7
Xanii, kuenta guaꞌa xininchisa ñaꞌan ni xi Jesucristu, ntsaꞌa ni sa io ndidaa promesa yaꞌa. Juandiku nandeꞌe sa yuꞌu ndo Ndios san na dandoo ndo ndidaa sa kuiꞌia nchoxi ku kikikoño ndo san na koo ndo ndikii kuenta kachi ia sa na koo ndo.Ku iꞌni Pablo kída sa na ta uꞌu ñayii corinto
2 Dini ndidaa ni xini guaꞌa ni: sa nisa en ni ti kaꞌan kuiꞌia da xi, san nisa en ni ti kída da ndidaa da sa kuiꞌia xi; san ti en ni dadána da. 3 Ti kaꞌan da ndidaa da toꞌon yaꞌa ndasa nchu dakuido kuachi ñaꞌa da jni ndidaa ni, kuan sa kachi toꞌon da san kuani na kuu da ndidaa da adi nakoo da ñuyii ma nadama sa xinimani ñaꞌan da jni ndidaa ni. 4 Dan kaꞌan ndaa da jni ndidaa ni, kuan kukanu-ini ñaꞌa da jni, san ku-iꞌni da sa saꞌa sa kuu ni xiꞌin sa kida ni ndidaa ni, kidakaꞌnu da xanaa da san kuiꞌni ntseꞌe da kuani daa taꞌan da ndidaa da.
5 Kuan sa ndaa ku nchisa sa kuenta saꞌan da ndidaa da Macedonia,a ti ndexavi da san táꞌan ntseꞌe da ndidaa da, kuan ñayii xininchisa ñaꞌa xi Jesucristu yuꞌu ntseꞌe tsa ndidaa tsa, san ndidaa ñayii ti kuu x-congregación Ndios nchu naa ntseꞌe. 6 Doko Ndios ia kidakaꞌnu xanaa ñayii taꞌan ntseꞌe, kidakaꞌnu ia xanaa da ndidaa da kuenta saa Tito, 7 san adii ni sa saa nu kída sa kukaꞌnu xanaa da, maska sa kídakaꞌnu nu xanaa da ndidaa da duꞌua kuenta kída meni ni ndidaa ni jnu. Kuan nakani nu sa dini ndidaa ni xinimani ñaꞌa ntseꞌe ni d̶a ndidaa da, san nchu kini ñaꞌa ntseꞌe ni d̶a san oni ndaꞌyu ni; san kuenta tsaku d̶a toꞌon yaꞌa sa ku-iꞌni ntseꞌe da.
8 San kuani tá-uꞌu ni ndidaa ni kída carta tsandaꞌa da jni, doko ti nayuꞌu da sa tsandaꞌa da, kuani danduu na kani-ini da doko ntsaꞌa da sa sa ío ndaꞌvi xanaa ni en taꞌa ni tiempu kuu. 9 San vita ku-iꞌni da adi sa saꞌa sa in ndaꞌvi xanaa ni maska sa ku iꞌni da kuan kuenta in ndaꞌvi xanaa ni, natauꞌu ni, kuan sa ío ndaꞌvi xanaa ni Ndios kída sa duꞌua na kada. Juandiku sani-ini da sa guaꞌa ni kída sa tsandaꞌa da carta yukua jni ndidaa ni. 10 Kuan tu Ndios kida ia sa na koo ndaꞌvi ku kuanaa ndo, adi sa kuiꞌia kuu kuan kida sa na natauꞌu ndo sa saꞌa ndidaa ku kuachi ndo ndasa na nanitaꞌvi ndo, san sa ndaꞌvi yukua ti nandeꞌe sa tauꞌu ndo kada, doko sa io ndaꞌvi ku kuanaa ndo taxi ñuyii yaꞌa guaꞌni kaꞌni ñaꞌan ku ndo. 11 Kuan ntsaꞌa ni ka, sa ío ndaꞌvi xanaa ni kída Ndios, juan kída sa dini ndidaa ni na kuaꞌa ni kuenta sa kida ni sa kuiꞌia, kída sa na natavi ni sa kuu sa ndaa xiꞌin sa ndaa, kída sa na dandoo ni kuachi kida ni, kída sa na yuꞌu ka ni Ndios, sa na kinimanitaꞌan ka ni ndidaa ni, juan kída sa na kada ni ndidaa modo nchoxi Ndios. Kída sa na kani ni Ndios diꞌna nuu sa kuxi ndidaa sa io, xiꞌin kída sa ma kuido kuachi ka ni ndidaa jaꞌa jnu Ndios. 12 San kuani duꞌua chidotuni da carta yukua, doko adi sa saꞌa tsa kída kuachi kuan juandiku duꞌu kida da, nisa sa saꞌa sa taꞌan tsa kuan. Maska sa tsáa da kuan ndasa na kuaꞌa ni kuenta sa ndiꞌi ntseꞌe xanaa da sa saꞌa ni ndidaa ni, san Ndios xini ia sa duꞌua ku nchisa. 13 Juandiku kuiꞌni da sa dini ndidaa ni kúkaꞌnu xanaa ni doko kuiꞌni ntseꞌe ka da sa xíni da Tito ya kuiꞌni nu, kuan dini ndidaa ni kída ni sa na kuiꞌni x-espíritu nu. 14 Dan sadaa da xi Tito ya sa ku-iꞌni ntseꞌe da sa saꞌa ni ndidaa ni, san ti dandoo ñaꞌan ni ndidaa ni sakanuu d̶a, kuan ndidaa sa sadaa da ndidaa da xi Tito kuu sa ndaa, kuenta kuu sa ndaa ndidaa sa kachitoꞌon da jni ndidaa ni. 15 San kida-ini ñaꞌan ntseꞌe ka nu jni kuan nakaꞌan nu sa ndidaa ni xíniguaꞌa ñaꞌan xiꞌin xíninchisa ñaꞌan jnu xiꞌin sa yuꞌu ni Ndios. 16 Ku-iꞌni da sa guaꞌani kukaꞌnu-ini ñaꞌan da jni ndidaa ni.