Ekwama yo tunganda
4
Mweyo, edi mu na roera ku tu shimba po kenge, twangamba Krisitu pohuma awa na piwa ku endithsa diano dya Nyambi. 2 Honi kwaa fotahara ci munu oyu na piwa ci a endithse enu aa roera ku waniwa ci wa ku rurama. 3 Ame ka ni i twarerangire maano edi nga mu ni ratura nji kuta thzanu edi nga thzi ni ratura, mane ka ni ciraturangire shaanga ame nothsinda. 4 Inene ame ka ni cimonine ci ni di no murandu, unone eyo ka i monithsire ci ka ni di no murandu. Fumu aye thsinda yodiyo o ku ni ratura.5 Mweyo, mwa ratura munu thsikati o ku thsi shime ku kuma, Fumu o ku shime ku keya. Inene kenge a ku na paka pa mwanjanja enu eyi i na cihoreka mu mirema pano, no ku hokora eanekera yo mucima. Kethsiya thsikati munu no munu kenge a ku na tambura kwa Nyambi kushangariwa kwenthzi.
6 Andengenu, ni na cikwathsithsa Apolosi name mukaci kenu ci nga mu cirongithse ku kwetu eyi di na amba edi diambo dyo ku kuninga ci: “Wa pandakana omu ku na ñoriwera.” Munu no munu ku kwenu a cishangarera muendithsi yumweya, no ku shwahura yumweya. 7 Inene edye oyu na ku kwama ci o cithsie namweya? Thsine ethsi o di nathso ethsi no kana ku tambura ku tunderera kwa Nyambi? Karo ngeci kuma no thsi tambura ku tunderera kwa Nyambi, ine honi yo ku cishangarera eci ko no thsi tambura?
8 Mu na wana kare yoihe eyi mu na foto! Mu na fumu kare! Mu na tateka ku tumina ko kupira atwe! Kadi edi ni na foto ci nga mu nekara mafumu ci natwe nga tu tumine nenu. 9 Inene ame naa mona ci atwe twa tunganda, Nyambi naa tu paka pa mwanjanja mu ndau thzo mahurerero mu munyorora, eci anu awa na ratweriwa kufa pa meho o mbunga. Na tu tendiwa awa a na tanekeriwa ku kaye kokahe, ku tungeru, nanu.
10 Twetomba mukaci ka Krisitu, unone amwe mwa nyanyami mwa Krisitu! Twaa faratera, unone amwe mu na tanara! Mwaa remekiwa, unone atwe twaa shwahuriwa! 11 Mane no thsino thsikati twaa fa nthzara no dinotwa, twaa vata ekoya no ku tendiwa dyodimango, ka twikarekire twaa thza o yembaera. 12 Twaa kwama nene ko moko etu ku ciyoyithsa. Twaa fiyawera awa a tu kuya, karo o ku tu na nyandithsiwa twaa citanarithsa. 13 Yoihe twipithsiwa mathzina twaa ciambera ko kuwamicima. Na tu piruka, karo shimbi twekarera nthzwaya thzo kaye, eci yunguthsa thzanu wahe.
Paulu aa koñomeka AkwaKorinte
14 Ka ni mi ñorerire ci nga ni mi enithse, unone ku mi kuturura eci anange awa na shima. 15 Inene shaanga nga ci mwikare narongithsi o tukore to dikumi ku mi rongithsa ya Krisitu, ka mu di natata wenu owangi, inene na pirukire tata wenu mwa Krisitu Yesu uya na na mi rongithsire Muthzimbu Ouwa. 16 Mweyo, naa mi koñomeka ci mu ni temunune.
17 Eyo ngeyi na ni tumena ku kwenu Timoti mwanange mu thsitawo oyu na shima, karo wa ku rurama kwa Fumu ci naa mi vurukithse edi ni na shupwera Krisitu Yesu eci dyodi ni na rongithsa mu makereke oahe kokuhe. 18 Amweya ku kwenu na tateka ku cinuneka, awo aa anekera ci ngwa ka na ku na mi hungerithsa karo. 19 Unone popano naa keya, ngeci waa ku i shime Fumu. Ka na ku na fotithsithsa pohuma eyi a amba awa akwamununa, unone kenge na ku na fotithsithsa noku a tundithsa okoro wo. 20 Inene Kutumina kwa Nyambi po ka ku di mu ku ambaamba, unone mukoro wa Nyambi ku di. 21 Mwaa cihangwerapo thsipi? Na ku keye no muramu nji, nji na ku keye no mucima o ku yara thsishimo no kuwamucima?