Eyi ya ñoriwerire kereke thza Saride
3
“O ñorere kangeru ko kereke thza Saride ci: ‘Aa o maywi aa a tunda koyu na kwaterera mipepo thzo mutanu na thzidi thza Nyambi no matungwethzi o mutanu na edi.“ ‘Ni na dimuka etenda yoe, karo ni na dimuka ci o na pupaana ci waa yoya, unone o mukwa kufa. 2 O kothsoroke! O tanarithse eyi o na thsiara nayo, eyi i di po pepi no ku fa, inene ni na wana ci etenda yoe ka i kwanenenine pa meho a Nyambi wange. 3 Mweyo, o vuruke eyi wa tamburire neyi wa yuvire. O i hengeke no ku cera. Ngeci ko kothsoroka, kenge na ku keya ku koe ko thsiundumukera eci mwithzi.
4 “ ‘Uno honi kwa di owapu omo mu kereke thza Saride awa a na kana ku yarithsa evata yo dithziro. Awo kenge a ku enda nange o kwa na vata yoikenu, inene aa roera kwikara kengeyo. 5 O ku othza eci awo kenge a ku yengiwa yoikenu, karo mbera ka ni tundithsa dithzina dyenthzi mu Vuka thzo Mwoyo, unone kenge na ku pa ombangi o dithzina dyenthzi pa meho a Tata no tungeru twenthzi.
6 “ ‘Oyu di no matwi, a yuve eyi u amba Mupepo ku makereke!’ ”
Eyi ya ñoriwerire kereke thza Filadelufia
7 “O ñorere kangeru ko kereke thza Filadelufia ci: ‘Aa odiyo maywi oyu o mukenu noshemwa, oyu na kwaterera dipao dya Fumu Davida. Ethsi a na yanthzurura kwithsa o ku thsi yanthzera, karo ethsi a na yanthzera kwithsa o ku thsi yanthzurura.
8 “ ‘Ni na dimuka etenda yoe yoihe. O mone, ni na ku yanthzurwera thsero thzo kuninga ci kwithsa o ku twethsa ku thzi yanthzera. Ni na dimuka ci o di nokoro oupu pohuma, unone no tanarithsa diywi dyange karo ko no ni hamura. 9 O teerere! Kenge na ku reta waya akwa thsiciwanoa thsa Satana, awa cithsa ci Majuda, shaanga ci kadi Majuda shemwa, unone akwakwangera. Kenge na ku wa tenda ci a ku keye no ku na tongama ku mauru oe, wangu a ku dimuke ci yowe na shima. 10 Pakuninga ci no hengeka eraa yange yo kucitanarithsa, kenge na ku ku nyunga mu thsikati thseereka eyi i tamba ku keya mu kaye kokahe ku na ereka anu wahe o kaye.
11 “ ‘Popano naa keya. O tanarithse ethsi o di nathso ci kwa kwikara oyu wa ku ku nyanga mushukwe woe. 12 O ku othza kenge na ku mu tenda diunthzi mu tembere thza Nyambi wange karo mbera ka a tundumo. Kenge na ku ñora pa penthzi dithzina dya Nyambi wange no dithzina dyo thsikuña thsa Nyambi wange, aye Yerusalema omupe, oyu tunderera ku wiru kwa Nyambi wange, kenge na ku ñora karo pa penthzi dithzina dyange dyodipe.
13 “ ‘Oyu di no matwi a yuve eyi u amba Mupepo ku makereke.’ ”
Eyi ya ñoriwerire kereke thza Laodisea
14 “O ñorere kangeru ko kereke thza Laodisea ci: ‘Aa maywi aa tunda kwa Ameni, mbangi o ku rurama no shemwa, aye matatekero enu yoihe eyi ombire Nyambi.
15 “ ‘Ni na dimuka ekwama yoe yoihe, ni na dimuka ci ko womborire, karo ko pire. Naa cikumbwethza ci nga wa ombora nji kupya. 16 Uno honi pakuninga ci waekara dienyemvu, ko womborire, karo ko pire, kenge ni ku shanja mu kanwa kange! 17 Waa amba ci: “No fumanyi, ni di neyi ni na foto yoihe, kwithsa ethsi ni na nyanda.” Unone ko dimukire ci o mukwakucithzekera, o munu o makando, o hepwe mane o kapuputwa karo thsisheshe o di. 18 Naa ku thsiurura ci o ure ku kwange gauda oyu na kenithsiwa mu mudiro, ci o fume. O ure karo ku kwange evata yoikenu yo ku vata, ci nga o thsike honyi thzo thsisheshe thsoe. Karo o ure ku kwange muthzi o meho, ci o wethse pa meho oe ci o twethse ku mona.
19 “ ‘Ame naa kutururanga no ku orora awa na shima. Mweyo, o pakereko maano o cere evi yoe. 20 O mone! Ni nemana pa thsero no ku ngongomona. Ngeci munu aa yuva diywi dyange no ku yanthzurura thsikwaro, kenge ningena no ku dya nenthzi, karo naye kenge a dya nange.
21 “ ‘O ku othza kenge na ku mu pa ku roera kwikara nange pa ngunja thzange, eci ame edi na ni othzo no kwikara na Tata pa ngunja thzenthzi.
22 “ ‘Oyu di no matwi, a yuve eyi u amba Mupepo ku makereke.’ ”