Diñoro dya Paulu kwa
AkwaGalatia
Kuvumenena
1
Yame no Paulu, kanganda ka Yesu Krisitu, kadi keshima yanu nji ku tuminiwa kwa munu, unone keshima ya Yesu Krisitu na Nyambi Tata, oyu wa pindurire Yesu kwafu. 2 Akwakutawa wahe awa a di nange kuno, name kengeyo twaa mi vumenena amwe mwa makereke o mu Galatia ci:3 Thsihemo no thsiyaro ikare nenu ku tunderera kwa Nyambi Tata wetu noku kwa Fumu Yesu Krisitu, 4 oyu wa shuvire mwoyo wenthzi mukaci kevi yetu ci a tu rukurure ku kaye kokamango ko rerodino. Wa tendire kengeyo keshima ya Nyambi Tata wetu. 5 Kutethzima kwikare kwa Nyambi diyere na diyere! Ameni.
Evangeli po thzofoci
6 Ni na komoka nene ci mu na thsii wanguwangu Nyambi oyu na a mithsi ko thsihemo thsa Krisitu, no ku shupwera muthzimbu wao. 7 Kadi cingwa ci ko u di Muthzimbu Ouwa umweya, unone kwa di anu amweya awa a mi pambanithsa, karo aa ereka ku tengurura Muthzimbu Ouwa wa Krisitu. 8 Uno honi, munu yomuhe oyu wa ku honga muthzimbu wao ku thsia ou na tu mi hongo a ku kutiwe, ikare yumweya ku kwetu nji kangeru ku tunda ku wiru. 9 Eci dyodiya tu na amba kare, naa mi ambera karo ci, ngeci munu ayepo mi honga muthzimbu wao o ku cithsia nou na mu tambura, oyo munu a kutiwe.
10 Ene eyi ne naa i tendera ci a ni shangare anu nji, nji Nyambi? Inji ci naa ereka ku roerithsa anu? Nga ko ku fota ni fota ku roerithsa anu nga ka ni di mupika Krisitu.
Edi ethsiwire Paulu kwikara kanganda
11 Andengenu, naa fota ci mu dimuke ci Muthzimbu Ouwa ou na hongire po kadi cingwa waa tunda kwanu. 12 Inene ka na ni u tambura kwa munu nji ku u ni rongithsa, unone naa u tambura ko ku u hokweriwa ku tunda kwa Yesu Krisitu.
13 Inene na mu yuvu edi na yoyire o ku ni shupwera thsitawo thso Thsijuda, nedi na ooterire ku nyandithsa nene kereke thza Nyambi ku ereka ku thzi hanyahanya. 14 Mu thsitawo thso Thsijuda na pitire anu owangi o taka thzange mu kaci kaenthzange Majuda, karo na shimine nene erongithsa yo thsithsemwa yakwathsañuruetu.
15 Unone Nyambi wa ni tororire o ku ni shime kwerekiwa ci ni mu kwamene. Na a nithsi ko thsihemo thsenthzi ci nikare mupikenthzi. 16 Aye na i mu roerithsa ku hokora Mwane ku kwange ci ni ka honge Muthzimbu Ouwa keyi yenthzi kwAnukenge.
Uno honi ka na cirerire ku kepura munu. 17 Ka na kambamine ku thza ku Yerusalema ci ni ka cimone nowa ekarire tunganda ame o ku ni shime kwikara kanganda, unone na thzire ku ditunga dya Arabia, ngou honi na hukire ku Damaseka.
18 Munyima thzo myaka thzihatu, na thzire ku Yerusalema ku ka cidimuka na Peturua, na kekarire nenthzi mathsunda edi. 19 Unone ka na ka cimonine no kanganda kamweya shime Jakovo mina Fumu. 20 Eyi ni mi ñorera po yashemwa. Naa tanarithsa pa meho a Nyambi ci ka ni mi tongwerire yokwithsa.
21 Ngou na thzire mu matunga a Siria na Silisia. 22 Kethsiya thsikati akwakutawa o makereke a Krisitu aa a di mu Judea ka ni dimukire thsihanga. 23 Kuma a yuvangire pohuma kwanu ci: “Oyu naa tu nyandithsanga yodiyo oyu honga honi yo thsitawo ethsi a erekire ku hanyahanya.” 24 Ngou a shangarire Nyambi mukaci kange.