Eramatera yo mutanu na idi
6
Ngou na kengire, na monine Dinguana o ku di ramutura thso kutanga kwiramatera yo mutanu na idi. Ngou na yuvire thsimweya ku yumbiwa ine yoiyumi o ku thsi amba ko diywi eci mushika ci: “O keye!” 2 Na kengire, ngou na monine kakambe kokakenu. Oyu wa pahamine po wa kwatererire ota o mandamba. Wa piwire mushukwe, ayepo thza eci mukwakuothza ku ka othza.3 Ngou karo a ramuturire thsiramatera thso muthsidi, karo na yuvire thsumbiwa thsothsiyumi thso muthsidi o ku thsi amba ci: “O keye!” 4 Ngou kwa punine kakambe kamweya kokakihu pyu eci mudiro. Oyu wa pahaminepo wa piwire okoro o ku tundithsa thsiyaro mu kaye ci anu a cipaapae. Ngou a piwire mwere oukuru.
5 Dinguana ngou a ramuturire thsiramatera thso muthsihatu, na yuvire thsumbiwa thsothsiyumi thso muthsihatu o ku thsi amba ci: “O keye!” Ngou na kengire amepo ni mona kakambe kokeru. Oyu wa pahaminepo wa kwatererire thsipimithso mu dyoko dyenthzi. 6 Na yuvire ethsi thsa vumine eci diywi edi dya tundererire ku yumbiwa ine yoiyumi ku amba ci: “Kiro thzofoci thzo vuroto thzaa uriwa ko madi o ku kwamena diyuwa dyofoci, makiro ahatu o mahangu aa uriwa ko madi o kukwamena diyuwa dyofoci. Uno honi wepithsa maathzi o muywera no waine.”
7 Dinguana ou a ramuturire thsiramatera thso muthsine, na yuvire thsumbiwa thso muthsine o ku thsi amba ci: “O keye!” 8 Na kengire no ku mona kakambe kokukwayuka. Oyu wa pahamine po dithzina dyenthzi nedi Kufa, karo Ndau Thzafua thza mu shupwerire munyima. A piwire okoro peuru thzo thsipinthzi thso muthsine thso kaye, kwipaa ko mwere, ndombo, ekora nekondwama yo mu kaye.
9 Dinguana ou a ramuturire thsiramatera thso muthsitanu, na monine kushi thzo katara myoyo thzowa a paiwire mukaci ko diywi dya Nyambi nombangi wo o shemwa. 10 A kuererire ko diywi dyodikuru ci: “Fumu Shokoro Ouhe, shokenu noshemwa, kenge ya kwikara thsikati thso kukuma kupi ci o rature no ku pa humbithso anu o kaye mukaci konyinga wetu?” 11 Ngou a piwire munu no munu thsikoveyo thsothsikenu. Karo a amberiwire ci a turumwithse thsikati thsothsire ko, shime ku ka kuma apa thza ku kwanena taro thzaenthzo apika Nyambi awa kwipaiwa eci awo.
12 Na kengire karo, ngou na monine Dinguana o ku ramutura thsiramatera thso muthsitanu na thsofoci. Kwekarire kungangama ko kaye kokukuru, no diyuwa dyeraurire eci thsito thsothsiru, karo ngonda thza kihire eci onyinga. 13 Matungwethzi a kurumukire ku wiru ku wera mu kaye eci ñuyu ethzi thzi shime ku kora, ethzi thzi kurumuka kukuyu ou u nyungiwa ku mupepo. 14 Diwiru dya pwire eci thsifundo thso ku fundiwa, mikinya thzothzihe no maongo oahe a tutururiwire mu mandau ayo.
15 Ngou mafumu o kaye, akwakutumina naendithsi o mandwa, afumanyi, owakoro, apika nakwakurukuruka a ka cihorekire mu mahorongo no mu mawe o mu mikinya. 16 A amberire mikinya no mawe ci: “Mu tu were, mu tu horeke ku rupara royu nekara pa ngunja no kuanthzi wa Dinguana! 17 Inene diyuwa dyoshokuru dyoanthzi wo di na kumu, edye nga o wimanena?”