Paulu no tunganda to mbango
11
Kadi edi ni na foto ci nga mwaa ni kunda kamanana potomba wange, mu adikane mu ni kunde! 2 Inene naa mi tendera difupa ko difupa dya Nyambi pakuninga ci na mi ungekethzithsire kwa mukwerume yofoci, aye Krisitu, ci nga na ku mi pe ku kwenthzi eci mumbanda o mukenu. 3 Uno honi naa yapa ci eci dyodi dyangerire diyoka Eva ko dinyanyamena, neanekera yenu dyoya ku pambana ku thsia kucipaka kwenu ko shemwa nokenu kwa Krisitu. 4 Inene ngeci munu aa keya ku na mi honga yo Yesu wao, ku thsia oyu twa mi hongire, nji ngeci mwaa tambura mupepo wao ku thsia ou mwa tamburire, nji muthzimbu wao ku thsia ou mwa tamburire, mwaa i tawa wanguwangu.5 Ame ka ni cishimbire nothsinda ci no muonye koto tunganda totukuru mu thsivaka. 6 Shaanga ci ka ni di noñurungu mu kuamba, uno honi ni di nodimukero. Eyo na tu i mi monithsa nawanawa mu makuñwa oahe.
7 Ene kuma na tendire thsivi uya na cihuthsire kushi ci nga mu thzinekiwe, inene na hongire Muthzimbu Ouwa wa Nyambi ku kwenu kengekenge? 8 Na pukurire makereke amweya pa ku tambura ekunda yo ku na mi kwathsa. 9 Karo uya na nekarire oko ku kwenu ku ni na piri, ka na na pire munu mupango. Inene aenthzetu mu thsitawo o ku Masedonia wodiyo a ni kwathsire ku ni retera yoihe eyi na pirire. Kuma na tendire kengeyo ci nekara mupango ku kwenu, karo kenge na ku twarerera ku tenda kengeyo. 10 Pakuninga ci oshemwa wa Krisitu mu mwange u di, oku kucishangara kwange kwithsa oyu wa ku ku kwangithsa mu ditunga dyodihe dya Akaya. 11 Ine eyi ni ambera kengeyo? Ene ka ni mi shimine nji? Nyambi na dimuka ci naa mi shima!
12 Uno honi eyi ni tenda kenge na ku twarerera ku i tenda ci na ku kwangithse awa fota ku cishangarerapo no ku amba ci ekwama yo yaa cishoka neyi yetu. 13 Inene anu o kengeyo po tunganda to mbango, akwekwama yo kwangera, karo aa cimonaharithsa eci tunganda twa Krisitu. 14 Ka i komokithsire, inene shaanga Satana aa cimonithsanga yothsinda kwikara eci kangeru ko mwethzi. 15 Mweyo, ka i komokithsire ngeci angambenthzi nawo aa cimonithsa eci angamba owawawa. Unone ku hura kenge a ku tambura humbithso ethzi thzi na roera etenda yo.
Makando a Paulu pa kwikara kanganda
16 Naa hukerapo kuamba ci, munu a anekera ci no thsitomba. Unone ngeci mwaa tenda kengeyo, mu ni shimbe eci no thsitomba ci name nga ni cishangare kamanana. 17 Kucishangara ko kenge po kadi cingwa kwaa tunda kwa Fumu, unone naa tenda eci thsitomba. 18 Pakuninga ci anu owangi aa cishangara konu, name kenge ni cishangara. 19 Inene amwe mwaa anekera ci mwanyanyami, unone mwaa nyanyuka ku kunda etomba! 20 Mane mwaa kunda munu yomuhe o ku mi pikura, nji ku mi nyanga eyi mu di nayo, nji ku miangera, nji ku mi shwahura, nji ku mi mbandura pa rupara. 21 Naa amba ko honyi ci kuma twa faraterire nene ku tenda kengeyo!
Uno honi thsothsihe ethsi a keshuka munu ku cishangarera, name thsodiyo ni keshuka ku cishangarera. Naa amba kengeyo eci thsitomba. 22 Ene Maheveru nji? Name no Muheveru. Ene Maisiraele nji? Name no Muisiraele. Ene anahoka a Aburahama nji? Name no mwanahoka wa Aburahama. 23 Ene angamba Krisitu nji? Ame naa wa pita. Naa amba eci munu o ku thzaruka, inene na kwamine nene ku wa pita, no ku pakiwa mu kamenga rorungi. Karo na furiwire miendo thzo kukana ku pwa ku tariwa, no ku fotanga ku fa rorungi. 24 Kuma na furiwire miendo thzo mutanu ku majuda tumwashumwashu to ku kuma mu makumi ahatu no mutanu na ane. 25 Na furiwire no miramu miendo thzihatu no ku povauriwa no mawe rofoci. Kuma na rowerire no dingunde miendo thzihatu, karo na shimbire rofoci othsiku ouhe no diyuwa mutumbi o ku ni di mu meyu. 26 Mu miendo thzange thzothzingi, kuma nekarangire mwikarupa. Mwikarupa yo mu marware, mwikarupa yo mapuku, mwikarupa eyi ya tundererire kwaenthzange Majuda no ku kwAnukenge, mwikarupa yo mu mambongi no mu makunguthsitu, mwikarupa yo mu mawate, no mwikarupa ku tunderera kwakwakutawa o mbango. 27 Na kwamine nene no ku nyanda. Karo na kuñwerangire rorungi othsiku ouhe kwithsa ku rara. Na fangire nthzara no dinotwa, na pirangire edya rorungi. Karo na fangire mepo mukaci ko kupira thso ku cithsika.
28 Kadi eyo pohuma, unone diyuwa no diyuwa naa remena mukaci ko ku cithzekera yo makereke oahe. 29 Ngeci yumweya aa faratera, name naa ciyuva ku faratera. Karo ngeci yumweya aa twariwa mu thsivi, naa ciyuva eci mu mudiro ni di mukaci kenthzi.
30 Ngeci naa cishangara naa roera ku cishangara kokuthza komu ku na monaharera kufaratera kwange. 31 Aye Nyambi Tata wa Fumu Yesu, aye oyu shangariwa diyere, na dimuka ci ka niangerire. 32 Ou nekarire mu Damaseka, nguvuru wa Fumu Aretasi kuma a tuminine maporithsa ci ekare pa mathsero o mbongi ci a ni kwate. 33 Uno honi na shurumweniwire ko diyongo mu njaneno thzo pa dimota dyo mbongi no ku para mu moko enthzi.