Eyi ya ñoriwerire kereke thza Efese
2
“O ñorere kangeru ko kereke thza Efese ci: ‘Aa odiyo maywi aa a tunda koyu na kwaterera matungwethzi o mutanu na edi mu dyoko dyenthzi dyo rudyo no ku endaura mu kaci ko imeko yo tumbarambara yo mutanu na idi yo gauda.2 “ ‘Ni na dimuka etenda yoe no kukwama nene koe, no muooto woe. Ni na dimuka ci tumba o thsierera anu owamango, karo no ereka awa cithsa ci tunganda, unone ya tumbako. No wana ci a angera. 3 No ootera no ku citanarithsa mu makando mukaci ko dithzina dyange, unone ko no aya.
4 “ ‘Uno honi ko i di eyi ni ku shomorora: No thsii thsishimo thsiya wekarire nathso pa kutanga. 5 O vuruke ore opa no u! O cere no ku kwama eyi no kwamanga pa kutanga. Ngeci ko cera, kenge na ku keya ku koe no ku na tundithsa thsimeko thsoe thso kambarambara mu dyango dyathso. 6 Uno honi eyi yodiyo ni ku shangara: Waa thzimba etenda yo Manikolai eci ame edi na i thzimba.
7 “ ‘Oyu di no matwi, a yuve eyi u amba Mupepo ku makereke!’ O ku othza, kenge na ku mu pa ku ima yo thsitondo thso mwoyo ethsi thsi di mu paradaisi thza Nyambi.”
Eyi ya ñoriwerire kereke thza Simirina
8 “O ñorere kangeru ko kereke thza Simirina ci: ‘Aa maywi aa a tunda koyu o Kutanga no Mamaneneno, oyu wa fire, unone aa yoya karo.
9 “ ‘Ni na dimuka makando oe nohepwe woe, unone o fumanyi! Ni na dimuka kwipithsa amweya mathzina kowa a amba ci Majuda, unone kadi Majuda shemwa, awo po thsiciwanoa pohuma thsa Satana. 10 Wa yapa makando aa o tamba ku nyanda. Naa ku tongwera ci shamaonga kenge a ku mi ereka ko ku paka amweya ku kwenu mu kamenga. Kenge mwa ku nyanda mayuwa o dikumi, uno honi wa ku rurame kate ko ku kufa, apo honi kenge na ku ku pa ao mushukwe o mwoyo.
11 “ ‘Oyu di no matwi, a yuve eyi u amba Mupepo ku makereke!’ O ku othza ka a ku kururiwa ku kufa ko muthsidi.”
Eyi ya ñoriwerire kereke thza Perigamo
12 “O ñorere kangeru ko kereke thza Perigamo kenge ci: ‘Aa odiyo maywi oyu di no mwere o wenge nokunoku.
13 “ ‘Ni na dimuka ci waa tunga mu mbongi omu thzi di ngunja thza Satana, unone no rurama ku kwange. Ko no hamura thsitawo thsoe ku kwange shaanga mu mayuwa a Antipasi, aye mbangi wange o ku rurama oyu wa paiwerire mu kaci kenu omo mu mbongi a na yoyo Satana.
14 “ ‘Uno honi ko i di yoipu eyi ni ku shomorora: Shimbi ekarerako oko awa shupwera erongithsa ya Balaami,b oyu wa rongithsire Balaki ku teera thsiraha Maisiraele ci a tende thsivi ko ku dya edya yo ku tupwera ekupuro, mofoci kengeyo no ruthziho. 15 Karo o di no wa shupwera erongithsa yo Manikolai. 16 Mweyo, o cere! Ngeci ko tende kengeyo, popano naa keya ku koe no ku na wa rwithsa no mwere ou u tunda mu kanwa kange.
17 “ ‘Oyu di no matwi, a yuve eyi u amba Mupepo ku makereke!’ O ku othza kenge na ku mu pa ku maana aa na a horekiwa. Karo kenge na ku mu pa diwe dyodikenu edi di di no dithzina dyodipe edi di na ñoriwapo, edi a kana ku dimuka munu shime aye wa ku di tambura.”
Eyi ya ñoriwerire kereke thza Tiyatira
18 “O ñorere kangeru ko kereke thza Tiyatira ci: ‘Aa odiyo maywi a Mwana Nyambi, aye mukwa meho o kuninga eci mirengi, nedyato yo ku dyekema eci kopa oyu di mu mudiro oyu na kenithsiwa.
19 “ ‘Ni na dimuka etenda yoe yoihe, thsishimo thsoe, no thsitawo thsoe, ekwama yoe no kucitanarithsa koe. Karo naa mona ci waa tenda nawa mweyi enu eyi kupita pa kutanga.
20 “ ‘Uno honi ko i di eyi ni ku shomorora: Waa thsierera oya mbuyama Jezebele oyu na cithsanga ci mukwakukethza. Mwirongithsa yenthzi aa pambanithsa apikange ku wa twara mu ruthziho no ku dya edya yo ku tupwera ekupuro. 21 Na ni mu pa ndau thzo ku cera evi yenthzi, unone ka a fotire ku thsia ruthziho rwenthzi. 22 Mweyo, kenge na ku mu kuhera podidi o makando, apa a ku nyandera nene shemwa, aye nowa naa rembeka nenthzi, shime ngeci wa ku cere no ku thsia etenda yo yoimango. 23 Kenge na kwipaa anenthzi. Apo honi makereke oahe kenge a ku dimuka ci yame oyu na fotithsithsanga nawa eanekera nefota yo munu no munu. Kenge na ku pa munu no munu ku kwenu ethsi thsi na mu roera kokuthza ketenda yenthzi.
24 “ ‘Unone naa ambera amwe mwahe mwamweya mu Tiyatira, awa a na kana ku shupwera eyi erongithsa yo mbango karo ka na cirongithsa eyi ethsa amweya ci “Diano dyoshokuru dya Satana,” ka ni rundekire pa mupango wenu. 25 Shaanga kengeyo, mu tanarithse pohuma eyi mu di nayo shime ku ka kuma apa na ku keyera. 26 O ku othza no ku kwama eshima yange shime ku ka kuma ku hura, kenge na ku mu pa okoro peuru thzo matunga. 27 Kenge a ku a tumina ko muramu o thsifu, no ku ororora eci kafuma koma, eci dyodi na tamburire okoro kwa Tata. 28 Karo kenge na ku mu pa Dirungwe.
29 “ ‘Oyu di no matwi, a yuve eyi u amba Mupepo ku makereke.’ ”