Yesu aa pita Mushe
3
Mweyo, andengenu, amwe mwana Nyambi, amwe mu na citapera mu kwithsiwa ko ku wiru, mu pakere maano koyu Yesu, oyu tu citawera ci kanganda ka Nyambi, karo mupurisita shokuru wetu. 2 Inene wa ruramine kwa Nyambi, oyu wa mu hangurire, eci dyodi a ruramine Mushe mu nthzio thza Nyambi thzothzihe.3 Unone Yesu po aa roera kutethzima kokukuru kupita Mushe, eci dyodi i di ci mukwakuumba nthzio aa roera ku shangariwa nene kupita athzo nthzio. 4 Inene nthzio no nthzio kwaa di oyu wa thzi umba, unone mukwakuumba enu yoihe po Nyambi.
5 Mushe aye wa ruramine mu nthzio thza Nyambi thzothzihe ko kwikara ngamba, ku pa ombangi wenu eyi ya ku ambiwa ku rupara. 6 Uno honi Krisitu aye ko kwikara Mwana Nyambi, aa endithsa nthzio thza Nyambi thzothzihe korurami. Atwe yatwe twa nthzio thza Nyambi, ngeci atwepo tu ndumepa no ku tawa shemwa mukurupero wetu omu tu cishangarera.
Kuturumwithsa kwanua Nyambi
7 Mweyo, eci edi a amba Mupepo Oukenu ci,
“Rero nga amwepo mu yuva diywi dyenthzi,
8 mwa karupithsa micima thzenu,
eci diya a tendire akwathsañuruenu uya a ni pirukerire,
diya diyuwa a ni erekire mu dikunguthsitu.
9 Omu a ni erekerire akwathsañuruenu,
shaanga ci a monine ekwama yange mu myaka thzo makumi ane.
10 Mweyo, na wa anthziperire, no ku amba ci,
‘Micima thzo thsikati thsothsihe thzaa yemburukanga,
ka na dimuka makuñwa ange.’
11 Mukaci ko kuanthzipa kwange, nethzire ngoro ci:
‘Mbera kengena mu kuturumwithsa kwange.’”
12 Mweyo, andengenu, mu mamere ci ku kwenu kwa waniwa munu o mucima oumango, mucima o kukana ku tawa ou u mu twara kokure na Nyambi oyu yoya. 13 Uno honi, mu citanarithsire oandu namweya diyuwa no diyuwa, o ku shimbi yekarera ci “rero,” ci kwa kwikara shaanga yofoci oyu wa kwikara no mukanayuva mukaci ko kwangeriwa ku thsivi. 14 Inene twahe twaa ciera mwa Krisitu, ngeci atwepo tu tanarithsa thsitawo ethsi twekarire nathso ku matatekero shime ku ka kuma ku mamaneneno. 15 Eci edi ku na ñoriwa ci,
“Nga amwepo mu yuva diywi dyenthzi rero,
mwa karupithsa micima thzenu,
eci diya a tendire akwathsañuruenu,
uya a pirukerire Nyambi.”
16 Adye waya a yuvire diywi dya Nyambi unone a mu pirukerire? Kadi wodiyo waya wahe a tangererire Mushe ku tunda mu Egepita? 17 Karo adye awa a anthziperire Nyambi myaka thzo makumi ane? Ene kadi waya anu a tendire thsivi, karo ethzimbi yo ya dyadyamine mu dikunguthsitu? 18 Karo adye awa ethzerire ngoro Nyambi ci mbera kengena mu kuturumwithsa kwenthzi? Ene kadi waya a mu pirukerire? 19 Mweyo, twaa mona ci ka twethsire kwingena mu kuturumwithsa kwenthzi mukaci ko kukana kwo ku tawa.