Ku kwathsa akwakutawa amweya
9
Ka ku fotaharire ci ni mi ñorere karo keyi yo ku tumena ekwathsa aenthzetu akwakutawa o mu Yerusalema. 2 Inene ni na dimuka ci namwe mwakwa ku shima nene ku kwathsa, karo naa cishangaranga kwanu o mu Masedonia mukaci kenu. Na ni wa tongawera ci ku tatekera makomwa amwe mwanu o mu Akaya na mu ciroithsera ku kwathsa. Mane ku shima nene kwenu ku kwathsa na ku nyangumuna anu owangi kukwo.3 Unone naa mi tumena awo aenthzetu amweya ci kucishangara kwetu keyi yenu kwekara ko mbango, unone na wane ci mu na ciroithsera shemwa eci edi na ni i wa tongawera. 4 Inene ngeci o na ku keye nakwa Masedonia no ku na wana ci ka na mu ciroithsera, ka twa ku na amba thsimweya keyi yenu, unone kenge twa ku na fa pohuma honyi mukaci ko ku mi kurupera nene. 5 Uno honi na ni mono ci ku di nawa ku karaethza awo aenthzetu ci a citangethze oko na roithse eyi na mu kumbwethza ku pa. Ou na ku na kuma, naa fota ci na ku na wane enu yoihe o ku i na roo, ci ku monahare ci mwaa pa ko kushima kadi ko ku ooteriwa.
6 Mwa vurama ci o ku kuna yoipu kenge a ku cora yoipu. Unone o ku kuna yoingi kenge a ku cora yoingi. 7 Mweyo, munu no munu ku kwenu aa roera ku pa komu a na anekerera mu mucima wenthzi, kadi ku pa ko ku tatoka nji ku ooteriwa, inene Nyambi po wa ku shima o ku pa o ku na nyanyuka. 8 Nyambi aa twethsa ku mi monithsa thsihemo thsothsihe, ci mwinu yoihe thsikati thsothsihe mwikare nenu yoihe eyi i na fotahara, mane mwikare neyi yoingi yo ku twethsa ku mi kwathsa mwikwama yoihe yoiwa. 9 Eci edi ku na ñoriwa ci,
“Aa pa ahepwe kengekenge,
owawa wenthzi kenge wa kwikara diyere.”
10 Nyambi oyu na panga anjimi mbuto no makende o ku dya, kenge a ku mi pa no ku vurithsa mbuto thzenu thzo ku kuna, karo kenge a ku kurithsa dicora dyenu dyowawa.
11 Kenge mwa ku fumithsiwa mu makuñwa oahe ci mwa ku twethse ku kwathsa thsikati thsothsihe, ci anu owangi a ku kanderere kwa Nyambi keyi mu wa pa ko ku cikwathsithsa atwe. 12 Inene eyi ekwama yenu yo ku kwathsa, ka i kwathsire pohuma anua Nyambi awa a na piri, unone yaa reta kongi erombero yokanderero kwa Nyambi.
13 Mukaci kekwama yenu eyi na mu monithsa, anu amweya kenge a ku shangara Nyambi. Mukaci ko ku hengeka kwenu Muthzimbu Ouwa wa Krisitu ou mwa tawire, no kupa kwenu mu kucitaperano namweya kengeyo. 14 Karo kenge a ku mi romberera no ku fota nene ci nga na mi mono, mukaci ko thsihemo thsa Nyambi thsothsikuru ethsi naa mi pa. 15 Ku kandereriwe kwa Nyambi mukaci kokuru o thsipa thsenthzi thso kukana ku twethsa ku tongononiwa.