Thsimona thso ngunja mu wiru
4
Munyima thzeyi, na kengire, ngou na monine thsero o ku thzi na yanthzuruka mu wiru.Diya diywi na yuvire pa kutanga eci torombita o ku di amba nange dya ambire ci: “O kambame o keye kuno kenge na ni ku monithsa eyi i na roera ku tendahara munyima thzeyi.” 2 Popo nekarire mu Mupepo wa Nyambi, ngou na monine ngunja mu wiru apa kwekarire munu. 3 Oyu wekarirepo wa rwethzimine eci mawe oakuru mu thsivaka aa a nethsiwa jasipere no karinea. Dikongoro dya thzingurukire ethzo ngunja edi dya monaharire eci diwe edi di nethsiwa emaraludi. 4 Mangunja o makumi edi na ane apa pekarire akuru o makumi edi nane a thzingurukire ethzo ngunja. A vatire evata yoikenu, karo a vatire mishukwe thzo gauda ku mitwi thzo. 5 Oko ku ngunja kwa tundire kwethsa ko mvura no mivumo thzo mishika. Pa rupara rwethzo ngunja kwekarire mimunyi thzo mutanu na thzidi o ku thzi yuuma. Ethzi thzo mipepo mutanu na thzidi thza Nyambi. 6 Karo pa rupara rwethzo ngunja kwekarire ethsi thsa monaharire eci diwate dyo thsiponi, edi dya rwethzimine eci kirisitale.
Mu kaci kethzo ngunja no ku thzinguruka ngunja kwekarire yumbiwa ine yoiyumi, eyi ya yarire meho perama ku rupara no ku manyimaa. 7 Thsumbiwa thsothsiyumi thso kutanga thsa monaharire eci nyime, thso muthsidi thsa monaharire eci pohoana, thso muthsihatu thsekarire no rupara eci ro munu, thso muthsine thsa monaharire eci ngonga oyu unduka. 8 Thsumbiwa no thsumbiwa kweyo yumbiwa ine yoiyumi thsekarire no mando o mutanu na dyofoci, aa ekarire no meho oangi peuru no mushi. Ka ya thsiire ku amba othsiku no mutenya ci,
“O mukenu, o mukenu, o mukenu,
Fumu Nyambi Shokoro Ouhe,
Oyu wekarako, oyu diko, karo oyu keya.”
9 Thsikati no thsikati eyo yumbiwa yoiyumi o ku i yemekera no ku remeka, ku kanderera koyu di pa ngunja, aye oyu yoya diyere na diyere, 10 awo akuru o makumi edi nane aa tongamena oyu nekara pa ngunja, no ku rombera aye oyu yoya diyere na diyere. Aa kuhera mishukwe thzo pa rupara ro ngunja no ku amba ci,
11 “Fumu wetu no Nyambi wetu!
Waa roera ku piwa kutethzima, no direma, nokoro.
Inene wombire enu yoihe,
keshima yoe ko i di, karo yombiwire.”