa sa io jni, ñayii duꞌu niꞌni ñaꞌan jni, ñayii naꞌnu ntseꞌe nchu ku kuu sa kuj ni, ñayii katu x-koño jnu ni. 21 Sakaꞌnu-ini koo ni tu ti duꞌua kída da jni. San kukaꞌan jnu da sa kaꞌan da jaꞌa, kuan ti ntsee da san ti níꞌi ntsee da sa duꞌua kada da jni ndidaa ni. San kuani kaꞌan da kuenta en tsa ndukueꞌe, doko dan duꞌua kaꞌan da, san vita na kadakaꞌnu ñaꞌan da xi mee da kuenta ndidaa tsa yukua kidakaꞌnu tsa mee tsa. 22 ¿Ndidaa ñayii yukua kuu hebreu ña? Dan kuu da hebreu tuku. ¿Kuu tsa ñuu Israel ña? Dan tuku. Kuu tsa j-raza Abraham ña? Dan tuku. 23 Xinokuachi tsa xi Jesucristu ña? Dan xinokuachi ntseꞌe ka da sa kuj s-tsa ndidaa tsa (kaꞌan da kuenta en tsa ndukueꞌe) kídachiion ntseꞌe ka da sa kuj s-tsa ndidaa tsa, yéꞌe ntseꞌe ka da vekaa sa kuj s-tsa ndidaa tsa, ndóꞌo ntseꞌe ka da sa kuj s-tsa ndidaa tsa, san kuaꞌa ntseꞌe guelta sa io sa kaꞌni ñaꞌan da. 24 Oꞌon guelta kaniaꞌa ñayii ñuu Israel d̶a, ndiden guelta duku ñaꞌan tsa okosaꞌun kumi kuarta d̶a. 25 Uni guelta kaniaꞌa ndidaa soldadu romanu xiꞌin vara d̶a, en guelta nchu kaꞌni ñaꞌan tsa xiꞌin yuu; uni guelta daꞌvi barku ñoꞌon da xiti mar san taꞌa ni ka sa ndeꞌe da, san en niñu xiꞌin en kii ío da xiti mar en guelta. 26 Ndinoo ntseꞌe da, taꞌan ntseꞌe da sa taꞌantsa da yutsa, kuaꞌa guelta nchu duꞌu ñayii sa neꞌe da ora xu ndinoo da, kuaꞌa guelta sa io sa kuu da xiti mar, kuaꞌa guelta nchu kaꞌni ñaꞌan ndidaa ñayii xuun da d̶a, ndidaa ñayii ti kuu ñuu Israel, ñayii io enka ñuu xiꞌin ndidaa ñayii io yuku tuku, san duꞌuani ndidaa ñayii naꞌntsa kaꞌan sa xininchisa ñaꞌan xi Jesucristu; 27 san xu kadachiion ntseꞌe da san xu taꞌan ntseꞌe da, kuaꞌa ntseꞌe guelta ti xu kudu da, taꞌan da doko xiꞌin yichi da ndutsa, kuaꞌa ntseꞌe guelta ñoꞌon nchitsa da, taꞌan da sa vixi kuan ti xu koo s-titsaa da.

28 San adi jaꞌa ni kuu ndidaa, kuan ndi kii ndiꞌi ntseꞌe xanaa da sa saꞌa ndidaa x-congregación Ndios. 29 Kuan ora niꞌi toꞌon da sa dakaa en ku kiani ndo kuꞌu xi san ntsandeꞌe ka dan ku ndaꞌvi tuku, san ora dakaa en ku kiani ndo ti dakuaꞌa ñaꞌa ndaa stoꞌon Ndios xi san nadiko d̶a tuku.

30 Tu nchu ku-iꞌni da, sa nandeꞌe sa ku-iꞌni da ku sa ti yakui da. 31 Ndios ia kuu s-Tata ku Toꞌo ndo Jesucristu, ia nandeꞌe sa kukaꞌnu ndikii xini sa sa ndaa kaꞌan da. 32 Kuenta ío da ñuu nani Damasco, gobernador tsa sáni rey Aretas, gobernador yaꞌa tsandaꞌa tsa ñayii sa na kuntsaa ñuu yukua ndasa na teen ñaꞌan tsa d̶a san na chiñaꞌan tsa vekaa d̶a, 33 doko ti niꞌi ñaꞌan tsa kuan uu ñayii mani xiꞌin da soꞌno ñaꞌan tsa xiti en yeka kaꞌnu san noneꞌe ñaꞌan tsa ichi d̶iki daꞌua yeꞌe korra ñuu yukua.