Vuka no Dinguana
5
Ngou na monine vuka mu dyoko dyo rudyo dyoyu wekarire pa ngunja. Ethzi vuka kuma thza ñoriwire mu kaci no peuru, thza angiwire nene keramatera yo mutanu na idi.2 Ngou na monine kangeru kokakoro o ku ka kuerera ko diywi dyodikuru ci: “Edye o ku roera ku ramutura eramatera no ku thsikura ethzi vuka?” 3 Unone kwithsa mu wiru nji mu kaye nji kushi thzo kaye oyu wa twethsire ku thsikura ethzo vuka no ku mona eyi ya ñoriwiremo. 4 Ngou na dirire nene, inene ka kwa waniwire oyu wa roerire ku thsikura ethzo vuka no ku monamo. 5 Yumweya wakuru wa ni amberire ci: “Wa dira! O mone, oya Nyime o mu mukuta wa Juda, mwanahoka shokuru wa Fumu Davida na a othzo akwethzimbo yenthzi. Aa twethsa ku thsikura ethzo vuka no ku ramutura eyo eramatera yo mutanu na idi.”
6 Ngou na monine Dinguana edi dya monaharire eci shime dyaa fa, uno honi dyaa yoya. Kuma dyemanine pa rupara ro ngunja o ku di na thzingurukiwa ku yumbiwa ine yoiyumi nakuru o makumi edi nane. Edyo Dinguana dyekarire no manyia o mutanu na edi no meho o mutanu na edi, athzo mipepo thza Nyambi thzo mutanu na thzidi ethzi thza tumiwire mu kaye kokahe.
7 Diya Dinguana ngou dya thzire no ku ka shimba vuka mu dyoko dyo rudyo dyoyu wekarire pa ngunja. 8 Ou dya manine ku thzi shimba, yumbiwa ine yoiyumi nakuru o makumi edi nane a tongamine pa meho a Dinguana. Munu no munu kukwo wa kwatererire harepa no karonga kokathzungi ko gauda ko kuyara insense, ayo erombero yanua Nyambi.
9 Ngou embire dimbo dyodipe ci:
“Waa roera ku shimba vuka,
no ku ramutura eramatera yathzo,
inene shime wa epaiwa,
karo konyinga woe
no patwera Nyambi anu,
ku tunderera mu mishovo thzothzihe, mu manjimi oahe, mu mambunga oahe, no mu matunga oahe.
10 No wa tende mafumu no mapurisita,
awa kwamena Nyambi wetu,
karo kenge a ku tumina mu kaye.”
11 Na kengire karo, amepo ni yuva maywi o tungeru totungi, to ku kwana tukore to makumi na makumi, otu twa thzingurukire ngunja, no yumbiwa yoiyumi nakuru.
12 Ko diywi dyodikuru twa ambire ci:
“Dinguana edi dyepaiwire,
dyaa roera ku piwa ofumu no rufumo,
onyanyami, okoro,
direma, kutethzima no kushangara!”
13 Ngou na yuvire yumbiwa yoihe eyi i di mu diwiru, eyi i di mu kaye, eyi i di kushi thzo kaye, neyi i di mu diwate o ku i amba ci:
“Koyu di pa ngunja,
noku kwa Dinguana,
kwikare kushangariwa, direma, kutethzima,
nokoro diyere na diyere!”
14 Yumbiwa ine yoiyumi ya tawire ci: “Ameni!” Akuru ngou a tongamine ku yemekera.