Paulu aa citawera kekwama yenthzi
10
Uno honi ame no Paulu naa mi romba ko ku cihuthsa kushi no kuwamucima kwa Krisitu, ame ni na ombapanga o ku ni di nenu, unone o ku ni di kokure nenu naa karupanga! 2 Naa mi adikanena pano ci ou na ku keya oko na ku na karupa kowa a anekera ci twaa yoya eci anu o kano kaye.3 Inene shaanga ci twaa yoya muno mu kaye, ka tu rwire ndwa konu. 4 Erwithsa eyi tu rwithsa po kadi cingwa erwithsa yo kano kaye, unone erwithsa yokoro wa Nyambi yo ku twethsa ku umburura yoshokoro. 5 Twaa umburura makanyi nenu yoihe eyi i rwithsa odimukero wa Nyambi, karo twaa pukura eanekera yoihe ci i yuvere Krisitu. 6 Karo tu na ciroithsera ku na pa humbithso akwa mukanayuva wahe, kuyuvera kwenu ou kwa ku kwanenena.
7 Mwaa shimba enu ko mimonaharero. Ngeci munu yumweya aa tawa shemwa ci wa Krisitu, a dimuke kenge ci dyodi a di aye ci wa Krisitu natwe dyo tu di. 8 Mweyo, ka ni fire honyi shaanga yame ni cishangara mukaci kokoro ou naa tu pa Fumu ci tu mi umbe kadi ku mipithsa.
9 Ka ni fotire ku monahara eci naa mi yapithsa ko mañoro ange. 10 Inene amweya aa amba ci: “Mañoro a Paulu a remu karo akoro, unone o ku di netu po wa ku faratera karo no maywi enthzi a shwahuki.” 11 Anu o kengeyo aa roera ku dimuka ci kwithsa apa i na cithsiera eyi tu na ñoranga mu mañoro o ku tu na piriko neyi tu na tendanga o ku tu di nenu.
12 Atwe po ka tu keshukire ku cishangara twathsinda nji ku cipiturithsa namweya awa na cishangaranga athsinda. Uno honi yoihe a cianekethza athsinda namweya no ku cifekithsa athsinda namweya, kadi anyanyami.
13 Eciko atwe po kucishangara kwetu po ka tu cishangarangire ku piterera apa tu na roera ku kuma. Unone atwe twaa cishangara ko kukana ku rea mainthza ekwama yetu eyi naa tu pa Nyambi, ku pakerera kengeyo namwe. 14 Inene atwe ka tu citwaratwarire ku cishangara, mane eci ka twa na kumine oko ku kwenu. Inene atwe yatwe twa tangire ku keya ku kwenu ku mi retera Muthzimbu Ouwa wa Krisitu.
15 Mweyo, ka tu hambakanine ku cishangara kekwama eyi na kwama amweya. Unone twaa kurupera ci dyodi thsi kura thsitawo thsenu, nekwama yetu nga dyo i yanduruka nene mu kaci kenu, 16 ci tu twethse ku ka honga Muthzimbu Ouwa no mandau amweya aa a di ku thsambwedyo thzenu. Inene ka tu fotire ci tu cishangare kekwama eyi na i tendiwa kare mu ndau thzo munu yumweya. 17 Unone eci edi ku na ñoriwa ci: “Oyu cishangara a cishangare mwa Fumu.”
18 Inene kadi munu o ku cishangara yothsinda yo na tawethziwa, unone oyu a na shangara Fumu.