Diñoro dya Paulu kwa
AkwaEfese
Kuvumenena
1
Yame no Paulu kanganda ka Krisitu Yesu keshima ya Nyambi. Naa ñorera anua Nyambi awa a di mu Efese awa a na rurama kwa Krisitu Yesu.2 Nyambi Tata wetu na Fumu Yesu Krisitu a mi pe thsihemo no thsiyaro.
Thsiyauthzi mwa Krisitu
3 Ku shangariwe Nyambi, Tata wa Fumu wetu Yesu Krisitu, oyu na a tu fiyawera mwa Krisitu ko thsiyauthzi thsothsihe thso mupepo mu mandau o mu wiru. 4 Inene Nyambi wa tu shimine no ku tu hangura mwa Krisitu kaye o ku ka shime no kumbiwa, ci twikare owakenu, karo o kupira kapongonyi pa meho enthzi. 5 Nyambi wa cihangwerire cimo ku twañura kwikara anenthzi mwa Yesu Krisitu. Wa tendire kengeyo komu ya mu nyanyukithserire nomu a i shimenine. 6 Tu shangare Nyambi mukaci ko thsihemo thsenthzi thso kutethzima ethsi a tu pire ka Mwanenthzi oyu a shima. 7 Inene konyinga wa Krisitu, na tu paturiwa no ku teteriwa evi yetu kokuru o thsihemo thsa Nyambi, 8 ethsi a tu rundumwethzire, konyanyami no kuyuvithsithsa.
9 Nyambi na a tu hokwera diano dyeshima yenthzi kokuthza komu ya mu roerithserire nawa, edi a anekerire ku manenena mwa Krisitu. 10 Eanekera yenthzi eyi a ku manenena thsikati ethsi thsi na roera ou thsa ku kuma po ku waneka pofoci enu yo mu wiru no mu kaye no ku i paka mukoro wa Krisitu.
11 Twa hanguriwire mwa Krisitu ku tunda ku matatekero ci twikare ana Nyambi keanekera yenthzi aye oyu o ku twethsa ku tenda enu yoihe omu a na shimena kokuthza kesheteka yenthzi neshima yenthzi,
12 ci atwe twa tangire ku kurupera mwa Krisitu ci nga tu rete kushangara ku kutethzima kwenthzi. 13 Namwe kengeyo, ou mwa yuvire muthzimbu o shemwa, ao Muthzimbu Ouwa wa Nyambi o kuyoyithsiwa kwenu, mwa tawire kwa Yesu Krisitu, karo Nyambi wa mi pakire thsitamba thso Mupepo Oukenu oyu a kumbwethzire. 14 Mupepo Oukenu po thsitanarithso thso kuninga ci kenge twa ku tambura eyi a tu kumbwethzire Nyambi, karo ci Nyambi na a tu patura kwikara anuenthzi. Tu shangare kutethzima kwenthzi.
Paulu aa romberera akwakutawa o mu Efese
15 Mweyo, ku tunda apa na ni yuvera yo thsitawo thsenu kwa Fumu Yesu no thsishimo thsenu kwanua Nyambi wahe, 16 ka na ni thsii ku kanderera kwa Nyambi mukaci kenu no ku mi vurukanga mwirombero yange. 17 Naa romba Nyambi wa Fumu wetu Yesu Krisitu, aye Tata o kutethzima, ci a mi pe Mupepo ou nga u mi nyanyamithsa no ku mi nehethza Nyambi ci mu mu dimuke shemwa. 18 Naa rombera ci Mupepo Oukenu a muneke mu micima thzenu, ci mu dimuke okurupero ou na a mithsera, nokuru o thsiyauthzi thso kutethzima ethsi a na turekera anuenthzi.
19 Karo naa rombera ci mu yuvithsithse okoro wa Nyambi ou u kwama mu mwetu atwe tu na tawa. Oo okoro odiyo okoro oshokuru, 20 ou a cikwathsithsire Nyambi ou a pindurire Krisitu kwafu no ku mwikarithsa ku dyoko dyenthzi dyo rudyo mu mandau o ku wiru. 21 Oko Krisitu a di peuru thzakwakutumina wahe, kutumina, okoro nji mafumu no mathzina oahe aa a nethsiwa, kadi mo kano kaye pohuma unone no kaye aka ka keya. 22 Nyambi na a paka enu yoihe kushi thzedyato ya Krisitu, karo naa mu pa ci peuru thzenu yoihe yodiyo mutwi o kereke. 23 Kereke po erama ya Krisitu, ethzi thzi na yara no ku kwanenena mwa Krisitu, aye oyu na yara mwinu yoihe kokuhe kokuhe.