7
Ashimiwa ange, pakuninga ci tu di neyi ekumbwethzo, tu cikenithsenu kwinu yo ku thsireka erama no mupepo, ci twikare anu owakenu nene no ku yoya ko ku yapa Nyambi.Thsinyanyu thsa Paulu
2 Mu tu thsiere ndau mu micima thzenu. Kwithsa oyu na twipithsera, karo kwithsa oyu na twipithsa, nji ku kupakupa munu. 3 Ka ni ambire eyi ci ni mi shomorore. Na ni mi ambera pa kutanga ci mu micima thzetu mu di, mweyo, pofoci tu di mu kuyoya nji mu kufa. 4 Ni na mi kurupera nene! Naa cinuneka mukaci kenu! Ni na tanara mucima mwikarupera yetu yoihe, mane naa rearea ko thsinyanyu.
5 Inene shaanga ou na tu na kumu mu Masedonia, ka na tu turumwithsa. Unone twa karuperire mu mandau oahe, mukaci ko ku cikanyeka nanu amweya no ku yapa mu micima thzetu. 6 Unone Nyambi oyu na tanarithsanga micima thzowa a na kendiwa, wa tanarithsire micima thzetu ko kukuma kwa Tite. 7 Karo ka na tu tanarithsiwa micima ko kukuma kwenthzi pohuma, unone nou twa yuvire muthzimbu wenthzi o ku tu tongwera edi mwa mu tanarithsire mucima. Na a tu tongwera nedi mu na ni ruru, neyi yo thsidiro thsenu, neyi yo ku ni shima nene kwenu. Mweyo, ni na nyanyuka nene ku piterera.
8 Inene shaanga ci diñoro edi na ni mi ñorera na di mi yuvithsa kukora ku micima, ka ni i cerire. Na i cerire pa kutanga, inene naa mona ci na di mi yuvithsa kukora ku micima diya diñoro, uno honi mu thsikati thsothsipu pohuma. 9 Pano honi ni na nyanyuka nene, kadi cingwa mukaci ko kuninga ci na ni mi yuvithsa kukora ku micima, unone pakuninga ci kukora kwenu ku micima na ku mi retera kucera. Inene na mu yuvu kukora ku micima eci edi naa i shimi Nyambi, mweyo, kwithsa ethsi na tu mipithsera shaanga kamanana. 10 Inene aya mathsiwa enu Nyambi naa cikwathsithsa ku mi retera kucera ci mu yoyithsiwe ko kukana ku i cera. Unone kukora ku micima ko mu kaye po kwaa reta kufa.
11 Mu mone eyi na a kwama Nyambi ko mathsiwa enu! Muooto wenu, ku monithsa kwenu ci ka mu di no murandu, kushomorora kwenu enu yoimango, kuanthzipa kwenu, kuyapa kwenu, kurura kwenu, no ku shima nene kwenu maano no ku pa humbithso awa nepithsa. Mweyi enu yoihe mwaa monithsa ci ka mu di no murandu. Mweyo yoihe eyo mwaa monithsa ci ka na mwikara no murandu omu mwiamba. 12 Uno honi ou na ni mi ñorera kadi cingwa mukaci koyu na epithsa nji oyu na epithseriwa, unone kuma na ni mi ñorera ci mu twethse ku mona nawa pa meho a Nyambi ku cipaka nene kwenu ku kwetu. 13 Mweyo, twaa tanarithsiwa micima.
Uno honi ka tu tanarithsiwire micima pohuma, nene po twaa nyanyuka nene pa ku mona thsinyanyu thsa Tite, edi na mu twethsa ku mu yooyerithsa mwahe. 14 Na ni cishangara ku kwenthzi mukaci kenu, karo ka na mu ni fithsa honyi. Unone eci edi na tu mi ambera oshemwa, no kucishangara kwetu kwa Tite na ku monithsa oshemwa. 15 Uno honi thsishimo thsenthzi ku kwenu thsaa thza o kura kokoro o ku anekera kuyuvera kwenu mwahe, nomu na mu mu tambwera ko kuyapa no ku tutuma. 16 Ni na nyanyuka nene honi, inene ni di nokurupero o kuyara mu mwenu.