Tungeru no makarara o mamaneneno
15
Ngou na monine mu wiru thsimonithso thsimweya thsothsikuru thso ku komokithsa. Na monine tungeru to mutanu na twidi o ku tu na kwaterera makarara o mutanu na edi o mamaneneno, inene odiyo a ku manenena oanthzi wa Nyambi.2 Karo na monine ethsi thsa monaharire eci diwate dyo thsiponi edi di na cipakerera no mudiro. Ngou na monine awa othzire thsiya thsikondwama no thsikupuro thsathso no nomboro thzo dithzina dyathso. Emanine ku nyonga thzo diwate dyo thsiponi o kwa na kwaterera maharepa aa a wa pire Nyambi. 3 Embire dimbo dya Mushe aye mupika Nyambi, no dimbo dya Dinguana ci:
“Ekwama yoe ikuru karo yaa komokithsa,
Fumu Nyambi Shokoro Ouhe!
Makuñwa oe a ku oroka, karo a shemwa,
Fumu o matunga oahe.
4 Fumu, edye oyu wa ku kana ku ku yapa,
no ku shangara dithzina dyoe?
Inene yowe ofoci o mukenu.
Matunga oahe kenge a ku keya,
no ku na tongama pa meho oe,
a ku ku rombere,
inene etenda yoe yoiwawa,
na i hokoriwa.”
5 Munyima thzeyo, na kengire no ku mona ci Tembere mu wiru, athzo tende thza Nyambi thzombangi thza yanthzurukire. 6 Ngou kwa punine oto tungeru to mutanu na twidi mu Tembere, otu twa kwatererire makarara o mutanu na edi. Twa vatire lineni o mukenu o ku rwethzima no ku cianga miya thzo gauda mu miidi thzato. 7 Thsimweya thso yumbiwa ine yoiyumi ngou thsa pire tungeru to mutanu na twidi turonga to mutanu na twidi to gauda to ku yara oanthzi wa Nyambi oyu yoya diyere na diyere. 8 Tembere thza yarire mwithse ou wa tundire ku kutethzima kwa Nyambi no kukoro wenthzi. Kwithsa oyu wa twethsire kwingena mu Tembere shime ou a pwire ao makarara o mutanu na edi oto tungeru to mutanu na twidi.