Thsikumbwethzo thso kuturumwithsa kwanua Nyambi
4
Mweyo, pakuninga ci thsikumbwethzo thso kwingena omu mu kuturumwithsa shimbi thsekarerako, tu yapenu ci kwa kwikara yumweya ku kwenu oyu wa ku kwanga ku kumamo. 2 Inene ou Muthzimbu Ouwa na u hongiwa ku kwetu, eci dyodi yekarire kowaya ekarire mu dikunguthsitu. Unone kwithsa eyi wa wa kwathsire, inene kekarire no thsitawo thso ku ninga eci thso waya a yuverire Nyambi. 3 Mweyo, atwe na tu tawa twaengena muya mu kuturumwithsa, eci dyodi a ambire Nyambi ci,“Na anthzipire no kwethza ngoro ci,
‘Mbera kengena mu kuturumwithsa kwange.’”
Wa ambire kengeyo, shaanga ikare ci ekwama yenthzi ya pwire ku tunda ku matatekero o kaye. 4 Inene mu Mañoro ko ku di oku a ambire yo diyuwa dyo muthsitanu naedi ci: “Mu diyuwa dyo muthsitanu naedi Nyambi wa turumwithsire kwikwama yenthzi yoihe.” 5 Eyo karo yaa waniwa kumweya oku a amba Nyambi ci: “Mbera kengena mu kuturumwithsa kwange.”
6 Mweyo, kuturumwithsa kwa Nyambi shimbi kwekarerako ci anu amweya engenemo. Uno honi awa tangire ku hongiwa oo Muthzimbu Ouwa a kwangire kwingenamo mukaci ko kukana kwo ku yuvera Nyambi. 7 Mweyo, Nyambi wa pakire diyuwa dimweya edi di nethsiwa ci “Rero.” Nyambi wa ambire ka Davida yedi diyuwa ku kare munyima thzo myaka thzothzingi, eci edi i di mu maywi aa a na ambiwa kare ci:
“Nga amwepo mu yuva diywi dyenthzi rero,
mwa karupithsa micima thzenu.”
8 Inene ngeci po Joshua wa wa pire kuturumwithsa, Nyambi nga ka a ambire karo yo diyuwa dimweya munyima. 9 Mweyo, shimbi dyekarerako diyuwa dyo kuturumwithsa kwanua Nyambi eci edi a turumwithsire Nyambi mu diyuwa dyo muthsitanu na edi. 10 Inene yomuhe o kwingena mu kuturumwithsa kwa Nyambi aa turumwithsa kwikwama yenthzi, eci dyodi a turumwithsire Nyambi kwikwama yenthzi. 11 Mweyo, tu erekenu momuhe omu tu na twethsera ci twingene omo mu kuturumwithsa, ci kwa kwikara oyu wa ku kwanga ku kengenamo eci diya yekarire kowaya ekarire mu dikunguthsitu, awa kwangire kwingena mu kuturumwithsa mukaci ko kukana kwo ku yuvera Nyambi.
12 Inene diywi dya Nyambi dyaa yoya, karo dikoro. Ditwe kupita mwere o ku waa nokunoku. Dyaengena mu kaci ko mwoyo no mupepo, mu kaci ko manunga eshoko no mupopo. Dyaa nangura eanekera necikumbwethza yo mucima o munu. 13 Kwithsa ku yumbiwa ethsi thsi na horekiwa kwa Nyambi. Enu yoihe pa mwanjanja i di, i na thsikuriwa pa meho enthzi, karo ku kwenthzi kodiyo twa ku ka citawera.
Yesu aye Mupurisita Shokuru
14 Mweyo, pakuninga ci tu di no Mupurisita Shokuru oyu naa thzini mu wiru, aye Yesu Mwana Nyambi, tu tanarithsenu eyi na tu tawa. 15 Inene Mupurisita Shokuru wetu tumba nga a kwanga ku tu yuvera ñekeñeke mu kufaratera kwetu, inene wa tumauriwire mwitumaura yoihe omu tu pita, unone ka a tendire thsivi. 16 Tu henyenenu kondume ku ngunja thza Nyambi thzo thsihemo, ci nga tu yuveriwe ñeke no ku wana thsihemo thso ku tu kwathsa mu thsikati thsekarupa.