Ehokora
ya Johani
1
Eyi po ehokora ya Yesu Krisitu, eyi a mu pire Nyambi ci a monithse angambenthzi eyi i na roera ku tendahara popano. Wa tumine kangeru kenthzi kwa ngamba wenthzi Johani ku na mu dimukithsa eyi enu. 2 Aye wa tongorire yoihe eyi a monine. Ou odiyo muthzimbu wenthzi o diywi dya Nyambi nombangi wa Yesu Krisitu. 3 Wa thsiyauthzi o ku varera aa maywi ou ukethzi ku mbunga, karo akwa thsiyauthzi wahe awa a teerera no ku hengeka eyi i na ñoriwamo, inene thsikati pepi thsi di.Johani aa vumenena makereke o mutanu na edi
4 Edi diñoro dyaa tunda ku kwange, ame no Johani, naa ñorera amwe mwa makereke o mutanu na edi aa a di mu Asia:
Thsihemo no thsiyaro ikare nenu ku tunderera kwa Nyambi oyu diko, oyu wekarako, karo oyu keya, no ku mipepo thzo mutanu na thzidi ethzi thzi di pa rupara ro ngunja thzenthzi.
5 Karo mu piwe thsihemo no thsiyaro ku tunderera kwa Yesu Krisitu, aye mbangi o ku rurama, aye mwedi ku kupinduka kwafu, karo yodiyo muendithsi o mafumu o kaye.
Wa ku tu shima, karo naa tu rukurura kwivi yetu ko ku viithsa onyinga wenthzi. 6 Naa tu kwama mbunga thzo mapurisita ku kwamena Nyambi Tata wenthzi. Kutethzima nokoro ikare kwa Yesu diyere na diyere! Ameni.
7 Mu mone! Aa keya pa mavui.
Munu yomuhe kenge a ku mu mona,
mane nowa na mu kiñi kenge a ku mu mona.
Mishovo thzothzihe thzo mu kaye
kenge thza ku dira mukaci kenthzi.
Ii, kenge ya kwikara kengeyo! Ameni.
8 Fumu Nyambi aa amba ci: “Yame no Alufa no Omega,a Matatekero no Mamaneneno. Yame oyu diko, oyu wekarako, karo oyu keya, aye Shokoro Ouhe.”
Johani aa mona Yesu Krisitu mu thsimona
9 Yame no Johani, mwapenu mu thsitawo, karo muenthzenu mu makando no mu Kutumina kwa Nyambi no mu kucitanarithsa oku a twithsera Yesu. Kuma nekarire muya mu diongo di nethsiwa Patimosi mukaci ko ku amba diywi dya Nyambi nombangi wa Yesu. 10 Mu diyuwa dya Fumu, nekarire mu Mupepo wa Nyambi, amepo ni yuva diywi dyodikuru munyima thzange eci torombita. 11 Dya ambire ci: “O ñore mu vuka eyi o mona no ku thzi tumena ku makereke o mutanu na edi aa a di mu mambongi a Efese, Simirina, Perigamo, Tiyatira, Saride, Filadelufia no mu Laodisea.”
12 Na cithsetukire ci ni mone oyu wa ambire nange. Ou na cithsetukire na monine imeko yo tumbarambara yo gauda yo mutanu na idi, 13 karo mu kaci ko imeko yo tumbarambara mwekarire oyu wa monaharire eci Mwana Munub o ku na vata thsikoveyo thsothsire shime ku ka kuma kwidyato yenthzi, karo wa ciangire mwiya o gauda mu muidi. 14 Huki thzo ku mutwi wenthzi nedi thzikenu too eci mbwe, meho enthzi nedi eci mirengi. 15 Edyato yenthzi ya monaharire eci kopa oyu yekema mu dirungu. Diywi dyenthzi dya yuvaharire eci meyu oangi aa a pupa.
16 Wa kwatererire matungwethzi o mutanu na edi mu dyoko dyenthzi dyo rudyo, mu kanwa kenthzi kwa tundire mwere outwe nokunoku. Rupara rwenthzi rwa monaharire eci diyuwa mutenya o ku u twa.
17 Ou na mu monine na wererire ku mauru enthzi eci thsithzimbi. Ngou a ni kambekire dyoko dyenthzi dyo rudyo no ku amba ci: “Wa yapa! Yame o Kutanga no Mahurerero. 18 Yame oyu Yoya. Shime naa fa, uno honi naa yoya diyere na diyere! Yame ni di no mapao o Kufa no Ndau Thzafu.c 19 Mweyo, o ñore eyi o na mono, eyi i tendahara pano neyi i keya munyima thzeyi. 20 Diano dyoa matungwethzi o mutanu na edi aa o na mono mu dyoko dyange dyo rudyo, neyi imeko yo mutanu na idi yo tumbarambara yo gauda po eyi: Matungwethzi o mutanu na edi po ya emanena tungeru to makereke o mutanu na edi, imeko yo tumbarambara yo mutanu na idi po ao makereke o mutanu na edi.”