Maywi o mahurerero
13
Oru na ku na mi hungerithsa pano rodiyo ro muthsihatu. Mweyo, naa mi ambera ci: “Thsiamba no thsiamba thsaa roera ku tanarera pombangi wanu aidi nji ahatu,” eci edi i na ñoriwa. 2 Na nomenithsire awa a tendire thsivi uya na na mi hungerithsire ro muthsidi. Pano honi naa hukera ku wa nomenithsa mofoci kengeyo namweya wahe. Eci diya na na tendire pa kutanga, ou na ku huka oko ka na ku na wandwa,3 pakuninga ci mwaa fota ombangi o ku monithsa ci Krisitu aa amba kange. Ka a faraterire o ku kwama mu mwenu, unone aa kwama kokoro mu kaci kenu. 4 Inene kuma ambiwire pa mbinda mu kufaratera, uno honi aa yoya kokoro wa Nyambi. Mofoci natwe, twaa faratera mu mwenthzi, uno honi kokoro wa Nyambi kenge twa ku yoya nenthzi o ku tu kwama nenu.
5 Mu citatufe no ku cifotithsithsa mwathsinda ci mu mone ci thsitawo thsenu ne thsa shemwa. Ene ka mu dimukire ci Yesu Krisitu mu mwenu a di nji? Shime ngeci na mu thsiara ethzo tatufo. 6 Naa kurupera ci kenge mu wana ci atwe ka tu thsiarire ethzo tatufo.
7 Twaa rombera kwa Nyambi ci mwa kwipithsa. Kadi cingwa twaa fota ku monithsa ci tu na piti ethzo tatufo, uno honi twaa fota ci mu tende enu eyi i na roera shaanga ci twaa monahara ku thsiara ethzo tatufo. 8 Inene tumba tu twethsa ku rwithsa oshemwa wa Nyambi unone twaa wimanena. 9 Inene atwe twaa roera yoihe tu faratera unone amwe mwaa tanarithsiwa. Twaa rombera kwa Nyambi ci mu kurithsiwe mu thsitawo.
10 Yodiyo ni na i mi ñorerera mu diñoro o ku ni na piriko, ci ou na ku keya na ku na mi karupera ko ku cikwathsithsa okoro wange, ao okoro ou naa ni pa Fumu ci mu umbiwe, kadi ku mi umburura.
Kuvumenena ko mamaneneno
11 Ko ku manenena, andengenu, mu nyanyuke. Mu kure mu thsitawo ko kuyara. Mu citanarithse mu kaci kenu, mu ciyuve mu kaci kenu, no ku yoya mu thsiyaro. Mweyo, Nyambi o thsishimo no thsiyaro kenge a kwikara nenu. 12 Mu civumenenange ko thsitawo. 13 Anua Nyambi wahe awa di kuno aa mi vumenena.
14 Thsihemo thsa Fumu Yesu Krisitu no thsishimo thsa Nyambi, no thsiciwano thso Mupepo Oukenu ikare nenu mwahe.