Diñoro dya Paulu kwa
AkwaRoma
Kuvumenena
1
Yame no Paulu mupika Krisitu Yesu, oyu na ethsiwa kwikara kanganda no ku torweriwa ku rongithsa Muthzimbu Ouwa wa Nyambi, 2 ou a kumbwethzire kukare kakwakukethzenthzi mu Mañoro oakenu. 3 Ou Muthzimbu Ouwa po waa amba keyi ya Mwane, oyu werekiwire konu wenthzi mu mukuta wa Fumu Davida. 4 Wa monaharithsiwire ci Mwana Nyambi ou a pinduriwire kwafu kokoro o Mupepo Oukenu, yodiyo Yesu Krisitu Fumu wetu. 5 Kenthzi aye, twaa tambura thsihemo nokoro o kwikara tunganda ku tongwera matunga oahe eyi naa wa tendera Nyambi ci a tawe no ku mu yuvera, ci a rete direma ku dithzina dyenthzi. 6 Eyi yaa pakerera namwe amwe na mwithsiwa kwikara anua Yesu Krisitu.7 Naa ñorera mwahe amwe mu di mu Roma, amwe mu na shimiwa kwa Nyambi no kwithsiwa ci anuenthzi owakenu.
Nyambi Tata wetu na Fumu Yesu Krisitu a mi pe thsihemo no thsiyaro.
Paulu aa fota ku ka hungera ku Roma
8 Thso kutanga, naa kanderera kwa Nyambi wange mwa Yesu Krisitu mukaci kenu mwahe, inene anu mu kaye kokahe aa tongaura yo thsitawo thsenu ku kwenthzi. 9 Nyambi aa twethsa ku pa ombangi ci eyi ni amba ya shemwa, aye oyu ni kwamena ko mucima wange ouhe ko ku rongithsa Muthzimbu Ouwa wa Mwane. Na dimuka ci naa mi rombereranga thsikati thsothsihe. 10 Thsimweya kweyi ni na rombereranga po naa rombanga Nyambi ci keshima yenthzi, a roithse wangu dikuñwa na ni mi hungerithse.
11 Inene naa fota nene ci nga na ni mi hungerithse ci na ni mi pe thsipa thso Mupepo wa Nyambi, ethsi nga thsi mi tanarithsa. 12 Naa fota ci amwe name twa ku na citanarithse oandu ko thsitawo thsetu.
13 Andengenu, naa fota ci mu dimuke ci na ni fotanga rorungi ku na mi hungerithsa, unone na ni kwangithsiwanga shime pano. Naa fota ku na kwama mu kaci kenu no ku na mona ima yo Mupepo, eci edi na ni i mono mu kaci kAnukenge amweya.
14 Ni nangiwa ku rongithsa anu wahe, ikare Magerike nji akwakuthsiarera, ikare owanyanyami nji etomba. 15 Mweyo, naa fota nene ku na mi honga Muthzimbu Ouwa wa Nyambi namwe amwe mu di mu Roma.
Okoro o Muthzimbu Ouwa
16 Ka ni fererire honyi Muthzimbu Ouwa, inene odiyo okoro wa Nyambi o ku yoyithsa awa a tawa wahe, ku tanga Majuda mbeci ku keye Anukenge.a 17 Inene mou Muthzimbu Ouwa, owawa wa Nyambi waa hokoriwa ohura na hura ko thsitawo. Eci edi aa amba Mañoro ci: “Owawawa kenge mba yoya ko thsitawo.b”
Oanthzi wa Nyambi kwanu owamango
18 Inene oanthzi wa Nyambi waa hokoriwa ku tunda ku wiru, ku na rwithsa thsivi nomango yoihe yanu, awa a na dyaterera oshemwa komango wo. 19 Eyi a na roera ku dimuka anu keyi ya Nyambi a na i dimuka, pakuninga ci Nyambi naa i wa dimukithsa. 20 Inene ku tunda apa kombiwerire kaye, mikarero thza Nyambi thzi shimoniwa, ao okoro wenthzi o diyere nonyambi wenthzi, na i cimonaharithsa nawa. Yaa yuvithsithsiwa keyi a kwamine, mweyo, kwithsa oyu wa ku hamura.
21 Inene shaanga ci a dimukire Nyambi, ka mu remekire eci Nyambi nji ku kanderera ku kwenthzi. Eanekera yo na i piruka yo tumbako, no micima thzo thzothzitomba na thziraura. 22 Aa cishimba ci a nyanyami, unone na piruka etomba. 23 Kupita ci a rombere aye o kutethzima, Nyambi shifu, awo aa rombera ekupuro yo ku pitura anu, enyunyi, eyama neharawi.
24 Mweyo, Nyambi naa wa thsierera ci a tende yoimango eyi thzi fota micima thzo, karo a di necikumbwethza yo ruthziho ro ku fithsa honyi, ku retera kashwahu erama yo mu kaciko. 25 Na pirura oshemwa wa Nyambi ku u tenda yo kwangera, karo aa rombera no ku kwamena eyi ombire Nyambi, kupita ku rombera aye mumbi wayo, aye oyu na roera ku shangariwa diyere! Ameni.
26 Mukaci keyi, Nyambi naa wa thsierera ci a yoye kecikumbwethza yo ku fithsa honyi. Mane ambuyama wo na thsii mikarero ethzi thzi na roera no ku tateka ku rara nambuyama aenthzo. 27 Mofoci nakwerume, nawo na thsii mikarero ethzi thzi na roera nambuyama, awo aa cikumbwethza ku rara nakwerume aenthzo. Akwerume aa tenda enu yo ku fithsa honyi nakwerume aenthzo, karo aa tambura mu kaciko humbithso ethzi thzi na roera etenda yo.
28 Pakuninga ci na kana kwikara nodimukero shemwa keyi ya Nyambi, Nyambi naa wa thsierera mwianekera yo yokwipa ci a tende eyi i na kana ku roera ku tendiwa. 29 A na yara mishovoshovo thzothzihe thzomango, thsivi, rununa, thsithzimbo, mbamba, kwipaa, mikwangarakanyi, mandwa, kwangera, no ruhopo. 30 Akwa kwipithsa anu amweya mathzina, aa thzimba Nyambi, akwa kashwahu akwa mununa, karo akwa ku cishangara. Mane aa vuruka mikarero thzimweya thzothzingi thzo ku tenda omango. Ka yuverire ashemi wo. 31 Ka yuvithsithsa, ka kwama eyi a na kumbwethza, karo ka di no thsihemo no ñeke kwanu amweya. 32 Shaanga ci a na dimuka ci murao ouwawa wa Nyambi waa amba ci munu yomuhe o ku tenda eyi aa roera ku fa, ka twarererire pohuma ku i tenda komango o ku piterera, unone aa tawethza nowa i kwama.