9
Ti nandeꞌe ka sa tsaa da sa dataka ni tuini sa kuxi ndidaa ñayii ndada ii Ndios io Jerusalén; 2 Kuan sa xini da sa guaꞌa xanaa ni ndidaa ni. Juandiku oni iꞌni kaꞌan da xi ndidaa ku kiani ndo io ndidaa x-congregación Ndios io Macedonia ya, sa ndidaa dini ñayii xininchisa xiꞌin kuu x-congregación Ndios io Acaya, ntsa kuia yaꞌia ndo kuaan io listo ni sa chintsee ñaꞌan ni. San kuenta tsaku xi ndidaa ku kiani ndo ya juan, san kuaꞌa ntseꞌe ka tsa nchu chintsee ñaꞌan tuku. 3 Juandiku tsándaꞌa da Tito xiꞌin nduu ka ku kiani ndo sa io ni ndidaa ni xan ndasa na kini tsa ndidaa tsa sa sa ndaa kuu sa sadaa da s-tsa sa kuu ni ndidaa ni xiꞌin duꞌua ni na nasa razón sa io da ya ndidaa da tuku, juandiku kuenta kachi da jni, koo listo ni xiꞌin tuini táka xan. 4 Kuan na kada ora kiꞌin da, kada kiꞌin da xiꞌin uu ku kiando ndo io Macedonia san dini ndidaa ni tu ti io listo ni san niꞌin da ndidaa da sakanuu adi niꞌi meni ndidaa ni sakanuu kuan kukáꞌnu-ini ñaꞌa da jni. 5 Juandiku xíka da xi ndidaa ku kiani ndo, sa na kundodo nuu tsa kiꞌin ndasa na dataka tsa tuini kachi ni sa kuañaꞌan ni xiꞌin nee xanaa ni ndidaa ni, ndasa na koo listo, kuenta en sa kána xanaa meni sa kuañaꞌa ni ndidaa ni, san adii kuenta en sa táꞌvichion jni ndidaa ni.6 Kuan duꞌua kachi da: Andu taꞌa ni choꞌon san taꞌa ni nakeꞌen, san andu choꞌon vaa san vaa na nakeꞌen. 7 Ndiden ndiden kuañaꞌan ni kuenta guaꞌa ñoꞌon xanaa ni sa kuañaꞌan ni, san adii kuenta en sa taꞌvichion jni san ma ta-uꞌu ni sa kuañaꞌan ni. Kuan Ndios xinimani ia ñayii sañaꞌan xiꞌin nee xanaa xi. 8 Kuan Ndios tastuni ia sa taxi ia ndidaa sa nandeꞌe jni ndidaa ni. San duꞌua guaꞌni na chintsee ni ñayii nandeꞌe xi tuku; 9 kuan duꞌua yodotuni:
Sañaꞌan vaa ia xi ndidaa ñayii ndaꞌvi.
San ndikii guaꞌa ia. Duꞌua yodotuni s-toꞌon Ndios.a
10 San Ndios ia sañaꞌan tata xi ñayii ndasa na choꞌon ñayii xiꞌin ita stila ndasa na kaxi ñayii, kada ia sa na koo vaa ntseꞌe jni ndidaa ni ndasa na kuu kuañaꞌan ni vaa ntseꞌe xi uu ka ñayii nandeꞌe xi tuku. 11 San kada ia sa na kaya jni ndasa na kuañaꞌan vaa ni. San duꞌua kuaꞌa ka ñayii kuañaꞌan taxaꞌvi xi Ndios sa saꞌa ntsoo ndidaa ndo. 12 Kuan ndidaa sa chintsee ni ndidaa ni ku kiani ndo adii ni kuu ndasa sa koo sa nandeꞌe s-tsa ndidaa tsa, maska sa jaꞌa kada sa kuañaꞌan ntseꞌe tsa ndidaa tsa taxaꞌvi xi Ndios. 13 San xiꞌin ndidaa sa chintsee ñaꞌan ni kuan danaꞌa sa xininchisa ni ndidaa ni toꞌon guaꞌa xiꞌin kida ni ndidaa sa kachi. San duꞌua ndidaa ñayii yaꞌa kadakaꞌnu ñaꞌa xi Ndios. 14 San kakataꞌvi tsa ndidaa tsa sa saꞌa ni xiꞌin nee xanaa tsa kuan kini tsa ndidaa tsa sa guaꞌa ntseꞌe Ndios. 15 Taxaꞌvi xi Ndios kuan taxi ia en regalu kaꞌnu ntseꞌe ku ndo ndidaa ndo, san ti io toꞌon sa kaꞌan da ndidaa sa guaꞌa kuu ia.