Juda 1

Diñoro dya

Juda

Kuvumenena

Yame no Juda mupika Yesu Krisitu, karo yame no mina Jakovo. Naa ñorera amwe na mwithsiwa no ku shimiwa kwa Nyambi Tata no ku nyungiwa nawa kwa Yesu Krisitu.

2 Ñeke, thsiyaro no thsishimo ikare nenu kongi.

Kwimanena Oshemwa

3 Ashimiwa ange, kuma na ni foto nene ci ni mi ñorere yo kuyoyithsiwa oku tu ciera twahe. Na ni mono ci ku di nawa ci ni mi ñorere ku mi romba ci mu rwere thsitawo ethsi na a pa Nyambi anuenthzi owakenu rofoci, karo ro mahurerero. 4 Inene anu amweya o kukana ku tawa nengena muvudi mu kaci kenu. Awo anu awo raturo thzo thza ñoriwire ku kare, aa tengurura thsihemo thsa Nyambi kwikara dikuñwa dyo ku kwamena ongurunde no ku hamura Ñathsire no Fumu wetu yofoci Yesu Krisitu.

5 Shaanga ci na mu dimuka kare yoihe eyi, naa fota ku mi vurukithsa ci Fumu wa paturire anuenthzi mu ditunga dya Egepita, unone ku rupara wa thzirithsire kukwo awa a kanine ku tawa. 6 Karo tungeru otu twa kanine ku cikwathsithsa nawa eturo yato, unone twa thsiire mandau ato, Nyambi na a nyungera otu tungeru mu madyenge o diyere mu ndau thzo mirema ku taterera diyuwa dyodikuru dyo raturo. 7 Mofoci, Sodoma na Gomora no mambongi aa a cihatire nao engenine mu ruthziho no ku koña ecikumbwethza yerama. Nyambi wa pire humbithso thzo mudiro ao mambongi ci ikare nomenithso thzo mudiro o diyere o raturo thza Nyambi.

8 Mofoci nowa anu awa, aemana perota yo, aa thsireka erama yo no ku kana okoro wa Nyambi no ku yengwera o kutethzima awa a di mu wiru. 9 Unone shaanga Mikaele mukuru o tungeru ou a cikanyekire na shamaonga yerama ya Mushe, Mikaele ka a keshukire ku ratura shamaonga pa ku yengwa, unone wa ambire pohuma ci: “Fumu a ku kuturure!” 10 Unone awa anu aa shwahura enu eyi a na kana ku yuvithsithsa. Karo enu eyi a yuvithsithsa ko thserekerera, eci eyama yo kupira maano, yodiyo ya ku wa retera kunongithsiwa. 11 Akwothsimo awa anu! Inene a na shimbi dikuñwa dya Kaine, karo mukaci ko ku shima nene madi na cimbunju eci Balaami, karo na cithziri mu kupirukera kwo Nyambi eci Kora.

12 Awa anu aa cipitura eci okaru ou u na cihoreka pa mapondapondera, aa dya nenu ko kukana ku fera honyi ekwama yo yoimango, adithsani awa a cinyunga awo pohuma kupita ku nyunga mangu. Aa cipitura eci mavui o kupira mvura, aa pepumukithsiwa ku mupepo. Karo aa cipitura eci etondo yo kupira ima mu thsikati thso mvura, yaa tongoriwa no ku fa rwidi. 13 Aa cipitura eci mañithsingi oa anthzi o mu diwate, aa tupura difuthzi dyenu yo kufithsa honyi. Aa cipitura eci matungwethzi aa a yembaera, inene Fumu o na wa turekera mirema thzothziru thzo diyere.

14 Enoke, aye o mukuta o muthsitanu na thzidi ku tunda kwa Adama, wokethzire keyi yowa anu awa ci: “O mone, Fumu aa keya nanuenthzi owakenu o tukore na tukore, 15 ku na ratura anu wahe. Kenge a ku na pa murandu akwakukana ku tawa mukaci ketenda yoimango eyi na tende, no maywi oahe oamango aa na amba anu wevi o ku rwithsa Nyambi.” 16 Awa anu po akwa ku tatoka no ku cithsimoka, aa shupwera pohuma ecikumbwethza yo yo thsivi. Aa cinuneka nene athsinda, karo aa shangaranga anu amweya ci a wane thsimweya ku kwo.

Ku cithzua mucima

17 Uno honi amwe, ashimiwa ange, mu vuruke eyi twa mi amberire tunganda twa Fumu wetu Yesu Krisitu. 18 Kuma twa mi amberire ci: “Mu mayuwa o mahurerero kenge kwa kwikara akwamushepuruthzi, awa a ku shupwera ecikumbwethza yo yoimango.” 19 Awa anu awa wodiyo awa a reta kucitepatepa mu kaci kenu. Aa shupwera mianekerero thzo thzo thserekerera, karo ka di no Mupepo wa Nyambi.

20 Unone amwe, ashimiwa ange, mu ciumbe oandu mu thsitawo thsenu thsothsikenu nene no ku rombera ko Mupepo Oukenu. 21 Mwikare mu thsishimo thsa Nyambi o ku mu taterera ñeke thza Fumu wetu Yesu Krisitu ku mi retera mwoyo o diyere. 22 Mu fere ñeke awa a tamangera. 23 Mu yoyithse amweya ko ku wa yokora mu mudiro. Mu monithse ñeke kwamweya ko ku yapa Nyambi, unone mu thzimbe shaanga thsikoveyo thso ku rambera omango o thsivi.

Kuyemekera

24 Ku kwenthzi aye o ku twethsa ku mi nyunga ci mwa kuñuka, no ku mi reta ko kupira kapongonyi pa meho o kutethzima kwenthzi ko thsinyanyu thsothsikuru, 25 ku kwenthzi aye Nyambi yofoci, aye Muyoyithsi wetu ka Yesu Krisitu Fumu wetu kwikare kutethzima, ofumu, okoro noendithsi, ku tatekera ekati yoihe o ku i shime, no pano tu di no diyere! Ameni.