Ekunda yakwakutawa
8
Andengenu, twaa fota ci mu dimuke yo thsihemo thsa Nyambi edi na thsi cimonaharithsa mu makereke o mu Masedonia. 2 Inene akwakutawa na erekiwa nene mu makando aa nekara nao. Unone kuma na nyanyuka nene, shaanga ci ekarire ahepwe nene na pa kongi.3 Naa mi tongwera yoshemwa ci na pa nene, mane ku piterera omu nga twethsera ku pa. Na pa keshima yo. 4 Na tu adikanena nene ku tu romba ci tu wa tende nawa ku wa tawethza ku kwathsa akwakutawa. 5 Na tende ku piterera omu na tu kuruperera! Kuma na tanga tango ku cipa athsinda kwa Fumu, mbeci a cipe ku kwetu keshima ya Nyambi.
6 Mweyo, na tu adikanena Tite oyu naa tateka eyi ekwama yo thsihemo mu kaci kenu ci na i manenene. 7 Uno honi eci edi mu di ci mwafumanyi mwinu yoihe, mu thsitawo, mu kuamba, mudimukero, mwishima yenu yo ku kwathsa, no mu thsishimo ethsi mu tu shima; mu mone ci mwaa tenda nene nawa nomu mu thsihemo thso kupa.
8 Ka ni mi tuminine, unone naa mi monithsa edi naa i pakera maano makereke amweya ci ni mone orurami o thsishimo thsenu.
9 Inene mu na dimuka thsihemo thsa Fumu wetu Yesu Krisitu. Shaanga ci wa fumine nene, wa pirukire hepwe mukaci kenu, ci kohepwe wenthzi a mi fumithse.
10 Muanekerero wange mweyi enu po ou. Makomwa po yamwe na mwikara o kutanga, kadi mu kupa pohuma unone no mu ku shima ku tenda kengeyo. 11 Pano honi, mu manenene ekwama eyi na mu tateka! Mu takamithse ku i manenena eci edi mwa i cekire ku matatekero. Karo mu pe kokuthza keyi mu di nayo. 12 Inene ngeci ociroithsero ko u di, Nyambi aa tambura ko thsinyanyu kokuthza kethsi a di nathso munu, kadi ethsi a na piri. 13 Kadi ci ngwa twaa fota ci mu kwathse amweya amwe no ku cithsia mu dikando, unone twaa fota ci mu tende komu ku na roera. 14 Yoingi eyi mu di nayo mo thsino thsikati yaa roera ku kwathsa awa na piri, ci peunthza namwe ou mwa kupira a ku mi kwathse neyi yoingi a kwikara nayo. Mweyo, enu yoihe kenge ya ku enderera nawa. 15 Eci edi ku na ñoriwa ci,
“Koyu wa wanine nene, kwithsa ethsi thsa thsiarirepo.
Karo oyu wa wanine yoipu, kwithsa eyi a pirire.”
Tite naenthzenthzi
16 Twaa kanderera kwa Nyambi, oyu naa retithsa ci Tite a mi pakere maano ko ku mi kwathsa eci atwe. 17 Inene Tite ka naa tawa pohuma eyi na tu mu rombo, unone aye ko ku shima nene ku kwathsa, aa keya oko ku kwenu ko ku shima kwenthzi. 18 Twaa mi tumena Tite no muenthzetu yumweya oyu na shangariwa nene mu makereke oahe kekwama yenthzi yo ku honga Muthzimbu Ouwa. 19 Kadi eyo pohuma, unone makereke yodiyo naa hangura ci a ende netu o ku tu twara ethsi thsikunda thso thsihemo. Twaa tenda kengeyo ku shangara kutethzima kwa Fumu aye thsinda no ku monithsa ku shima nene kwetu ku kwathsa anu amweya.
20 Twaa tenda ko ku mamera nene ci twa shomororiwa komu tu kwamena ethsi thsikunda thsothsikuru. 21 Inene eyi tu fota atwe po ku tenda yoiwa, kadi pa meho a Fumu pohuma, unone no pa meho anu wahe.
22 Twaa mi tumena karo muenthzetu yumweya pofocino, oyu naa cimonithsa rorungi mu makuñwa oangi ci na pakerako maano nene maano, pano honi na pandakana ku pakerako mukaci ko ku mi kurupera nene. 23 Tite po muenthzange, karo aa kwamena pofoci nange ku mi kwathsa. Eciko awo aenthzetu amweya awa a mu thsindekethza po aemanena makereke, karo aa reta direma kwa Krisitu. 24 Mweyo, mu wa monithse thsishimo thsenu, ci ikare ombangi ku makereke ku monithsa ci kucishangara kwetu mukaci kenu po kwa shemwa.