Kuwa kwa Babilona
18
Munyima thzeyi, na monine kangeru kamweya o ku ka tunda ku wiru. Kekarire nokoro oukuru, kaye kokahe ka munekire mukaci ko kutethzima kwako. 2 Ka kumbire ko diywi dyodikuru ci,“Na u! Na u, Babilona shokuru!
Na piruka diumbo dyo mathzimu,
macihoreko o mipepo thzothzimango,
macihoreko o mishovo thzothzihe thzenyunyi yo dithziro,
karo macihoreko o mishovo thzothzihe thzekondwama yo dithziro no ku kendiwa.
3 Inene matunga oahe na a nu,
ku waine o ruthziho rwenthzi rorukuru,
karo mafumu o kaye na a tende mirembe nenthzi.
Akwamiuro o kaye na fumu mukaci ko ku shima nene kwenthzi ku yoya nawa.”
4 Ngou na yuvire diywi dimweya o ku di tunda ku wiru ku amba ci:
“Mu tunde ku kwenthzi, amwe mwanuange,
ci katere mu cipakerere nenthzi mu thsivi thsenthzi,
ci katere mwa ku citapere nenthzi makarara aa a mu keyera.
5 Inene evi yenthzi po i nongeriwa,
thsitungu thso ku ka kuma ku wiru,
Nyambi na vuruka etenda yenthzi
yoimango.
6 Mu mu kwame eci edi na a kwama amweya.
Keyi na a kwama kwamweya, amwe mu i mu kwame rwidi.
Eyi na a mi nwithsa yoiruru,
amwe mu mu nwithse yoiruru nene,
mu i mu nwithse rwidi.
7 Eci diya naa cithzineka,
no ku yoya nawa,
namwe mu mu nyandithse kengeyo,
ci ekare mu makuano.
Inene aa ciamberanga ci:
‘Ni nekara no fumu o mbuyama!
Kadi cingwa no difakathzi,
karo mbera ka nikara mu thsidiro.’
8 Mukaci keyo, makarara enthzi, kenge a ku mu wera mu diyuwa dyofoci pohuma,
kufa, thsidiro no ndombo.
Kenge a ku tumekeriwa mu mudiro,
inene Fumu Nyambi oyu mu ratura, o di nokoro.”
9 Mafumu o kaye aa na a tende nenthzi mirembe no ku cikora ku yoya nawa nene kenge a kwikara mu thsidiro no makuano ou a ku mona mwithse o kupya kwenthzi o ku u thsima. 10 Kenge a kwimanena kokure, pa ku yapa kunyandithsiwa kwenthzi kokukuru, no ku amba ci: “Mayuwane!
“Mayuwane, owe o thsikuña thsoshokuru!
Mayuwane Babilona, thsikuña thsoshokoro!
Raturo thza Nyambi thzi na ku keyera mu thsitunde thsofoci.”
11 Akwamiuro o mu kaye kenge a ku mu dira no ku kuana, inene ka kwa kwikara oyu wa ku ura etere yo. 12 Kuma na a uranga gauda o mungi, silivera no mawe oakuru mu thsivaka no mapiare, mambatu oawa, yo muvara o muhombohombo, tererina, eto yoikihu, yo mishovoshovo yo ku yuwa pa mukerete, pa maeo o ndambi, etondo yo ku tura, pa kopa, pa thsifu no pa mawe oakuru mu thsivaka. 13 Karo naa uranga sinamoni, thsende, insense, mira, furankinsense; edya yo ku cipitura eci waine, maathzi o muywera, oshunga, vuroto, emunanu yo ngombe, mangu, tukambe, matemba, mofoci kengeyo nanu o ku urithsiwa kwikara apika.
14 Kenge a ku dira ci: “Thsima ethsi no shimanga nene na thsi pu. Rufumo rwoe neyi yo ku roerithsa nayo ya pwa, ko wa ku i wana karo!” 15 Akwamiuro awa na fumena omu mu thsikuña kenge a kwimana kokure, o kwa na yapa mukaci ko kunyandithsiwa kwenthzi kokukuru. Kenge a kwikara mu thsidiro no makuano ci:
16 “Mayuwane! Mayuwane! Owe thsikuña thsoshokuru
owe no vatanga eto yoiwa, yo muvara o muhombohombo
neyi yoikihu no ku yengiwa ko gauda
o ku rwethzima no mawe oakuru mu thsivaka no mapiare!
17 Mu thsitunde thsofoci roruhe oro rufumo ru nepithsiwa.”
Akuru o mangunde wahe, awa a na endanga ko mangunde navui wahe, nowa a na endithsanga miuro thzo mu diwate wahe kenge a kwimana kokure. 18 Kenge a ku dira ou a ku mona mwithse o kupya kwenthzi o ku u thsima, kenge a ku amba ci: “Thsipi karo thsikuña ethsi thsekarire thsothsikuru eci ethsi?” 19 Kenge a kwikara pa thsidiro no makuano no ku ciwethsa dikungu ku mitwi no ku dira ci:
“Mayuwane! Mayuwane! Thsiya thsikuña thsoshokuru kengeya.
Modiyo na fumena akwa mangunde aa a enda mu mawate!
Uno honi mu thsitunde thsofoci pohuma
thsothsihe thsi na pu.”
20 Owe o diwiru, o roere kwipithsiwa kwathso!
Namwe mwanua Nyambi mu roere namwe mwa tunganda namwe mwakwakukethza.
Inene Nyambi o na mu ratura
mukaci keyi naa mi kwama.
21 Kangeru kokakoro ngou ka yerurire diwe dyodikuru dyo ku kuma podi dyo ku purera vuroto. Ka di kuherire mu diwate no ku amba ci:
“Thsikuña thsoshokuru thsa Babilona
kenge thsa ku kuheriwa pashi
kokoro o kengeya,
karo mbera ka thsi waniwa karo.
22 Mivumo thzo maharepa nakwakwimba no tunamutoriro no matorombita
mbera ka i yuvahara ku koe karo diyere.
Mbera ka kwikara karo akwakukwama owañurungu
mbera ka waniwa ku koe.
Miumba thzakwakutwa
mbera ka thzi yuvahara ku koe karo.
23 Mumunyi o kambarambara
mbera ka u muneka ku koe karo.
Maywi o thsinyanyu a mukwakuyeka na mwenga
mbera ka a yuvahara ku koe karo.
Akwamiuro oe a pitire o mu kaye kokahe
ko masheno oe o mbango no kwangera matunga oahe!
24 Muya mu thsikuña na ku waniwa onyinga wakwakukethza nou wanua Nyambi,
nou wanu wahe awa na paiwa mu kaye.”