5
Kuan xini da sa xikikoño da ndidaa da kuu kuenta en veꞌe tuvixi io d̶a ñuyii yaꞌa sa ndeꞌe, doko xiniguaꞌa da ndidaa da sa andivi kuaan niꞌi da en yikikoño kuenta en veꞌe kaꞌnu sa ma ndeꞌe. Sa kída guaꞌa Ndios san adi ñayii ñuyii yaꞌa kída guaꞌa, 2 Juandiku nchoj ntseꞌe da ndidaa da sa nadama da veꞌe io ñuyii yaꞌa xiꞌin veꞌe io andivi. 3 Sa duꞌua ndukutu da san ma koo nchala da. 4 Kuan ndidaa dan tsa io yikikoño yaꞌa xi ndaꞌvi ntseꞌe io xanaa da ndidaa kuan ti nchu koo nchala da maska sa nchu ndukutu da, ndasa sa xiꞌi na nadama xiꞌin sa ti ndeꞌe. 5 Kuan Ndios duꞌua kídaguaꞌa ñaꞌan ia d̶a ndidaa da, ndasa duꞌua na nadama da, san táxi ia x-espíritu ia d̶a ndidaa da ndasa na keꞌe d̶iki da sa kada ia sa kachi ia.6 Juandiku ndidaa tiempu kukaꞌnu-ini da ndidaa da, kuan neni nchito yikikoño yaꞌa san ti kida sa koo da sa io Ndios. 7 (Vita io da ndidaa da sa saꞌa sa xininchisa da, san adi sa saꞌa sa xini da xiꞌin nduchinuu da) 8 San ndidaa jaꞌa xininchisa da ndidaa da, juandiku nchu dandoo da ndidaa da yikikoño yaꞌa ndasa na koo da sa io Ndios. 9 Juandiku nduku da sa kada da sa nataꞌan xanaa ia guaꞌa ni tu ñuyii yaꞌa ña ñuyii vaxi. 10 Kuan ndidaa ndo saa jnu Jesucristu,a san ntsaꞌa ia nása kida ndo neni ío ndo xiꞌin ku kikikoño ndo ñuyii yaꞌa, san ndiden ndiden kuañaꞌan ia xaꞌvi ñayii nasa kuu sa kida ñayii tu kida ñayii sa guaꞌa ña sa kuiꞌia.
Ku ndo ñayii kaꞌan s-toꞌon Ndios
11 Juandiku xini da ndidaa da sa nandeꞌe sa yuꞌu da xiꞌin kininchisa ñaꞌan da xi Ndios. Nduku da ndidaa da sa na kininchisa ndidaa ñayii toꞌon guaꞌa kaꞌan da. Ndios xini ñaꞌan guaꞌa ia d̶a ndidaa da, san ntsatu da sa dini ndidaa ni, duꞌua nakini ñaꞌan ni d̶a ndidaa da tuku. 12 Adi jaꞌa nchukachi sa kaꞌan da ndidaa da sa kuu mee da, sa nchoj da kuu sa na ku-iꞌni ni xiꞌi da ndidaa da, san duꞌua na kini ni na toꞌon kaꞌan ni xi ndidaa ñayii kaꞌan sa ntseꞌe da xini, doko kada ti io ndaa xanaa xi. 13 Kuan tu ndukeꞌe da ndidaa da, san sa kuxi Ndios kuu, doko tu io ndaa da ndidaa da, san sa kuj dini ndidaa ni kuu. 14 Sa xinimani Jesucristu kida sa na kada da ndidaa da sa kida da, kuan duꞌua sani-ini da ndidaa da: sa tu Jesucristu xiꞌi ia sa saꞌa ndo, ndidaa ñayii ku xaꞌan ia xíꞌi tuku; 15 Kuan sa saꞌa ndo ndidaa ndo xíꞌi ia, ndasa ndidaa ñayii io ñuyii ma koo ka tsa sa saꞌa mee tsa ndidaa tsa, maska sa nakoo ñayii sa saꞌa ia xiꞌi xiꞌin nandoto sa saꞌa tsa ndidaa tsa. 16 Juandiku vita ti ntsaꞌa ka da ndidaa da ñayii kuenta kida ndidaa ñayii ñuyii yaꞌa. San tu duꞌua xu ntsaꞌa da ndidaa da Jesucristu na ñayii ñuyii yaꞌa, ti duꞌua ka kida da ndidaa da vita. 17 Ñayii ndu eni xiꞌin Jesucristu kuu ñayii saa, san ndidaa sa xu kada ñayii kendoo; san vita ndidaa kuu sa saa.
18 San ndidaa jaꞌa kee ndaꞌa Ndios, ia kída sa na ndumani ndo xiꞌin ia sa saꞌa Jesucristu san táxi ia chiion sa na kaꞌan da ndidaa da sa na ndumani ñayii xiꞌin ia: 19 Kuan sa saꞌa Jesucristu Ndios io ia sa kaꞌnu-ini sa saꞌa ndidaa kuachi, san nduu mani ia xiꞌin ndo ndidaa ndo, san xíka ia sa na kaꞌan da ndidaa da sa ndumani ia xiꞌin ñayii. 20 San duꞌua Jesucristu tsandaꞌa ñaꞌan d̶a ndidaa da, sa na kaꞌan da s-toꞌon ia, san xika Ndios sa na kunini ndidaa ñayii s-toꞌon ia. Juandiku sa saꞌa Jesucristu xika da ndidaa da: sa na ndumani ni ndidaa ni xiꞌin Ndios. 21 Kuani Jesucristo ti kída ia kuachi, doko sa saꞌa ntso ndidaa ndo juandiku Ndios kídañaꞌa ia kuachi xi ia, ndasa ntso ndidaando na ndu ndaa ndo jnu Ndios sa saꞌa Jesucristu.