Sa doko xi ndidaa ñayii kundaꞌvi xininchisa ñaꞌan xi Jesucristu
8
San duꞌua vi xanii, na kachi toꞌon da j-gracia Ndios io xi x-congregación ia io Macedonia; 2 kuani daa taꞌan ntseꞌe ndidaa ñayii yaꞌa doko ku-iꞌni ntseꞌe tsa ndidaa tsa. San xiꞌin nee xanaa tsa sañaꞌa tsa ndidaa tsa, kuani atuu dana sa io s-tsa, doko sañaꞌan tsa ndidaa tsa san ti chituni tsa. 3 Kachi toꞌon ndaa da sa sañaꞌan tsa ndidaa tsa xiꞌin nee xanaa tsa, na tantu io tsa, san oni maska sa io s-tsa ndidaa tsa, 4 sákundaꞌvi ntseꞌe tsa jnu da ndidaa da sa na kuemani da sa na chintsee tsa ndidaa ñayii ndada ii Ndios. 5 San kuaꞌa ka kida tsa ndidaa tsa sa sani-ini da ndidaa da sa kada tsa, diꞌna nuu naxikokagua tsa xichi Ndios, san danduu sa io dan ndidaa da, sa kada tsa sa taꞌvichiion da ndidaa da. San duꞌua kída tsa ndidaa tsa sa nchoxi Ndios. 6 Tito kuu nu kesaꞌa dátaka tuini sa io ni ndidaa ni, san xika da jnu sa duꞌua ni na kada ni on nu ntsa naxinotaꞌan sa dataka nu. 7 San duꞌua ni kuenta saꞌnu ka ni xiꞌin sa xininchisa ñaꞌa ni xi Ndios, xiꞌin san tediki ni stoꞌon ia, xiꞌin san xini ni sa ndaa kuiti, xiꞌin san taꞌan xanaa ni sa chintsee ni enka ñayii xiꞌin xinimani ñaꞌan ni d̶a ndidaa ni, duꞌua ni kuaꞌnu ni xiꞌin sa dataka tuini yaꞌa.8 Ti taꞌvichion da sa duꞌua na kada ni, sa nchoj da kuu sa na ntsaꞌa ni ncha kida ndidaa ka ku kiani ndo nataka ndidaa ka ñuu, kuan ndidaa sa sañaꞌan ni sa kuxi ndidaa ku kiani ndo kundaꞌvi, nchukachi sa xinimani ñaꞌan nchisa ni. 9 Kuan dini ndidaa ni sa xini j-gracia ku Toꞌo ndo Jesucristu xiꞌin sa kuika ntseꞌe ia, doko sa saꞌa dini ndidaa ni kida sa ku ndaꞌvi ia, kuan ndasa sa ku ndaꞌvi ia na kada sa na ku kuika ni ndidaa ni.
10 San jaꞌa kuu en toꞌon guaꞌa taj da jni; kuan jaꞌa kuu sa guaꞌa jni ndidaa ni, kuan diꞌna nuu ni ndidaa ni nchóxi xiꞌin sánisaꞌa sa dataka tuini ntsa sanduxi. 11 San vita, duꞌua kuenta kachi ni ndidaa ni sa kada ni, kada ni sa káꞌan ni, san nee-ini ni kuañaꞌan ni kuenta guaꞌa io jni. 12 Tu sa ndaa nchisa sa nchu chintsee ñaꞌan ni, Ndios kinimani ia ndidaa sa na kuañaꞌan ni, sa io jni ndidaa ni, kuan ti ntsatu ia sa kuañaꞌan ndo sa ti io ku ndo.
13 Doko adi kachi da jaꞌa ndasa uu ka ñayii na koo kuaꞌa ntseꞌe xi, san dini ndidaa ni na kada falta jni, 14 maska sa vita enuu na koo jni, ndasa sa io d̶ini ndidaa ni na niꞌi uu ka ñayii kida falta xi san sa io xi uu ka ñayii, sa kida falta xi meni ndidaa ni na niꞌin ni tuku. 15 Kuan duꞌua yodotuni s-toꞌon Ndios: Ndidaa ñayii nákeꞌen vaa, ti ío vaa ka xi sa kuxi enka ñayii, san ndidaa ñayii nakeꞌen en taꞌa ni ti nandeꞌe ka xi, duꞌua yodotuni s-toꞌon Ndios.a
16 Taxaꞌvi xi Ndios kuan chóꞌon ia xanaa Tito sa na chintsee ñaꞌan nu jni kuenta dan. 17 Kuan xíka da jnu sa na kiꞌin nu, san semani nu, kuan sa duꞌua ñoꞌon xanaa nu sa nchu kiꞌin nu, san xiꞌin nee xanaa nu kée nu kuaꞌan nu sa io ni ndidaa ni.
18 Tsándaꞌa da en ku kiani ndo xiꞌin Tito xan, en tsa kaꞌan guaꞌa ndidaa x-congregación Ndios kuan xi; 19 san adi jaꞌa kuu maska sa ndidaa x-congregación Ndios xíka sa tsa yaꞌa na kiꞌin xiꞌin da ndidaa da kii na ku neꞌe da ndidaa tuini táka kuan. San ndidaa jaꞌa kída da ndidaa da ndasa na kadakaꞌnu ñaꞌan xi ia kuu ku Toꞌo ndo, san duꞌua na kini ñayii sa xiꞌin nee xanaa ni chintsee ñaꞌa ni ndidaa ni xi ñayii, 20 kuan ti nchoj da ndidaa da sa kodondaꞌa ñaꞌan ñayii d̶a, sa saꞌa sa nadataka da ndidaa tuini taka kuan. 21 Juandiku dan ndidaa da nduku da sa ndaa ntseꞌe na kada da chion yaꞌa jnu Ndios xiꞌin jnu ndidaa ñayii tuku.b
22 Xiꞌin nduu ku kiani ndo yaꞌa tsandaꞌa da enka ku kiani ndo, en tsa xini da ndidaa da sa taꞌan ntseꞌe xanaa xi sa chintsee ñaꞌa, san vita nchoj ntseꞌe ka tsa sa chintsee ñaꞌan tsa d̶ini ndidaa ni, kuan kukanu-ini ñaꞌa ntseꞌe tsa jni. 23 Tito ya ku x-kompañeru da san kidachiion nu xiꞌin da sa chintsee ñaꞌan da jni ndidaa ni. San nduu ka ku kiani ndo ya kuu tsa tsandaꞌa uu ka x-congregación Ndios, san xiꞌin modo xinokuachi tsa kidakaꞌnu ñaꞌa xi Jesucristu. 24 Juandiku kinimani ñaꞌan ni s-tsa ndidaa ni, kuan ndasa na kini ndidaa tsa tsandaꞌa ñaꞌan s-tsa, sa sa ndaa kuu ndidaa sa guaꞌa sadaa da s-tsa sa kuu ni ndidaa ni.