Turonga to mutanu na twidi toanthzi wa Nyambi
16
Ngou na yuvire diywi dyodikuru edi dya tundererire mu Tembere o ku di amba koto tungeru to mutanu na twidi ci: “Mu thze mu ka pingurwere turonga to mutanu na twidi toanthzi wa Nyambi pa kaye.”2 Kangeru ko kutanga ka thzire no ku ka pingurwera karonga kako pa kaye. Awa ekarire no thsitamba thso thsikondwama no ku rombera thsikupuro thsathso a menine eronda yoimango yo ku kora nene.
3 Kangeru ko muthsidi ka pingurwerire karonga kako pa diwate. Diwate dya pirukire onyinga eci o munu o kufa. Enu yoihe yoiyumi mu diwate ya fire.
4 Kangeru ko muthsihatu ka pingurwerire karonga kako pa marware no manowa o meyu, karo ya pirukire onyinga. 5 Ngou na yuvire kangeru aka ka na mono yo meyu o ku ka amba ci:
“O muwawa mu kuratura koe, Owe Shokenu,
oyu diko karo oyu wekarako.
6 Inene na viithsa onyinga wanuoe owakenu nakwakukethzoe,
pano honi o na wa pa onyinga ci a u nwe omu a na roera.”
7 Na yuvire diywi ku tunderera ku katara edi dya ambire ci:
“Ii, Fumu Nyambi Shokoro Ouhe,
ku ratura koe ku wawa, karo kwa shemwa.”
8 Kangeru ko muthsine ka pingurwerire karonga kako pa diyuwa, diyuwa dya piwire okoro o ku tumeka anu no mudiro. 9 Anu a pire mukaci koku kupya kokukuru, a yengwerire dithzina dya Nyambi, aye oyu di nokoro pao makarara oahe. Unone a kanine ku cera nji ku shangara Nyambi.
10 Kangeru ko muthsitanu ka pingurwerire karonga kako pa ngunja thzo thsikondwama, kutumina kwathso kwekarire mu mirema. Anu a cihumine nwaeo mukaci ko kukora. 11 A yengwerire Nyambi o diwiru mukaci ko kukora kwo neronda yo, unone a kanine ku cera eyi a kwamine.
12 Kangeru ko muthsitanu na kofoci ka pingurwerire karonga kako pa Rware roshokuru rwa Yuferati. Rwa pwererire ku roithsera dikuñwa mafumu o ku Muvo. 13 Na monine mipepo thzothzimango thzihatu ethzi thza monaharire eci mayura, o ku thzi rea mu tunwa to mbarange, thsikondwama no mukwakukethza o mbango. 14 Ethzo thzodiyo mipepo thzo mathzimu ethzi thzi kwama emonithso yo ku komokithsa karo thzaa thza ku mafumu o kaye kokahe, ku ka wa kungurwera ku ndwa mu diyuwa dyoshokuru dya Nyambi Shokoro Ouhe.
15 “Mu mone, naa keya eci mwithzi! Wa thsiyauthzi oyu kuñwera, oyu na cipakera eto yenthzi ci katere a ku ende thsisheshe ku cifithsa honyi.”
16 Ethzo mipepo thzothzimango thza wanekire mafumu pa ndau ethzi thzi nethsiwa mu Thsiheveru ci Hamagedoni.
17 Kangeru ko muthsitanu na twidi ka pingurwerire karonga kako mu mupepo. Kwa yuvaharire diywi dyodikuru ku tunderera mu Tembere ku tunderera ku ngunja edi dya ambire ci: “Ku na pu.” 18 Ngou kwekarire kwethsa ko mvura, no kwanduka ko mishika no mivumo. Karo kwekarire kungangama ko kaye kokukuru nene shemwa ko kuninga ci ka kwekarako karo ku tunda apa ombiwerire anu mu kaye. 19 Thsikuña thsoshokuru thsa citepire epinthzi ihatu nekuña yo matunga ya wire. Nyambi wa vurukire Babilona Shokuru, wa mu nwithsire mu nganja thzo waine oanthzi wenthzi oukuru. 20 Maongo oahe a umburukire no mikinya thzothzihe thza pwire. 21 Mbwe thzothzikuru thzo ku fota ku kwana oremu o ku twethsa ku kuma pa makiro o makumi ane dimbwe no dimbwe thza wererire anu ku tunda ku wiru. Anu a kuyire Nyambi mukaci kedyo dikarara dyo mbwe, inene nedi dikuru nene.