Diherehere dyoshokuru no thsikondwama
17
Kamweya ku tungeru to mutanu na twidi tuya twa kwatererire turonga to mutanu na twidi ka keyire ku kwange no ku na ni ambera ci: “O keye na ni ku monithse raturo ethzi thza ku keyera diya diherehere dyoshokuru, diya di nekara po pepi no marware oangi. 2 Mafumu o kaye na tende mirembe nenthzi, nanu o kaye na pende waine o ruthziho rwenthzi.”3 Ako kangeru ka ni shimbire mu Mupepo wa Nyambi no ku ni twara mu dikunguthsitu. Omo na ka monine mbuyama oyu wekarire pa thsikondwama thsothsikihu, ethsi thsa ñoriwire mathzina o ku yengwa perama yoihe. Ethso thsikondwama thsekarire no mitwi thzo mutanu na thzidi no manyia o dikumi. 4 Oyo mbuyama wa vatire yo muvara o muhombohombo neyi yoikihu no ku cicakerera epako yo gauda no mawe oakuru mu thsivaka no mapiare. Mu dyoko dyenthzi wa kwatererire nganja thzo gauda ethzi thza yarire omango o kupiterera nenu yo dithziro dyo ruthziho rwenthzi. 5 Pa rupara rwenthzi kwa ñoriwire dithzina, unone eyi di na amba po diano:
“Babilona Shokuru,
Mama o Maherehere
Nomango o Kupiterera ouhe o Kaye.”
6 Na monine ci oyo mbuyama kuma a pendire onyinga wakwakutawa, onyinga o waya a pire ombangi wa Yesu.
Ou na mu monine na komokire nene. 7 Kangeru ka nipurire ci: “Ine eyi o na komoka? Kenge ni ku tongonwena eyi di na amba edi diano dyoyu mbuyama nethsi thsikondwama apa a nekara, athso thso mitwi mutanu na thzidi no manyia dikumi. 8 Thsiya thsikondwama o na mono shime thsaekarako uno honi ka thsi diko. Unone thsi tamba ku pinduka ku tunda mu dikwina dyo kupira ondanda ku thza ku ka nongithsiwa. Anu o kaye awa kanine ku ñoriwa mathzina o mu Vuka thzo Mwoyo ku tunda ku matatekero o kaye, kenge a ku komoka ou a ku mona karo ethsi thsikondwama, inene shime thsaekarako, unone ka thsi diko, uno honi kenge thsa ku keya.
9 “Eyi yaa fotahara ci munu ekare nonyanyami no kuyuvithsithsa. Mitwi thzo mutanu na thzidi po thza emanena mikinya thzo mutanu na thzidi apa a nekara oyo mbuyama. 10 Karo thza emanena mafumu o mutanu na edi, o mutanu na u, yumweya kwaa di, yumweya shime ku keya. Ou a ku keya kenge a kwikarako thsikati thsothsipu pohuma. 11 Thsikondwama ethsi thsekarireko, uno honi ka thsi diko, yodiyo honi fumu o muthsitanu nahatu. Naye wa mu thsipani thsa awo o mutanu na edi, uno honi aa thza ku kunongithsiwa.
12 “Manyia o dikumi aya o na mono po mafumu o dikumi aa a shime ku tungithsiwa. Uno honi kenge a ku piwa okoro o ku tumina nethso thsikondwama mu thsitunde thsofoci. 13 Wahe akwa dikumi a di no muanekerero ofoci, kenge a ku pa okoro wo nofumu wo ku thsikondwama. 14 Wahe kenge a ku rwithsa Dinguana, unone Dinguana kenge a ku wa othza, inene aye po Ñathsire wañathsire, karo Fumu o mafumu. Awa di nenthzi po akwa kwithsiwa, karo akwa ku hanguriwa, karo a rurami.”
15 Kangeru ngou ka ni amberire ci: “Aya meyu o na mono paya di nekara diya diherehere po a emanena mungi wanu ku tunderera mu mambunga oahe, mu mishovo thzothzihe, mu matunga oahe, no mu manjimi oahe. 16 Thsiya thsikondwama no manyia o dikumi o na mono kenge a ku thzimba diya diherehere no ku di nyanga yoihe eyi a di nayo, ku mu thsia thsisheshe. Kenge a ku dya erama yenthzi no ku mu tumekera mu mudiro. 17 Inene Nyambi naa paka mu micima thzo ku kwama eanekera yenthzi, kenge a ku tawa ku pa ofumu wo thsiya thsikondwama thsothsikihu, shime maywi a Nyambi ou a ku tenda ku citombora. 18 Oyu mbuyama o na mono po a emanena thsikuña thsoshokuru ethsi thsi na tumina mafumu o kaye.”