Dinguana nanu o 144,000
14
Na kengire, ngou na monine Dinguana o ku nemana pa Mukinya wa Sionea nanu o 144,000, awa ñoriwire dithzina dyenthzi nedi dya Tata wenthzi pa rupara. 2 Na yuvire muvumo ou wa tundire ku wiru o ku u vuma eci meyu o ku pupa kokoro karo eci mushika oukuru o mvura. Oo muvumo na yuvire wa cipiturire karo eci anu owangi awa shikire maharepa.3 Embire dimbo dyodipe pa rupara ro ngunja no pa rupara ro yumbiwa ine yoiyumi nakuru. Kwithsa oyu wa twethsire ku cirongithsa edyo dimbo shime awo o 144,000 awa paturiwire ku kaye. 4 Awa wodiyo awa kanine ku cipithsa nambuyama, inene a diyerire ku rara nambuyama. Aa shupwera Dinguana kokuhe oku a thza. Awa wodiyo na paturiwa mu kaci kanu wahe no kwikara mutomwa ou wa ku piwa kwa Nyambi noku kwa Dinguana. 5 Ka kwa waniwire kwangera mu tunwa two, inene ka di no kapongonyi.
Tungeru tuhatu
6 Ngou na monine kangeru kamweya o ku ka unduka mu wiruwiru. Ka shimbire Muthzimbu Ouwa o diyere ku na tongwera anu o mu kaye, kwanu o mu matunga oahe, mu mishovo, mu manjimi no mu mambunga oahe. 7 Ka kuererire ko diywi dyodikuru ci: “Mu yape Nyambi karo mu shangare okuru wenthzi! Inene thsikati thsenthzi thsi na kumu thso ku ratura anu. Mu mu rombere aye oyu wa kwamine diwiru, kaye, diwate no manowa o meyu.”
8 Kangeru ko muthsidi ka shupwerire ko kutanga no ku amba ci: “Na u! Na u Babilona Shokuru, oyu naa nwithsa matunga oahe kuanthzi o waine o ruthziho rwenthzi!”
9 Kangeru ko muthsihatu ka shupwerire oto twidi to kutanga o ku ka kuerera ci: “Munu yomuhe oyu na rombera thsikondwama no thsikupuro thsathso no ku tambura thsitamba thsathso pa rupara nji pa dyoko, 10 naye kenge a ku nwa ku waine oanthzi wa Nyambi, oyu naa pingurweriwa mu nganja thzoanthzi wa Nyambi o ku shimbi a rurera. Kenge a ku nyandithsiwa ku mudiro no sulufura pa meho o tungeru totukenu no Dinguana. 11 Mwithse o kunyandithsiwa kwo kenge wa ku thsima diyere na diyere. Ka ku turumwithsa mutenya nji othsiku pakuninga ci na rombera thsikondwama no thsikupuro thsathso, karo na tambura thsitamba thso dithzina dyathso.”
12 Eyi yaa monithsa ci anua Nyambi aa roera ku cithzua, awa na hengeka eraerera ya Nyambi no ku rurama kwa Yesu.
13 Ngou na yuvire diywi ku wiru o ku di amba ci: “O ñore eyi: Akwathsiyauthzi afu awa a fera mwa Fumu ku tunda pano ku twara ku rupara.”
“Yoshemwa dyo i di,” waa amba Mupepo. “Kenge mba turumwithsa kwikwama yo, ekwama yo yoiwa kenge ya ku wa shupwera!”
Kuyanga ko kaye
14 Ngou na monine divui dyodikenu, oyu wekarire apo pa divui wa monaharire eci Mwana Munu. Wekarire no mushukwe o gauda ku mutwi wenthzi no cekithsi thzothzitwe mu dyoko dyenthzi. 15 Kwa keyire kangeru kamweya ku tunda mu Tembere no ku na kuerera koyu wekarire pa divui ci: “O kwamithse cekithsi thzoe honi, inene thsikati thso ku yanga thsi na kumu, edya pa kaye i na pi.” 16 Oya wekarire pa divui ngou a punthzerire cekithsi pa kaye no kaye ka yangiwire.
17 Kangeru kamweya ka keyire ku tunda mu Tembere ku wiru, nako karo kekarire no cekithsi thzothzitwe.
18 Karo kangeru kamweya aka kekarire nokoro peuru thzo mudiro, ka keyire ku tunda ku katara no kwithsa ko diywi dyodikuru oyu wa kwatererire cekithsi thzothzitwe ci: “O shimbe cekithsi thzoe thzothzitwe honi o tete ekocera yo veine mu kaye, inene i na pi honi!” 19 Kangeru ka punthzerire cekithsi thzako mu kaye, ka tetire ekocera yo veine no ku i kuhera mu thsikameno thso waine thsothsikuru thsoanthzi wa Nyambi. 20 Eyo ekocera yo veine ya njoviwerire omo mu thsikameno thso waine pora thzo mbongi. Onyinga wa ngongire ku tunda omo mu thsikameno thso waine, wa pupire muendo o ku twethsa ku kwana tunano to 300, nothzungi o ku kuma mu muidi.