Membo o thsinyanyu mu wiru
19
Munyima thzeyi, na yuvire eyi ya yuvaharire eci mungi oukuru mu wiru wanu o kwa kuerera ci:“Haleluya!a
Kuyoyithsiwa no kutethzima nokoro po ya Nyambi wetu.
2 Raturo thzenthzi po thza shemwa karo thza ku oroka.
Na a ratura diya diherehere dyoshokuru
edi na dipithsa kaye ko ruthziho rwadyo.
Nyambi na a di pa humbithso pa kwipaa apikenthzi.”
3 A kuererire karo ci:
“Haleluya!
Mwithse ou u tunda pa padyo waa thsima diyere na diyere!”
4 Waya akuru o makumi edi nane no iya yumbiwa yoiyumi ine a tongamine pashi no ku rombera Nyambi, oyu wekarire pa ngunja. A kumbire ci: “Ameni! Haleluya!”
Thsidika thso wenga wa Dinguana
5 Ngou kwa tundire diywi ku ngunja ku amba ci:
“Mu shangare Nyambi,
wetu mwahe amwe mwapikenthzi,
amwe mu na mu yapa,
ashoonye nowa ashokuru.”
6 Karo na yuvire eci muvumo o mungi oukuru wanu, nji eci muvumo o meyu oangi aa a pupa, nji eci mushika ou wanduka nene. A ambire ci:
“Haleluya!
Inene Fumu Nyambi wetu Shokoro Ouhe po aa tumina.
7 Tu nyanyukenu no ku roera,
tu mu penu direma.
Inene thsikati thsi na kumu thso wenga wa Dinguana,
mwenga wenthzi na ciroithsera yothsinda.
8 Naa piwa eto yo lineni yoiwa
yo kurwethzima yoikenu.” (Inene oyo lineni o muwa po a emanena etenda yoiwawa yakwakutawa.)
9 Kangeru ka ni amberire ci: “O ñore eyi: Akwathsiyauthzi awa a na raiwa ku wenga wa Dinguana.” Ka ambire karo ci: “Aa po maywi oshemwa aa a tunda kwa Nyambi.”
10 Ngou na tongamine ku mauru ako ku ka rombera. Unone ka kanine ci: “Dyombo, wa ni rombera! No mupika Nyambi eci owe naenthzoe akwakutawa awa a na tanarithsa ombangi wa Yesu. O rombere Nyambi pohuma. Inene mupepo okethzi odiyo u pa ombangi wa Yesu.”
Oyu wa pahamine pa kakambe kokakenu
11 Na monine diwiru o ku di na yanthzuruka, akopo ku keya kakambe kokakenu. Oyu wa pahaminepo wethsiwire ci Omururami no Shemwa. Wa raturire no ku rwa kowawa. 12 Meho enthzi nedi eci mirengi, pa mutwi wenthzi pekarire mishukwe thzothzingi. Wa ñoriwire dithzina edi a kana ku dimuka munu shime aye pohuma. 13 Thsikoveyo ethsi a vatire thsa cumbwiwire munyinga. Dithzina dyenthzi po nedi Diywi dya Nyambi. 14 Akwakurwa o mu wiru a mu shupwerire o kwa na pahama pa tukambe totukenu no ku vata lineni o muwa, yoikenu yo kupira dithziro. 15 Mu kanwa kenthzi kwa tundire mwere outwe o ku rwithsa matunga. Kenge a ku wa tumina no muramu o thsifu, karo kenge a ku a njova eci veine mu thsikameno thso waine thsoanthzi oukuru wa Nyambi Shokoro Ouhe. 16 Pa thsikoveyo thsenthzi no pa ditumbu kwa ñoriwire edi dithzina ci:
“Fumu o mafumu no Ñathsire wañathsire.”
17 Ngou na monine kangeru aka kemanine mu diyuwa aka ka kumbire ko diywi dyodikuru enyunyi yoihe eyi ya undukire mu wiruwiru ci: “Mu keye mu ciwane pofoci pa thsidika thsothsikuru ethsi a na kwama Nyambi. 18 Na mu dye nyama thzo mafumu, aendithsi no mashwarare, nyama thzo tukambe nothzi thzowa a na pahamapo, nyama thzanu wahe, apika nakwakurukuruka, ashokuru nowa ashoonye!”
19 Ngou na monine thsiya thsikondwama no mafumu o kaye no mashwarare o o kwa na ciwana pofoci ku rwithsa oyu wa pahamine pa kakambe nakwakurwenthzi. 20 Unone ethso thsikondwama thsa kwatiwire, mofoci kengeyo no mukwakukethza o mbango oyu wa kwamine emonithso yo ku komokithsa mu dithzina dyathso. Keyo emonithso wangerire awa ekarire no thsitamba thsethso thsikondwama nowa a romberire thsikupuro thsathso. Thsikondwama noyo mukwakukethza o mbango momu widi wo a kuheriwire o kwa di oyumi mu diviya dyo mudiro o ku yuuma no sulufura. 21 Amweya wahe a paiwire ko uya mwere outwe uya wa tundire mu kanwa koya wa pahamine pa kakambe. Enyunyi yoihe yekutire nyama thzo.