Paulu aa tamburiwa ku tunganda tumweya
2
Munyima thzo myaka thzo dikumi na thzine, na hukire karo ku Yerusalema na Banabasi. Na shimbire no Tite. 2 Na thzireko, inene Nyambi kuma a ni monithsire ci naa roera ku tenda kengeyo. Ou twa ciwanenine ku mukunda nowa a remekiwire ci aendithsi, na wa tongawerire Muthzimbu Ouwa ou na hongire kwAnukenge. Ka na fotire ci ekwama yange yo kutanga, neyi yo pano tu di ci ikare yo mbango. 3 Uno honi shaanga Tite oyu nekarire nenthzi, ka a ooteriwire ku thza ku mukanda shaanga ci aye po Mugerike.4 Anu amweya awa a cimonaharithsire eci akwakutawa a na ciwanine netu. Awa anu kuma a keyire ku na nenga ci a mone kurukuruka oku tu di nako mwa Krisitu Yesu, ci a tu tware mupika. 5 Ka twa cihuthsire kushi kukwo shaanga thsikati thsothsipu, kuma twa tendire kengeyo ci tu twethse ku mi turekera oshemwa o Muthzimbu Ouwa.
6 Eciko awa a monaharire ci akuru mu thsivaka po kwithsa ethsi thsa ni korithsire ku mucima mukaciko, inene Nyambi ka a wana mavwevwe, awopo kwithsa ethsi a vungithsire ku maywi ange. 7 Mane awo a monine ci Nyambi na a ni pa ekwama yo ku rongithsa Muthzimbu Ouwa kwAnukenge eci edi a piwire Peturu ekwama yo ku rongithsa Muthzimbu Ouwa ku Majuda. 8 Inene Nyambi oyu wa kwamithsire Peturu kwikara kanganda ku Majuda, yowa ni kwamithsire name kwikara kanganda kwAnukenge.
9 Jakovo, Peturu na Johani, awa a shimbiwire ci wodiyo maunthzi o kereke, a monine ci Nyambi na a ni pa ethsi thsipa. A tamburire ko moko edi Banabasi name kwikara aenthzo mwikwama. Ngou twa ciyuvire ci atwe tu ka kwamene kwAnukenge, awo a kwamene ku Majuda. 10 Eyi a tu rombire pohuma po ku vurukanga ahepwe, eyi po yo na fotangire nene ku tenda ku tunda ku matatekero.
Paulu aa shomorora Peturu
11 Peturu ou a na kumine mu Antioke, na mu kanenine shemwa thsitonwameho, inene kuma epithsire. 12 Inene anu awa a tumine Jakovo o kwa shime ku na kuma, Peturu kuma a dyangire nAnukenge. Unone awo anu ou a kumine, aye wa hukire munyima no kukana ku dya nAnukenge, pa ku yapa aenthzenthzi akwa thsipani thso mukanda. 13 No Majuda amweya nawo ekarire no mahetaheta eci Peturu. Mane mahetaheta o a retithserire Banabasi ku pambana.
14 Ou na monine ci eyi a tendire ka ya endererire noshemwa o Muthzimbu Ouwa, na amberire Peturu pa meho o wahe ci: “Owe po o Mujuda, unone waa yoya eci Munukenge kadi eci Mujuda. Ine honi eyi o ooterera Anukenge ci a yoye eci Majuda?”
Majuda nAnukenge aa yoyithsiwa ko thsitawo
15 Atwe po twa Majuda ko kwerekiwa, kadi twanu wevi eci Anukenge. 16 Uno honi, tu na dimuka ci munu ka a tendiwire o muwawa ketenda yo murao, unone ko thsitawo kwa Krisitu Yesu. Mweyo, natwe na tu tawa kwa Yesu Krisitu ci nga tu tendiwe owawawa ko thsitawo kwa Yesu Krisitu kadi ketenda yo murao, inene ketenda yo murao kwithsa oyu nga tendiwa omuwawa.
17 Uno honi ngeci twaa fota ku tendiwa owawawa ko thsitawo kwa Krisitu, natwe twa Majuda twaa waniwa ci twanu wevi. Ene eyi ne yaa monithsa ci Krisitu po ngamba thsivi nji? Dyombo! 18 Ngeci naa umba karo eyi na ni umburura, apo honi naa cora murao. 19 Inene ou na erekire ku hengeka murao, murao wa ni raturire. Mweyo, na ni fu ku murao ci ni twethse ku yoyera Nyambi. 20 Na niambiwa pa mbinda na Krisitu, kadi yame ni yoya, unone Krisitu oyu yoya mu mwange. Ou mwoyo ni yoya pano honi mwirama po naa u yoya ko thsitawo kwa Mwana Nyambi oyu wa ni shimine no ku shuva mwoyo wenthzi mukaci kange. 21 Ka ni kanine thsihemo thsa Nyambi, inene ngeci munu aa tendiwa omuwawa ketenda yo murao, apo honi po yaa monithsa ci Krisitu kwithsa eyi a fererire.