6
Juandiku ndasa kuu da ndidaa da ñayii kidachiion xi Ndios. Xika da jni ndidaa ni sa ma kani-ini ni sa atuu sa kuu j-gracia Ndios jni ndidaa ni, san dandoo duꞌua ni; 2 Kuan duꞌua kachi:Kuenta taꞌan kii sa kunda-ini ñaꞌan ntsu,
san taj ntsu sa nanitaꞌvi yo, duꞌua kachi Ndios.a
Kunini ni ndidaa ni. Vita kuu kii nanitaꞌvi ni ndidaa ni.
3 Nisa en sa kuiꞌia ti kida da ndidaa da ndasa ma en kaꞌan kuiꞌia xi chiion kida da ndidaa da. 4 Kuan ndidaa sa kida da ndidaa da nchukachi sa kuu da ñayii xinokuachi xi Ndios, san kuaꞌa ntseꞌe kuyakui da ndidaa da. Kida ñaꞌa ntseꞌe ñayii d̶a, san kuan ntseꞌe sa na ndeꞌe d̶a ndidaa da, san ndiꞌi ntseꞌe xanaa da ndidaa da. 5 Ndidaa ñayii tastuni kaniaꞌa ntseꞌe d̶a xiꞌin vara,b chiñaꞌan ñayii vekaa d̶a ndidaa da, san xiti ndidaa ñayii ndiñuꞌu ñaꞌan ñayii d̶a. San kidachion ntseꞌe da ndidaa da. San ti saj guaꞌa da ndidaa da nisa ti xidi guaꞌa. 6 San dan ndidaa da io ndaa modo io da, san xini guaꞌa da Stoꞌon Ndios, kaꞌnu xanaa da ndidaa da, kuu guaꞌa da xi ñayii, san io Espíritu Santu kuan d̶a ndidaa da, xinimani nchisa da ndidaa ñayii. 7 San dakuaꞌa ñaꞌan da s-toꞌon Ndios sa kuu sa ndaa kuiti. San sa tastuni Ndios senchiion ñaꞌan d̶a ndidaa da. San dan ndidaa da io ndaa da jnu Ndios san xiꞌin jaꞌa tavi da mee da xi sa kaꞌan ñayii d̶a. 8 Kudana kendoo guaꞌa da ndidaa da, san kudana dakanantsaa ñaꞌa ñayii toꞌon d̶a, kudana kaꞌan guaꞌa ñayii d̶a, san kudana kaꞌan kuiꞌia ñayii d̶a ndidaa da, san kudana kuenta modo danaꞌa sa dandaa da ñayii, doko ñaꞌan kuan dan ndidaa ndituꞌu tiempu kaꞌan da sa ndaa ndidaa da; 9 San kudana kuani xini ñaꞌan guaꞌa ñayii d̶a ndidaa da doko kida ñayii sa ti xini ñaꞌan ñayii. Kudana danaꞌa da kuenta modo sa io sa kuu da doko nchito daa da ndidaa da. Kudana kida ñaꞌa ntseꞌe ñayii d̶a doko ti xiꞌi da ndidaa da; 10 Kudana danaꞌa sa ndaꞌvi ntseꞌe io xanaa da, doko ñaꞌa kuan dan ku-iꞌni ntseꞌe da ndidaa da, danaꞌa da sa ku ndaꞌvi da ndidaa da doko kida kuika da kuaꞌa ntseꞌe ñayii xiꞌin s-toꞌon Ndios. San kudana danaꞌa sa atuu dana sa io d̶a ndidaa da doko ndidaa ndituꞌu io d̶a.
11 Xanii, kuenta guaꞌa nataka ni ndidaa ni Corinto ndidaa toꞌon kaꞌan da kuu sa ndaa san nisadana ti yeguaꞌa, kuan xiꞌin nee xanaa da kaꞌan da jni ndidaa ni. 12 Dan ndidaa da tai-ni ñaꞌan da xiꞌin xinimani ñaꞌa da jni ndidaa ni xiꞌin nee xanaa da doko dini ndidaa ni ti duꞌua kida ni d̶a ndidaa da. 13 Juandiku xika da jni ndidaa ni na d̶aꞌa da, kinimani ñaꞌan ni d̶a ndidaa da kuenta xinimani ñaꞌan mee da ndidaa da jni.
Ku ndo xeꞌe Ndios nchito
14 Ma eni kotaꞌan xiꞌin ñayii ti xininchisa ñaꞌan xi Jesucristu. Kuan ama eni kuu sa ndaa xiꞌin sa kuiꞌia ña? ña ama guaꞌani nadaka taꞌan sa naa xiꞌin sa dayeꞌe? 15 Kuan kuadi mani Jesucristu xiꞌin sakakuiꞌia, san duꞌua ni en ñayii xininchisa ñaꞌan xi Jesucristu xiꞌin en ñayii ti xininchisa ñaꞌan xi ia, ti mani. 16 Kuan atuu dana sa netaꞌan s-templu Ndios xiꞌin ndidaa idolo, san ntso kuu ndo s-templu Ndios nchito, tu nchisa sa Ndios io ku kuanaa ndo ndidaa ndo.cDuꞌua kuenta kachi Ndios:
Koo ntsu san kaka ntsu xiꞌin nu ndidaa nu.
Ntsuꞌu ku kuu Ndios nu,
san nuyaꞌa ndidaa nu ku kuu ñayii ku kiun ntsu.d
17 Juandiku,
¡Ti kee sa io ndidaa nu xan, san xiko kuin! kachi ia kuu ku Toꞌo ndo.
San nisa ma ku koꞌon yo sa kuiꞌia ti taꞌan-ini ntsu,
san ntsuꞌu kinimani ñaꞌan ntsu xo,e
18 San ku kuu ntsu S-tata yo ndidaa yo,
san yoꞌo ndidaa yo ku kuu yo ku daꞌa yee ntsu xiꞌin ku daꞌa deꞌe ntsu, duꞌua kachi Ndios ia tastuni.f