Pablo kaꞌan tsa sa Ndios tsandaꞌa ñaꞌan s-tsa
10
Dan Pablo, xika da sa na kunini ñaꞌan ni ndidaa ni d̶a, sa saꞌa sa kunda-ini xiꞌin sa xinimani Jesucristu; kuan dagua ni kaꞌan sa kanuu ntseꞌe da, doko ora io xika da san den ntseꞌe kaꞌan carta tsandaꞌa da. 2 Xika da jni ndidaa ni, sa ora na kiꞌin da ku koto ñaꞌan da jni, ma kada ni sa nduden da jni ndidaa ni, kuenta sani-ini da sa kaꞌan den da xi ndidaa ñayii da kuidokuachi ñaꞌan, ñayii kaꞌan sa io da ndidaa da kuenta io ñayii ñuyii yaꞌa. 3 Sa ndaa ku nchisa sa io da ndidaa da ñuyii yaꞌa, doko adi naa da kuenta naa ndidaa ñayii ñuyii yaꞌa; 4 Kuan ndidaa sa senchiion da sa naa da, adi sa io ñuyii yaꞌa senchiion da. Kuan sa tastuni taxi Ndios juan senchiion da, sa datani da ndidaa sa tastuni sakakuiꞌia, 5 xiꞌin ndidaa sa naꞌntsa ndidaa ñayii xiꞌin ndidaa sa nchu ku naꞌnu ñayii, sa kida sa dagua ka ñayii ti xininchisa ñaꞌan xi Ndios. San xiꞌin sa tastuni taxi Ndios kida da ndidaa da sa ndidaa ñayii na nadama sa sani-ini san na kininchisa ñaꞌan xi Jesucristu, 6 san ñayii ti nchu kada sa taꞌvichiion Jesucristu san dan ndidaa da io listo da sa nduden da xiꞌin nakani ñaꞌan ndaa da s-tsa ndidaa tsa, doko diꞌna ka dini ndidaa ni nandeꞌe sa kuin ndaa.7 Ntsaꞌa ni ndidaa ni nasa kuu sa ndakuiti. Tu andu io seguru sa kuu xaꞌan Cristu, na kani-ini ñayii yukua sa duꞌua kuenta kuu tsa xaꞌan Cristu, dan ndidaa da kuu da xaꞌan Cristu tuku. 8 Kuan ti kukaꞌan jnu da sa kachitoꞌon da jni, sa dan ndidaa da io sa tastuni ñaꞌan da jni, kuan sa tastuni yukua táxi ia kuu ku Toꞌo ndo d̶a ndidaa da, san táxi ia d̶a ndasa na chintsee ñaꞌa da jni sa na kuaꞌnu ni ndidaa ni, san adi sa kada da sa na ndugua ni. 9 San ma kani-ini ni sa nchu dayuꞌu ñaꞌan ni da jni xiꞌin ndidaa carta tsaa da sa tsandaꞌa da jni. 10 Kuan duꞌua kaꞌan nchisa en ñayii io sa io ni ndidaa ni xan, sa ndidaa x-carta da tsandaꞌa da jni ndidaa ni déen ntseꞌe kaꞌan, doko ora saꞌan da sa io ni ndidaa ni, danaꞌa da kuenta en ñayii ti ntsee xiꞌin ti xaꞌvi stoꞌon xi. 11 Doko ñayii kaꞌan toꞌon yaꞌa nandeꞌe sa kini sa kuenta ni ntsaa ndidaa carta tsandaꞌa da ora io xika da, duꞌua ni kada da ora na kiꞌin da sa io ni xan tuku.
12 San ma ku kuu da ndidaa da kuenta ndidaa ñayii kaꞌan guaꞌa xi mee, kuan sa kaꞌan guaꞌa ndo ku mee ndo kuu en sa ndukueꞌe. Ma ku kuu da kuenta ndidaa ka tsa dadaguataꞌan mee kuan ndidaa tsa chikuꞌua taꞌan nduku tsa sa kaꞌan guaꞌa xi mee tsa doko ndidaa jaꞌa kuu sa ndukueꞌe. 13 San ma ku-iꞌni da ndidaa da maska sa nandeꞌe sa kuiꞌni da, kuan sa ku-iꞌni da xiꞌin kuu chiion taꞌvi Ndios sa kada da ndidaa da. San dini ndidaa ni kuu chiion yukua. 14 Ti kida da maska sa táꞌvichiion d̶a sa kada da ndidaa da, kuan dan ndidaa da kuu tsa diꞌna nuu saa sa io ni ndidaa ni xan, kuan Ndios kuu ia taꞌvichiion sa na kaꞌan da sa kuu Jesucristu jni ndidaa ni. 15 San ti ku iꞌni da ndidaa da xiꞌin chiion kída enka ñayii, sa nchoj da kuu sa dini ndidaa ni na kininchisa ka ni xiꞌin na kuin kutu ni ndasa ndidaa mee ni na kaꞌan guaꞌa d̶a, kuan duꞌua kida da ndidaa da; 16 san duꞌua kaꞌan da ndidaa da toꞌon guaꞌa yaꞌa ndidaa xichi, san ma yii da chiion kida enka ñayii ndasa ma ku-iꞌni da xiꞌin x-chiion enka ñayii.